ପୁରୀ ଅଫିସ,୭।୩: କିଛିଦିନର ବ୍ୟବଧାନ ପରେ ଶ୍ରୀମନ୍ଦିରରେ ପୁଣି ରକ୍ତଛିଟା ଓ ବାନ୍ତି ପଡ଼ିଥିଲା। ଫଳରେ ନୀତି ବିଳମ୍ବ ସହ ମହାପ୍ରଭୁଙ୍କୁ ୨ ଥର ମହାସ୍ନାନ କରାଯାଇଛି। ଶନିବାର ପ୍ରଥମେ ଧୁକୁଡ଼ି ଦ୍ୱାର (ଭିତରକାଠ ଓ ବେହରଣ ନିକଟରେ) ରକ୍ତଛିଟା ପଡ଼ିଥିବା ଦେଖାଯାଇଥିଲା। ଫଳରେ ସକାଳ ନୀତିକାନ୍ତିରେ ସାମାନ୍ୟ ବିଳମ୍ବ ହୋଇଥିଲା। ଏହାପରେ ମହାସ୍ନାନ ନୀତି ସମ୍ପନ୍ନ ହେବା ପରେ ପୁଣି ସାଧାରଣ ଦର୍ଶନ ଆରମ୍ଭ ହୋଇଥିଲା। ତେବେ ରକ୍ତଛିଟା କେଉଁଠାରୁ ଆସିଲା ସେନେଇ କୌଣସି ସୂଚନା ମିଳିପାରି ନାହିଁ। ମହାପ୍ରଭୁଙ୍କ ଅବକାଶ ନୀତି ସମୟରେ ସେବାୟତମାନେ ରକ୍ତ ଛିଟା ପଡ଼ିଥିବାର ଦେଖିବା ପରେ ଅବକାଶ ନୀତିକୁ ବନ୍ଦ କରିଥିଲେ। ଏହାପରେ ମହାସ୍ନାନ ନୀତି ବଢ଼ି ୮ଟା ୪୫ ମିନିଟରେ ଶେଷ ହୋଇଥିଲା। ମହାସ୍ନାନ ନୀତି ସମୟରେ ସାଧାରଣ ଦର୍ଶନକୁ ବନ୍ଦ ରଖାଯାଇଥିଲା। ଏହାପରେ ମହାପ୍ରଭୁଙ୍କ ସକାଳ ଧୂପ ସରି ପାଣି ପଡ଼ିସାରିବା ପରେ ଜଗମୋହନ ମଧ୍ୟରେ ଜଣେ ଶ୍ରଦ୍ଧାଳୁ ବାନ୍ତି କରିଥିଲେ। ଏଣୁ ପୁଣି ଥରେ ବଡ଼ ମହାସ୍ନାନ ନୀତି ଅନୁଷ୍ଠିତ ହୋଇଛି। ବଡ ମହାସ୍ନାନ ପୂଜା ଅପରାହ୍ନ ୨ଟା ୪୫ ମିନିଟ୍ରେ ଶେଷ ହୋଇଛି। ମଧ୍ୟାହ୍ନ ଧୂପ ବିଳମ୍ବରେ ଅର୍ଥାତ୍ ୫ଟା ୪୫ ମିନିଟ୍ରେ ଶେଷ ହୋଇଛି।
