ବ୍ରହ୍ମପୁର,୨୫।୬(ସ୍ମୃତି ରଞ୍ଜନ ମହାଲିକ)ମୌସୁମୀ ପ୍ରଭାବରେ ଗତ ୩ ଦିନ ଧରି ବ୍ରହ୍ମପୁରରେ ଲାଗି ରହିଥିବା ଳଗାଣ ବର୍ଷା କାରଣରୁ ସହରତଳି ଅଞ୍ଚଳଗୁଡିକ ନର୍ଦ୍ଦମା ପାଣିରେ ଉବୁଟୁବୁ ହେଉଥିବା ଦେଖିବାକୁ ମିଳିଛି। ସହରତଳି ଅଞ୍ଚଳ ଗୁଡିକରେ ବ୍ୟବସ୍ଥିତ ଡ୍ରେନର ଅଭାବ, ବିପର୍ଯ୍ୟସ୍ତ ରାସ୍ତା ଘାଟ ଓ ଯୋଜନା ବିହୀନ ଭାବେ ମନମୁଖୀ ବହୁ ତଳ ବିଶିଷ୍ଟ ଆପାର୍ଟମେଣ୍ଟ ନିର୍ମାଣ ଯୋଗୁଁ ଏଭଳି ସ୍ଥିତି ଉପୁଜୁଥିବା ସହରତଳି ଅଞ୍ଚଳ ମିଳିତ କ୍ରିୟାନୁଷ୍ଠାନ କମିଟି ଅଭିଯୋଗ କରିଛି। ବର୍ତ୍ତମାନ ବର୍ଷାର ପ୍ରଭାବରେ ବ୍ରଜନଗର, ଶକ୍ତି ନଗର, ଶ୍ରୀମା ନଗର, ଆଦିଶକ୍ତି ନଗର, ହନୁମାନ ନଗର, ବାସୁଦେବ ନଗର, କାଳୁଆ ନଗର, ବାପୁଜୀ ନଗର, ଖାରବେଳ ନଗର, ବସନ୍ତ ବିହାର, ଗାୈତମ ନଗର, ଗୋବିନ୍ଦ ବିହାର, ରାମକୃଷ୍ଣ ନଗର, ନୀଳାଞ୍ଚଳ ନଗର ଓ ଅଳକାପୁରୀ ଅଞ୍ଚଳରେ ବର୍ଷା ପାଣି ରାସ୍ତା ଉପରେ ପ୍ରବାହିତ ହେଉଛି। ଯାହାଫଳରେ ରାସ୍ତାରେ ଯାତାୟତ ସମସ୍ୟା ପାଲଟିଛି। ଅନ୍ୟପଟେ ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ଆଗାମୀ ଦିନରେ ଲଘୁଚାପ ବର୍ଷା ଆସୁଥିବାରୁ ବଡ ବର୍ଷା ହେଲେ ସହରତଳି ଅଞ୍ଚଳଗୁଡିକରେ କିଭଳି ପରିସ୍ଥିତି ସୃଷ୍ଟି ହେବ ତାହା ସହଜରେ ଅନୁମେୟ। ସେହିଭଳି ସହରତଳି ଅଞ୍ଚଳ ଦେଇ ଯାଇଥିବା ବାହାନା ନାଳ ବର୍ଷା ଦିନ ପୂର୍ବରୁ ସଫେଇ ଓ ପୁନଃ ରୁଦ୍ଧାର ନ ହେବା ଫଳରେ ଆଗାମୀ ଦିନରେ ପରିସ୍ଥିତି ସଂଗୀନ ହେବ। ଫଳରେ ସହରତଳି ବାସିନ୍ଦା ଜଳବନ୍ଦୀ ଜୀବନ ବିତାଇବେ ବୋଲି କମିଟି ପକ୍ଷରୁ କୁହାଯାଇଛି। ଯଦି ମହାନଗର ନିଗମ ପକ୍ଷରୁ ସହର ତଳି ଅଞ୍ଚଳ ଗୁୁଡିକରେ ପ୍ଲାନିଂ କରାଯାଇ ଡ୍ରେନ ନିର୍ମାଣ କରାଯାଇ ସେଗୁଡିକୁ ବାହାନା ନାଳ ସହ ସଂଯୋଗୀକରଣ କରାଗଲେ ବର୍ଷା ପାଣି ବାହାନା ନାଳରେ ପ୍ରବାହିତ ହୁଅନ୍ତା। ଏଥିସହ ସହରତଳି ଅଞ୍ଚଳ ଗୁଡିକରେ ଛତୁ ଫୁଟିଲା ଭଳି ଗଢୁ ଉଠିଥିବା ବହୁତଳ ବିଶିଷ୍ଟ ଆପାର୍ଟମେଣ୍ଟ ପାଇଁ ବର୍ଷା ଜଳ ପ୍ରାକୃତିକ ନିଷ୍କାସନର ପ୍ରତିବନ୍ଧକ ଉପୁଜିଛି ବୋଲି କମିଟି କହିଛି। ତତସହିତ ବିଇଏମସି ପକ୍ଷରୁ ଯୁଦ୍ଧକାଳୀନ ଭିତ୍ତିରେ ଡ୍ରେନ ସଫେଇ କାର୍ଯ୍ୟକୁ ନିଆଯାଇଛି। ସହରତଳି ଅଞ୍ଚଳ ଏ ସବୁ ସୁବିଧାରୁ ବାଦ ପଡିଛି। ଯାହାଦ୍ୱାରା ସହରତଳି ଅଞ୍ଚଳ ବାସିନ୍ଦା ବର୍ଷା ଦିନରେ ଅନେକ ସମସ୍ୟାର ସମ୍ମୁଖୀନ ହେଉଥିବା କମିଟି ଅଭିଯୋଗ କରିଛି। ଏଣୁ ସହରତଳି ଅଞ୍ଚଳକୁ ବିଇଏମସିରେ ସାମିଲ କରାଯାଇ ଅବ୍ୟବସ୍ଥା ଡ୍ରେନର ସୁଧାର ଆଣିବା ସହ ପରିମଳ ବ୍ୟବସ୍ଥାରେ ମଧ୍ୟ ସୁଧାର ଆଣିବା ପାଇଁ ସହରତଳି ଅଞ୍ଚଳ ମିଳିତ କ୍ରିୟାନୁଷ୍ଠାନ କମିଟି ସଭାପତି ସଞ୍ଜୀବ କୁମାର ପଟ୍ଟନାୟକ ଦାବି କରିଛନ୍ତି।
