ବାଘୁଆ ପାହାଡ଼ରେ ପୁଣି ବ୍ଲାଷ୍ଟିଂ ଆରମ୍ଭ
8:10 amApril 4, 2022April 4, 2022 / 05

ଜେନାପୁର,୪ା୪(ଡି.ଏନ.ଏ.): ଧର୍ମଶାଳା ତହସିଲ ପକ୍ଷରୁ ୨୦୧୯ ସେପ୍ଟେମ୍ବର ୧୧ରେ ଜେନାପୁର ଥାନା ଅନ୍ତର୍ଗତ ମୁକୁନ୍ଦପୁର ଗ୍ରାମ ସଂଲଗ୍ନ ବାଘୁଆ ୪ନଂ. କଳାପଥର ଖାଦାନ ଉପରେ ୧୪୪ ଧାରା ଜାରି କରାଯାଇଥିଲା। ପୋଲିସ ଉପସ୍ଥିତିରେ ସେଠାରେ ନାଲି ପତାକା ଓ ସୂଚନାଫଳକ ଲଗାଯାଇ ସମ୍ପୃକ୍ତ ଖାଦାନ ଅଞ୍ଚଳକୁ ଯିବା ଦଣ୍ଡନୀୟ ଅପରାଧ ବୋଲି ଡାକବାଜି ଯନ୍ତ୍ରଦ୍ୱାରା ଘୋଷଣା କରାଯାଇଥିଲା। ଏଥିସହିତ ପ୍ରଶାସନ ପକ୍ଷରୁ ସଇରାତ ପ୍ରବେଶ ପଥକୁ ଖୋଳି ମେଶିନ ଓ ଗାଡ଼ି ଯିବା ବାଟ ବନ୍ଦ କରାଯାଇଥିଲା। କିନ୍ତୁ ପଥର ମାଫିଆମାନେ ପ୍ରଶାସନର ଏସବୁ ନିୟମକୁ ବେଖାତିର କରି ପୁଣି ବ୍ଲାଷ୍ଟିଂ ଆରମ୍ଭ କରିଛନ୍ତି। କିଛିଦିନ ହେବ ଉକ୍ତ ବେଆଇନ ଖାଦାନରେ ଦିନ ରାତି ବ୍ଲାଷ୍ଟିଂ କରାଯାଉଛି। ତେବେ ୧୪୪ ଧାରା ଜାରି ପରେ ପୋଲିସ ହେପାଜତକୁ ଯାଇଥିବା ଏହି ଖାଦାନ କିପରି ଚାଲିଲା ତାହାକୁ ନେଇ ଆଲୋଚନା ଜୋର ଧରିଛି। ବାରମ୍ବାର ଅଭିଯୋଗ ସତ୍ତ୍ୱେ ରାଜସ୍ବ ବିଭାଗ ପକ୍ଷରୁ ଆଖିଦୃଶିଆ ପଦକ୍ଷେପ ନିଆଯାଉ ନ ଥିବାରୁ ବିଭାଗର ସାଧୁତା ଉପରେ ପ୍ରଶ୍ନବାଚୀ ସୃଷ୍ଟିହୋଇଛି।
ପ୍ରଶାସନର କୋହଳ ମନୋଭାବ ଯୋଗୁ ବେଆଇନପଥର ମାଫିଆ ସକ୍ରିୟ ହୋଇ ଉଠିଛନ୍ତି। ପ୍ରତ୍ୟେକ ଦିନ ଢୋଢା ଶବ୍ଦରେ ଅଞ୍ଚଳବାସୀ ଅତିଷ୍ଠ ହୋଇପଡୁଛନ୍ତି। ବିସ୍ଫୋରଣ ଶବ୍ଦ ଓ ତୀବ୍ରତା ଯୋଗୁ ଅଞ୍ଚଳବାସୀଙ୍କ ବାସସ୍ଥାନ ପ୍ରତି ବିପଦ ସୃଷ୍ଟି ହେଉଛି। ଏପରି କି ଅଞ୍ଚଳର ବହୁ ଶ୍ରମିକଙ୍କ ଜୀବନ ମୃତ୍ୟୁମୁଖକୁ ଠେଲି ହୋଇଯାଇଛି। କିଛି ଦିନ ତଳେ ଜିଲାପାଳଙ୍କ ନିର୍ଦ୍ଦେଶକ୍ରମେ ବେଆଇନ ଭାବେ ଚାଲିଥିବା ବହୁ କ୍ରଶର ଭଙ୍ଗା ଯାଇଥିବା ବେଳେ ଏକାଧିକ କ୍ରଶରକୁ ସିଲ୍‌ କରାଯାଇଥିଲା। ତେଣୁ ବେଆଇନ ଖାଦାନ ବନ୍ଦ ପାଇଁ ପ୍ରଶାସନ ପକ୍ଷରୁ ସ୍ବତନ୍ତ୍ର ଅଭିଯାନ ଆରମ୍ଭ କରିବାକୁ ସ୍ଥାନୀୟ ଜନସାଧାରଣ ଦାବି କରିଛନ୍ତି। ଏ ସମ୍ପର୍କରେ ପ୍ରତିକ୍ରିୟା ଲାଗି ତହସିଲଦାର ସ୍ବାଗତ କୁମାର ଦାସଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ୍‌ ଉଠାଇ ନ ଥିଲେ।