ଭୁବନେଶ୍ୱର, ୩୦।୪(ବ୍ୟୁରୋ): ନାବାଳିକାଙ୍କୁ ପ୍ରେମ ଜାଲରେ ଫସାଇବା ପରେ ବ୍ଲାକ୍ମେଲ୍ କରି ଟଙ୍କା ଓ ସୁନା ଗହଣା ଲୁଟିବା ଅଭିଯୋଗରେ ନୟାପଲ୍ଲୀ ଥାନା ପୋଲିସ ଠକ ପ୍ରେମିକକୁ ଗିରଫ କରିଛି। ସେ ହେଲେ ଢେଙ୍କାନାଳ ଜିଲା ବାଲିଝାଟି ଗ୍ରାମର ଆଶିଷ କୁମାର ଜେନା (୨୧)। ତାଙ୍କଠାରୁ ୧୦୦ ଗ୍ରାମର ସୁନା ଅଳଙ୍କାର ଜବତ କରାଯାଇଛି। ଏନେଇ ପୋଲିସ ମାମଲା (ନଂ.୨୮୪/୨୨) ରୁଜୁ କରି କରିଛି। ସୂଚନାନୁଯାୟୀ, ନାବାଳିକାଙ୍କ ବୟସ ୧୪ ବର୍ଷ। ସେ ପ୍ରତିଦିନ ସା ଭ୍ରମଣରେ ନିକଟ ଖେଳ ପଡିଆକୁ ଯାଆନ୍ତି। ଅଭିଯୁକ୍ତ ଜଣକ ସବୁଦିନ ତାଙ୍କୁ ପିଛା କରିବା ପରେ ପ୍ରେମ ଜାଲରେ ଫସାଇଥିଲେ। ଧୀରେ ଧୀରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ନିବିଡି ହୋଇଥିଲା। ଭିଡିଓ କଲ୍ରେ କଥା ହେବା ଭିତରେ ଅଭିଯୁକ୍ତ ପ୍ରେମିକ ଆଶିଷ ନାବାଳିକାଙ୍କ ନଗ୍ନ ଚିତ୍ର ଓ ଭିଡିଓ ରେର୍କଡ କରିଥିଲେ। ଏହାପରେ ସେ ଉକ୍ତ ଭିଡିଓ ଜରିଆରେ ନାବାଳିକାଙ୍କୁ ବ୍ଲାକ୍ମେଲ କରିବା ସହ ଟଙ୍କା ମାଗିଥିଲେ। ଏଥିସହ ଟଙ୍କା ନ ଦେଲେ ଭିଡିଓଗୁଡିକୁ ସୋସିଆଲ ମିଡିଆରେ ପୋଷ୍ଟ କରିଦେବେ ବୋଲି ଧମକ ଦେଇଥିଲେ। ଏପରି କି ସହପାଠୀ, ପରିବାର ଓ ସମ୍ପର୍କୀୟଙ୍କ ନିକଟକୁ ପଠାଇଦେବେ ବୋଲି କହିଥିଲେ। ତେଣୁ ନାବାଳିକା ଜଣକ ଭୟରେ ପର୍ଯ୍ୟାୟକ୍ରମେ ଦେଢ ଲକ୍ଷ ଟଙ୍କା ସହ ୧୦ ଭରି ସୁନା ଦେଇଥିଲେ। ଏହାପରେ ବି ଅଭିଯୁକ୍ତ ଆଶିଷ ସମାନ ଧମକ ଦେଇ ଟଙ୍କା ମାଗି ଚାଲିଥିଲେ। ଅସହ୍ୟ ହେବାରୁ ଶେଷରେ ନାବାଳିକା ଜଣକ ଘଟଣା ସମ୍ପର୍କରେ ପରିବାର ଲୋକଙ୍କୁ ଜଣାଇଥିଲେ। ଗତ ୨୬ ତାରିଖରେ ପରିବାର ପକ୍ଷରୁ ନୟାପଲ୍ଲୀ ଥାନାରେ ଅଭିଯୋଗ ହୋଇଥିଲା।
