ଆଫ୍ରିକୀୟ-ଆମେରିକୀୟ କୃଷ୍ଣକାୟ ଜର୍ଜ ଫ୍ଲଏଡ୍ଙ୍କ ହତ୍ୟାକାରୀ ଆମେରିକା ମିନିଆପଲିସ୍ର ପୂର୍ବତନ ପୋଲିସ ଅଫିସର ଡେରେକ୍ ଚଉଭିନ୍ଙ୍କୁ ୨୬ ଜୁନ୍ରେ ମିନେସୋଟା କୋର୍ଟ ୨୨ ବର୍ଷ ୫ ମାସ ଜେଲ ଦଣ୍ଡାଦେଶ ଦେଇଛନ୍ତି। ରାୟ ପ୍ରକାଶ ପାଇବା ପରେ କୃଷ୍ଣକାୟମାନେ ଆଶ୍ୱସ୍ତି ଲାଭ କରିଛନ୍ତି। ଫ୍ଲଏଡ୍ଙ୍କ ମୃତ୍ୟୁ ପରେ ଯଦିଓ ଆହୁରି ଅନେକ କୃଷ୍ଣକାୟଙ୍କୁ ପୋଲିସ ଦ୍ୱାରା ହତ୍ୟା କରାଯାଇଛି, ତଥାପି ଚଉଭିନ୍ଙ୍କୁ ଯେଭଳି ଦଣ୍ଡିତ କରାଗଲା ନିଶ୍ଚିତ ଭାବେ ଏହା ଏକ ଦୃଷ୍ଟାନ୍ତ ସୃଷ୍ଟି କରିଦେଲା। କୁହାଯାଉଛି ରାଷ୍ଟ୍ରପତି ଜୋ ବାଇଡେନ୍ଙ୍କ ସମୟରେ ଏହା ସମ୍ଭବ ହୋଇପାରିଲା। ଅନ୍ୟପକ୍ଷରେ ଡୋନାଲ୍ଡ ଟ୍ରମ୍ପ୍ ପ୍ରଶାସନରେ ଫ୍ଲଏଡ୍ଙ୍କ ଭଳି ଅନେକ କୃଷ୍ଣକାୟଙ୍କୁ ବାରମ୍ବାର ହତ୍ୟା କରାଯାଇଛି। ହେଲେ ହତ୍ୟାକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ।
ଚଉଭିନ୍ଙ୍କୁ ଦୀର୍ଘବର୍ଷ ଦଣ୍ଡିତ କରିବା ପଛରେ ଯେଉଁ ଅଭିଯାନର ସର୍ବାଧିକ ଅବଦାନ ରହିଥିଲା, ତାହା ହେଉଛି-‘ବ୍ଲାକ୍ ଲାଇଭ୍ସ ମ୍ୟାଟର’ ବା କଳାମାନଙ୍କ ଜୀବନ ମୂଲ୍ୟରଖେ। ଫ୍ଲଏଡ୍ଙ୍କ ବେକକୁ ଚଉଭିନ୍ ପାଖାପାଖି ୧୦ ମିନିଟ୍ ଆଣ୍ଠୁରେ ଚାପି ରଖି ଯେଭଳି ଭାବେ ହତ୍ୟା କଲେ ତାହା ସଭ୍ୟ ସମାଜର ଯେକୌଣସି ବ୍ୟକ୍ତିଙ୍କୁ ବ୍ୟଥିତ କରିବା ସ୍ବାଭାବିକ। ସେହି ସମୟର ଭିଡିଓ ସୋସିଆଲ ମିଡିଆରେ ପ୍ରସାରିତ ହେବା ପରେ ଶ୍ୱେତାଙ୍ଗମାନେ ମଧ୍ୟ ତାହାକୁ ବିରୋଧ କରିଥିଲେ। ଭାରତରେ ଏହିଭଳି ପୋଲିସ ବିରୋଧୀ ରାୟ ଆଶା କରିବା ବୃଥା। ତତ୍ସହିତ ଏକବର୍ଷ ପୂରୁଣୁ ଏଭଳି ଘଟଣାରେ ରାୟ ପ୍ରକାଶ ପାଇବା ଭାରତୀୟଙ୍କୁ ଆଶ୍ଚର୍ଯ୍ୟ କରୁଥିବ। ଚଉଭିନ୍ଙ୍କୁ ଯେଭଳି ଦଣ୍ଡିତ କରାଯାଇଛି, ତାହା କୃଷ୍ଣକାୟଙ୍କ ପ୍ରତି ଥିବା ଆକ୍ରମଣକୁ ପ୍ରଶମିତ କରିବାରେ ସହାୟକ ହୋଇପାରେ ବୋଲି କୁହାଯାଇପାରେ। ଏଥିସହିତ ଏହି ରାୟ ଦ୍ୱାରା ଆମେରିକା ତା’ର ନ୍ୟାୟିକ ବ୍ୟବସ୍ଥାକୁ ସୁଦୃଢ଼ କରିପାରିଛି। ୨୮ ଜୁନ୍ରେ ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ୍ ଆହ୍ବାନ ଦେଇଛନ୍ତି ଯେ, ଫ୍ଲଏଡ୍ଙ୍କ ହତ୍ୟା ଭଳି ବାରମ୍ବାର ଘଟୁଥିବା ଘଟଣାକୁ ଦୂରେଇ ଦେବା ସକାଶେ ବିଶ୍ୱବ୍ୟାପୀ କୃଷ୍ଣକାୟଙ୍କ ବିରୋଧରେ ଦେଖାଦେଉଥିବା ବିଧିବଦ୍ଧ ବର୍ଣ୍ଣବୈଷମ୍ୟକୁ ତୁରନ୍ତ ଭାଙ୍ଗିଦିଆଯାଉ। ଏଭଳି ପରିପ୍ରେକ୍ଷୀରେ ଭାରତର ଉଦାହରଣକୁ ଦେଖାଯାଉ। ସମସ୍ତେ ଜାଣିଛନ୍ତି ଯେ, ହିନ୍ଦୁ ସମାଜରେ ଜାତିଆଣଭାବ ପ୍ରବଳମାତ୍ରାରେ ରହିଛି। ସେହି ମାନସିକତାକୁ ସନ୍ତୁଳିତ କରିବା ସକାଶେ ସଂରକ୍ଷଣଠାରୁ ଆରମ୍ଭକରି ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟକ୍ରମ ଦୀର୍ଘଦିନ ଧରି ଚାଲିଆସିଛି। ଉଚ୍ଚବର୍ଗର ଅଧିକାଂଶ ଲୋକ ଏହାକୁ ତୀବ୍ର ଭାବେ ସମାଲୋଚନା କରୁଥିବା ବେଳେ ନିଜର ଦୈନନ୍ଦିନ ଜୀବନରେ ଆଭିମୁଖ୍ୟ ପରିବର୍ତ୍ତନ କରିବାକୁ ଚେଷ୍ଟା କରୁନାହାନ୍ତି। ସେଥିପାଇଁ ଏବେ ମଧ୍ୟ ଦଳିତ ମହିଳା ଓ ଯୁବତୀଙ୍କ ଉପରେ ପାଶବିକ ଅତ୍ୟାଚାର ଏବଂ ପୁରୁଷଙ୍କୁ ସାଧାରଣରେ ଶାରୀରିକ ନିର୍ଯାତନା ଓ ହତ୍ୟା କରାଯିବା ଘଟଣା ବାରମ୍ବାର ଦେଖିବାକୁ ମିଳୁଛି। ସେହିଭଳି ବର୍ଣ୍ଣବୈଷମ୍ୟ କେବଳ ଗୋରାଙ୍କ ଦେଶରେ ସୀମିତ ନାହିଁ। ଆଫ୍ରିକା ଓ ଏସିଆ ମହାଦେଶରେ ପରସ୍ପରକୁ ଘୃଣା କରୁଥିବା ବିଭିନ୍ନ ଗୋଷ୍ଠୀ ସବୁବେଳେ ରହିଆସିଛନ୍ତି। ଜାତିସଂଘର ମହାସଚିବଙ୍କ ଦ୍ୱାରା ଦିଆଯାଇଥିବା ବର୍ଣ୍ଣବିଦ୍ୱେଷ ଭଙ୍ଗାଯାଉ ଡାକରା ସମ୍ପୂର୍ଣ୍ଣ ଅର୍ଥହୀନ ହୋଇଯାଉଛି। ଏହା ଏକ ପିଢ଼ିଗତ ମନୋଭାବ ହୋଇଥିବାରୁ ଏହାକୁ କୌଣସି ଆଇନ ଦ୍ୱାରା ଭାଙ୍ଗି ହେବ ନାହିଁ।
