ନୂଆଦିଲ୍ଲୀ,୨୪।୯: ରାହୁଲ ଗାନ୍ଧୀଙ୍କ ଅଭିଯୋଗର ଜବାବରେ ଭାଜପା ପ୍ରତିକ୍ରିୟା ରଖିଛି। ଭାଜପା ମୁଖପାତ୍ର ତଥା ରାଜ୍ୟ ସଭା ଏମପି ସୁଧାଂଶୁ ତ୍ରିବେଦୀ କହିଛନ୍ତି ଯେ ଏହି ଦାବି ଏକ ଖବର ରିପୋର୍ଟ ଉପରେ ଆଧାରିତ। ସେ ପ୍ରଶ୍ନ କରିଥିଲେ ଯେ ଉକ୍ତ ରିପୋର୍ଟରେ କୌଣସି ନିର୍ବାଚନ କମିଶନରଙ୍କ ସିଧାସଳଖ ବୟାନ ରହିଛି କି? ଏଭଳି କୌଣସି ବୟାନ ନଥିବା ଦର୍ଶାଇ ସେ ପ୍ରଶ୍ନ ଉଠାଇଥିଲେ ଯେ ନିର୍ବାଚନ କମିଶନରମାନେ ଏଭଳି ମନ୍ତବ୍ୟ ଦେଇଛନ୍ତି ବୋଲି କୁହାଯାଉଥିବା ଦାବିର ଆଧାର କ’ଣ।
ସୁଧାଂଶୁ ତ୍ରିବେଦୀ ଗଣମାଧ୍ୟମର ସ୍ବାଧୀନତା ପ୍ରତି ନିଜର ସମ୍ମାନ ପ୍ରକାଶ କରିଥିଲେ। ତଥାପି, ସେ ଉଲ୍ଲେଖ କରିଥିଲେ ଯେ ସାମ୍ବାଦିକତାର ସାଧାରଣ ନିୟମ ଅନୁଯାୟୀ ସମ୍ପୃକ୍ତ ବ୍ୟକ୍ତିଙ୍କୁ ପ୍ରଶ୍ନ ପଚରାଯାଇଥାଏ, କିନ୍ତୁ ଉକ୍ତ ରିପୋର୍ଟରେ ସେଭଳି କୌଣସି ବୟାନ ନଥିଲା। ସେ ପଚାରିଥିଲେ ଯେ ସର୍ବସମ୍ମତି ବିନା କୌଣସି ନିଷ୍ପତ୍ତି ନିଆଯାଇଥିବା ନେଇ କୌଣସି ରିପୋର୍ଟ ଅଛି କି, କିମ୍ବା ଏପରି କୌଣସି ସାମ୍ବାଦିକ ସମ୍ମିଳନୀ ହୋଇଛି କି ଯେଉଁଥିରେ ତିନିଜଣ ନିର୍ବାଚନ କମିଶନର ଉପସ୍ଥିତ ନଥିଲେ? ଏଭଳି ପରିସ୍ଥିତି କେବେବି ଉପୁଜି ନାହିଁ। ସୁଧାଂଶୁ ମନ୍ତବ୍ୟ ଦେଇଥିଲେ ଯେ ରାହୁଲ ଗାନ୍ଧୀଙ୍କର ଭାରତୀୟ ରାଜନୀତି ସମ୍ପର୍କରେ ବୁଝାମଣା ଅଭାବ ରହିଛି। ସେ ଉଲ୍ଲେଖ କରିଥିଲେ ଯେ ରାହୁଲ ଗାନ୍ଧୀ ‘ଆଣ୍ଟି-ଇନକମ୍ବେନ୍ସି’ (ସରକାର ବିରୋଧୀ ଲହର) ବିଷୟରେ କହୁଥିବା ବେଳେ, ସେ ଏହା ବୁଝିବାରେ ବିଫଳ ହେଉଛନ୍ତି ଯେ ବଙ୍ଗଳା, ବିହାର ଏବଂ ଓଡ଼ିଶା ଭଳି ରାଜ୍ୟରେ କଂଗ୍ରେସ ଦଳ ଦଶନ୍ଧି ଧରି କ୍ଷମତାକୁ ଫେରିପାରି ନାହିଁ।
ସୁଧାଂଶୁ ତ୍ରିବେଦୀ ରାହୁଲ ଗାନ୍ଧୀଙ୍କ ସେହି ଦାବିର ମଧ୍ୟ କଡ଼ା ଜବାବ ଦେଇଛନ୍ତି ଯେଉଁଥିରେ କୁହାଯାଇଥିଲା ଯେ ‘ଆଣ୍ଟି-ଇନକମ୍ବେନ୍ସି’ (ସରକାର ବିରୋଧୀ ଲହର) ଯୋଗୁଁ ଭାଜପା ଯୁଗର ଆରମ୍ଭ ହୋଇଥିଲା। ତ୍ରିବେଦୀଙ୍କ ମତରେ, ଏହାକୁ ଭାଜପାର ଉତ୍ଥାନ ସହ ଯୋଡ଼ିବା ରାଜନୈତିକ ବୁଝାମଣାର ଅଭାବକୁ ସୂଚିତ କରେ। ଇତିହାସ ସାକ୍ଷୀ ଅଛି ଯେ ୧୯୬୭ ମସିହାରୁ କଂଗ୍ରେସ ତାମିଲନାଡୁରେ କ୍ଷମତାକୁ ଫେରିପାରି ନାହିଁ, ଯେଉଁ ସମୟରେ ଭାଜପାର ଅସ୍ତିତ୍ୱ ମଧ୍ୟ ନଥିଲା। ସେହିଭଳି, ୧୯୭୭ ମସିହାରୁ କଂଗ୍ରେସ ପଶ୍ଚିମବଙ୍ଗରେ କ୍ଷମତାକୁ ଫେରିପାରି ନାହିଁ, ଯେଉଁ ରାଜ୍ୟରେ କ୍ରମାଗତ ୩୪ ବର୍ଷ (୧୯୭୭-୨୦୧୧) ଧରି କମ୍ୟୁନିଷ୍ଟମାନେ ଶାସନ କରିଥିଲେ। ବିହାରରେ ମଧ୍ୟ ୧୯୯୦ ମସିହାରୁ କଂଗ୍ରେସ କ୍ଷମତା ବାହାରେ ରହିଆସିଛି ଏବଂ ସେଠାରେ ଲାଲୁ ଯାଦବଙ୍କ ନେତୃତ୍ୱରେ କ୍ରମାଗତ ତିନି କାର୍ଯ୍ୟକାଳ ପାଇଁ ସରକାର ଗଠିତ ହୋଇଥିଲା। ଏପରିକି ଉତ୍ତର ପ୍ରଦେଶରେ ମଧ୍ୟଯାହାକୁ ଗାନ୍ଧୀ ପରିବାରର ଗଡ଼ ବୋଲି ବିବେଚନା କରାଯାଏ।ଜକଂଗ୍ରେସ ୧୯୮୯ ମସିହାରୁ ସରକାର ଗଠନ କରିବାରେ ବିଫଳ ହୋଇଛି।
ସେ ଆହୁରି ମଧ୍ୟ କହିଛନ୍ତି ଯେ, କଂଗ୍ରେସର ଦୀର୍ଘକାଳୀନ ଶାସନ ସମୟରେ ନା ଭୋଟର ପରିଚୟ ପତ୍ର ଥିଲା ନା ନିର୍ବାଚନ ପ୍ରକ୍ରିୟାରେ ସ୍ବଚ୍ଛତା; ବୁଥ ଦଖଲ, ବାଲଟ ବକ୍ସ ଲୁଟ ଏବଂ ନିର୍ବାଚନଜନିତ ହିଂସା ଭଳି ଘଟଣା ସେତେବେଳେ ସାଧାରଣ କଥା ଥିଲା। ଉତ୍ତର ପ୍ରଦେଶ ଏବଂ ବିହାରରେ ଅନେକ ନିର୍ବାଚନ ସମୟରେ ବ୍ୟାପକ ହିଂସାକାଣ୍ଡ ଘଟିଥିଲା, ଯେଉଁଥିରେ ଧନଜୀବନର କ୍ଷୟକ୍ଷତି ହୋଇଥିଲା। ସେହି ସମୟରେ କଂଗ୍ରେସ ବିରୋଧୀ ଜନଅସନ୍ତୋଷ ବା ’ଆଣ୍ଟି-ଇନକମ୍ବେନ୍ସି’ ଲହର ବିଶେଷ ପ୍ରଭାବ ପକାଇପାରି ନଥିଲା। ତଥାପି, ଯେତେବେଳେ କେନ୍ଦ୍ରୀୟ ଅର୍ଦ୍ଧ-ସାମରିକ ବାହିନୀର ମୁତୟନ, ସିସିଟିଭି (CCTV) ନଜରଦାରି, ଲାଇଭ ଫୁଟେଜ ଏବଂ ଗଣମାଧ୍ୟମ ତଥା ନ୍ୟାୟପାଳିକାର ବର୍ଦ୍ଧିତ ସ୍ବାଧୀନତା ମାଧ୍ୟମରେ ନିର୍ବାଚନ ପ୍ରକ୍ରିୟା ଅଧିକ ସ୍ବଚ୍ଛ ହେବାକୁ ଲାଗିଲା, ସେତେବେଳେ କଂଗ୍ରେସ ପାଇଁ କ୍ଷମତାକୁ ଫେରିବା ଅତ୍ୟନ୍ତ କଷ୍ଟକର ହୋଇପଡ଼ିଲା।
