ବ୍ରହ୍ମପୁର ଅଫିସ,୩୧।୫: ଦଳରେ ଗୋଷ୍ଠୀ ବିବାଦ ଯୋଗୁ ଭାଜପାର ଜନ ସମ୍ପର୍କ ଅଭିଯାନ ବାତିଲ ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କେନ୍ଦ୍ର ସରକାର ମଙ୍ଗଳବାର ୯ ବର୍ଷ ପୂର୍ତ୍ତି ହୋଇଛି। ତେଣୁ ମେ ୩୦ରୁ ମାସେ ବ୍ୟାପୀ ଗଞ୍ଜାମ ଜିଲା ଭାଜପା ପକ୍ଷରୁ ସବୁ ମଣ୍ଡଳସ୍ତରରେ ଜନସମ୍ପର୍କ ପଦଯାତ୍ରା ଜରିଆରେ ମୋଦୀ ସରକାରଙ୍କ କଲ୍ୟାଣକାରୀ ଯୋଜନା ସମ୍ପର୍କରେ ଘରକୁ ଘର ଯାଇ ଲୋକଙ୍କୁ ଅବଗତ କରାଇବା ଏବଂ ବିଜେଡି ଶାସନର ବିଫଳତା ନେଇ ସଚେତନ କରାଯିବା ନେଇ ଗତ ୨୩ ତାରିଖରେ ବ୍ରହ୍ମପୁରରେ ଅନୁଷ୍ଠିତ ଜିଲା କାର୍ଯ୍ୟକାରିଣୀ ବୈଠକରେ ନିଷ୍ପତ୍ତି ନିଆଯାଇଥିଲା। ତେବେ ଗତ ରବିବାର ରାଜ୍ୟ ସଭାପତିଙ୍କ ଗସ୍ତ ଅବସରରେ ଗୋଷାଣୀ ନୂଆଗାଁରେ ଘଟିଥିବା ଆଭ୍ୟନ୍ତରୀଣ କନ୍ଦଳ ଏବେ ଉଗ୍ରରୂପ ନେଇଥିବାରୁ ଆରମ୍ଭ ହେବାକୁ ଥିବା ଅଭିଯାନ ବନ୍ଦ ରଖାଯାଇଥିବା ମିଡିଆ ପ୍ରଭାରୀଙ୍କ ପକ୍ଷରୁ କୁହାଯାଇଛି। ଜିଲା ସଭାପତି ବିଭୂତି ଜେନା ଏଯାବତ୍ ୨୭ନଂ ୱାର୍ଡ କର୍ପୋରେଟର ନୀଳକଣ୍ଠ ସାହୁଙ୍କ ବିରୋଧରେ ଅଭିଯୋଗ କରିନାହାନ୍ତି। ଅପରପକ୍ଷରେ କର୍ପୋରେଟର ସାହୁ ସୋମବାର ଥାନାରେ ଏକ ଅଭିଯୋଗ କରିଥିଲେ। ପୋଲିସ ଜିଲା ଭାଜପା ସଭାପତି ସମେତ ଅନ୍ୟାନ୍ୟ ନେତାଙ୍କ ନାମରେ ମାମଲା ରୁଜୁ କରିଛି। ନିଜ ଜୀବନ ପ୍ରତି ବିପଦ ଥିବାରୁ ସୁରକ୍ଷା ପାଇଁ ମଙ୍ଗଳବାର ଏସପି ଡା. ଶ୍ରବଣା ବିବେକ ଏମ୍.ଙ୍କୁ ସାକ୍ଷାତ କରି ଗୁହାରି ଜଣାଇଛନ୍ତି। ଏନେଇ ଏସ୍ପି କହିଛନ୍ତି, ଏହି ଘଟଣାକୁ ନେଇ ଦୁଇଟି ମାମଲା ରୁଜୁ ହୋଇଛି। ଏହାର ତଦନ୍ତ ଭାର ଜଣେ ଉଚ୍ଚପଦସ୍ଥ ଅଧିକାରୀଙ୍କ ଦ୍ୱାରା କରାଯିବ। ତେବେ ବିଇଏମସି ନିର୍ବାଚିତ ଅନ୍ୟ ୬ କର୍ପୋରେଟର ଯାଇନଥିବା ବେଳେ ବିଜେଡି ୧୫ରୁ ଊର୍ଦ୍ଧ୍ୱ କର୍ପୋରେଟର ନୀଳକଣ୍ଠଙ୍କୁ ସମର୍ଥନ ଜଣାଇ ଏସପିଙ୍କ ଦପ୍ତରକୁ ଯାଇଥିବା ରାଜନୈତିକ ଚର୍ଚ୍ଚାର ବିଷୟ ପାଲଟିଛି। ଭାଜପା ଆଭ୍ୟନ୍ତରୀଣ କନ୍ଦଳରେ ବିଜେଡି କର୍ପୋରେଟରମାନେ ପଶିବା ଘଟଣାକୁ ଜିଲା ସଭାପତି ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ପସନ୍ଦ କରିନାହାନ୍ତି। ଏସପିଙ୍କୁ ଭେଟିସାରି ନୀଳକଣ୍ଠ ଏବଂ ବିଜେଡି କର୍ପୋରେଟରମାନେ ବିଧାୟକ ବିକ୍ରମ ପଣ୍ଡାଙ୍କ ବାସଭବନକୁ ଯିବା ଆଉ ଏକ ରୋଚକ ରାଜନୀତି ହୋଇଛି। ମଙ୍ଗଳବାର କର୍ମୀଙ୍କ ବୈଠକ ଅନୁଷ୍ଠିତ ହୋଇ ନୀଳକଣ୍ଠଙ୍କ ବିରୋଧରେ ଦଳୀୟ ଶୃଙ୍ଖଳାଗତ ଗ୍ରହଣ କରାଯିବାର ନିଷ୍ପତ୍ତି ନିଆଯାଇଛି। ପରେ ବିଭୂତି ଓ କାହ୍ନୁ ଚରଣ ପତି ରାଜ୍ୟ ସଭାପତିଙ୍କୁ ଭେଟିବା ପାଇଁ ଭୁବନେଶ୍ୱର ଯାଇଛନ୍ତି। କର୍ପୋରେଟରଙ୍କୁ ଦଳରୁ ବିତାଡ଼ିତ କରିବାକୁ ଜିଲା ସଂଗଠନ ଦାବି କରିଛି। ରାଜ୍ୟ ସଂଗଠନ ଚୂଡ଼ାନ୍ତ ନିଷ୍ପତ୍ତି ନେବା ପର୍ଯ୍ୟନ୍ତ ଜନ ସମ୍ପର୍କ ଅଭିଯାନ ବନ୍ଦ ରହିଥିବା ଜିଲା ସଂଗଠନର ମୁଖପାତ୍ର ସୂଚନା ଦେଇଛନ୍ତି।
