ନୂଆଦିଲ୍ଲୀ,୧୦ା୧୧ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ଉନ୍ମୋଚିତ ଜି୨୦ ପ୍ରେସିଡେନ୍ସି ଲୋଗୋରେ ଥିବା ପଦ୍ମଫୁଲକୁ ନେଇ ବିବାଦ ସୃଷ୍ଟି ହୋଇଛି। ଭାଜପାର ନିର୍ବାଚନୀ ଚିହ୍ନ ପଦ୍ମ ହୋଇଥିବାରୁ କଂଗ୍ରେସ ଏହାକୁ କଡ଼ା ସମାଲୋଚନା କରିଛି। ଶାସକ ଦଳ ଏଥିରେ ନିଜକୁ ନିର୍ଲଜ ଭାବେ ପ୍ରମୋଟ୍ କରୁଛି। ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ଏକଦା ଏଭଳି ଉଦ୍ୟମକୁ ପ୍ରତ୍ୟାଖ୍ୟାନ କରିଦେଇଥିଲେ ବୋଲି ବରିଷ୍ଠ କଂଗ୍ରେସ ନେତା ଜୟରାମ ରମେଶ କହିଛନ୍ତି।
ଜି୨୦ ବା ଗ୍ରୁପ୍ ଟ୍ବେଣ୍ଟି ହେଉଛି ୧୯ଟି ଦେଶ ଏବଂ ୟୁରୋପୀୟ ସଂଘ (ଇୟୁ)କୁ ନେଇ ଗଠିତ ଏକ ଆନ୍ତଃ ସରକାରୀ ମଞ୍ଚ। ଆମେରିକା, ଅଷ୍ଟ୍ରେଲିଆ, ସାଉଦି ଆରବ, କାନାଡା, ଭାରତ, ରୁଷିଆ, ଦକ୍ଷିଣ ଆଫ୍ରିକା, ତୁର୍କୀ, ଆର୍ଜେଣ୍ଟିନା, ବ୍ରାଜିଲ, ମେକ୍ସିକୋ, ଫ୍ରାନ୍ସ, ଜର୍ମାନୀ, ଇଟାଲୀ, ବ୍ରିଟେନ, ଚାଇନା, ଇଣ୍ଡୋନେସିଆ, ଜାପାନ ଓ କୋରିଆ ହେଉଛନ୍ତି ଜି୨୦ର ସଦସ୍ୟ ରାଷ୍ଟ୍ର। ଅନ୍ତର୍ଜାତୀୟ ଆର୍ଥିକ ସ୍ଥିରତା, ଜଳବାୟୁ ପରିବର୍ତ୍ତନର ମୁକାବିଲା ଓ ନିରନ୍ତର ବିକାଶ ଭଳି ବିଶ୍ୱ ଅର୍ଥନୀତି ସମ୍ପର୍କିତ ପ୍ରସଙ୍ଗଗୁଡ଼ିକୁ ନେଇ ଏହି ରାଷ୍ଟ୍ର ସମୂହ କାର୍ଯ୍ୟ କରିଥାଏ। ଏଥିରେ ବିକଶିତ ଓ ବିକାଶଶୀଳ ରାଷ୍ଟ୍ର ସମେତ ସର୍ବବୃହତ୍ ଅର୍ଥନୀତିଗୁଡ଼ିକୁ ସାମିଲ କରାଯାଇଛି। ମୋଟ ବିଶ୍ୱ ଉତ୍ପାଦ (ଜିଡବ୍ଲ୍ୟୁପି)ରେ ଏହି ରାଷ୍ଟ୍ରଗୁଡ଼ିକର ଅବଦାନ ହେଉଛି ପ୍ରାୟ ୮୦%।
ବର୍ତ୍ତମାନ ଜି୨୦ର ଅଧ୍ୟକ୍ଷତା ଇଣ୍ଡୋନେସିଆ ନିକଟରେ ଥିବାବେଳେ ନଭେମ୍ବର ୧୫ ଓ ୧୬ରେ ପ୍ରଧାନମନ୍ତ୍ରୀ ମୋଦି ବାଲିରେ ହେବାକୁ ଥିବା ସମ୍ମିଳନୀରେ ଯୋଗଦେବେ। ଭାରତ ଆସନ୍ତା ଡିସେମ୍ବର ୧ରୁ ଏଥିରେ ଅଧ୍ୟକ୍ଷତା କରିବାକୁ ଯାଉଛି। ନିଜ ଅଧ୍ୟକ୍ଷତା ଅବଧି ମଧ୍ୟରେ ଭାରତ ଆସନ୍ତା ବର୍ଷ ଜି୨୦ ସମିଟ୍ ସମେତ ଦେଶର ବିଭିନ୍ନ ସ୍ଥାନରେ ୩୨ଟି ବିଭିନ୍ନ କ୍ଷେତ୍ର ଉପରେ ୨୦୦ ବୈଠକ ଆୟୋଜନ କରିବ। ଏଥିପାଇଁ ପ୍ରଧାନମନ୍ତ୍ରୀ ମୋଦି ମଙ୍ଗଳବାର ନୂଆଦିଲ୍ଲୀରେ ଭାରତର ଜି୨୦ ପ୍ରେସିଡେନ୍ସି ଲୋଗୋ, ଥିମ୍ ଓ ଓ୍ବେବ୍ସାଇଟ୍ ଉନ୍ମୋଚନ କରିଛନ୍ତି। ‘ବସୁଧୈବ କୁଟୁମ୍ବକମ୍’ ନୀତି ଭାରତର ଦୟାଭାବର ସ୍ବାକ୍ଷର। ଏଥିସହିତ ଲୋଗୋରେ ରହିଥିବା ପଦ୍ମ ବିଶ୍ୱକୁ ଏକାଠି କରିବାରେ ଭାରତର ସାଂସ୍କୃତିକ ଐତିହ୍ୟ ଏବଂ ବିଶ୍ୱାସକୁ ଚିତ୍ରଣ କରୁଛି ବୋଲି ଏହି ଅବସରରେ ପ୍ରଧାନମନ୍ତ୍ରୀ କହିଥିଲେ।
ଲୋଗୋର ରୂପରେଖ ପାଇଁ ପ୍ରସ୍ତାବ ଦେବାକୁ ଦେଶବାସୀଙ୍କୁ ଅନୁରୋଧ କରାଯାଇଥିଲା। ସେହି ପ୍ରସ୍ତାବଗୁଡ଼ିକ ଆଧାରରେ ଏହି ଲଗୋ ପ୍ରସ୍ତୁତ କରାଯାଇଥିବା ମୋଦି କହିଥିଲେ। ତେବେ ଉକ୍ତ ଲୋଗୋରେ ଭାଜପାର ନିର୍ବାଚନୀ ଚିହ୍ନ ପଦ୍ମକୁ ନେଇ ବିରୋଧୀ ଦଳଗୁଡ଼ିକ ପ୍ରଶ୍ନ ଉଠାଇଛନ୍ତି। କଂଗ୍ରେସ ନେତା ଜୟରାମ ରମେଶ କହିଛନ୍ତି, ପ୍ରାୟ ୭୦ ବର୍ଷ ତଳେ ନେହେରୁ କଂଗ୍ରେସ ପତାକାକୁ ଭାରତର ଜାତୀୟ ପତାକା କରିବା ନେଇ ରହିଥିବା ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲେ।
ବର୍ତ୍ତମାନ ଭାଜପାର ନିର୍ବାଚନୀ ଚିହ୍ନକୁ ଜି୨୦ରେ ଭାରତର ପ୍ରେସିଡେନ୍ସି ପାଇଁ ଉଦ୍ଦିଷ୍ଟ ଲୋଗୋରେ ବ୍ୟବହାର କରାଯାଇଛି। ମୋଦି ଏବଂ ଭାଜପା ନିଜକୁ ପ୍ରୋତ୍ସାହିତ କରିବା ପାଇଁ କୌଣସି ସୁଯୋଗକୁ ହାତଛଡ଼ା କରିବାକୁ ଚାହୁଁ ନାହାନ୍ତି। ଏହା ଏକ ଲଜ୍ଜାଜନକ ବିଷୟ। ଏହାର ଜବାବରେ ଭାଜପା ମୁଖପାତ୍ର ଶେହଜାଦ ପୁନାଓ୍ବାଲା କହିଛନ୍ତି, ପଦ୍ମ ହେଉଛି ଆମ ଜାତୀୟ ଫୁଲ। ଏହା ମା’ ଲକ୍ଷ୍ମୀଙ୍କ ଆସନ ମଧ୍ୟ। କମଲ ନାଥଙ୍କ ନାମରୁ କମଲକୁ ବାଦ୍ ଦେଇପାରିବ କି? ରାଜୀବର ଅର୍ଥ ହେଉଛି ପଦ୍ମ। ତେଣୁ ଏଥିରେ କୌଣସି ଏଜେଣ୍ଡା ଦେଖାଯିବା ଅନୁଚିତ।
