ଖଇରା, ୨୭ା୧(ଡି.ଏନ.ଏ.): ବାଲେଶ୍ୱର ଜିଲା ଅଧୀନ ଖଇରା ବ୍ଲକରେ ପ୍ରଧାନମନ୍ତ୍ରୀ ଆବାସ ଯୋଜନାରୁ ବହୁ ଯୋଗ୍ୟ ଅସହାୟ ଗରିବ ବ୍ୟକ୍ତି ବାଦ୍ ପଡିବା ଘଟଣାକୁ ନେଇ ଭାଜପା ଆନ୍ଦୋଳନକୁ ଓହ୍ଲାଇଛି। ଶୁକ୍ରବାର ଖଇରା ବ୍ଲକ ସମ୍ମୁଖରେ ସୋର-କୁପାରୀ ରାଜ୍ୟ ରାଜପଥରେ ହକ୍ ପାଇଁ ବ୍ଲକଠାରୁ ଆରମ୍ଭ କରି ରାଜ୍ୟ ନେତାଏ ଗର୍ଜନ କରିଛନ୍ତି । ଏଥିପାଇଁ ୨୦୧୯ ମସିହାରେ ବ୍ଲକ ପ୍ରଶାସନ ତରଫରୁ କରାଯାଇଥିବା ସର୍ଭେରେ ପାତରଅନ୍ତର କରି ଦଳୀୟ ଭିତ୍ତିରେ କଟାଯୋଡା କରାଯାଇଛି। ଭାଜପା ସମର୍ଥିତ ଗରିବ ଲୋକମାନଙ୍କୁ ବାଦ୍ ଦିଆଯାଇଥିବା ନେତୃବୃନ୍ଦ ଅଭିଯୋଗ ଆଣି ସିଧାସଳଖ ଶାସକଦଳକୁ ଟାର୍ଗେଟ କରିଥିବା ବେଳେ ବ୍ଲକ ପ୍ରଶାସନ ମୁଖ୍ୟଙ୍କୁ ଶାସକ ଦଳ ଏଜେଣ୍ଟ ବୋଲି କହିବାକୁ ପଛାଇନାହାନ୍ତି। ସେହିଭଳି ବର୍ତ୍ତମାନ ଖଇରା ବ୍ଲକରେ ଚାଲିଥିବା ୫-ଟି କାର୍ଯ୍ୟରେ ବ୍ୟାପକ ଦୁର୍ନୀତି ଚାଲିଛି। ପ୍ରଥମେ ଭାଜପା କର୍ମୀଙ୍କର ବିଶାଳ ଶୋଭାଯାତ୍ରା ଦୁର୍ଗାମଣ୍ଡପରୁ ବାହାରି ବ୍ଲକ ସମ୍ମୁଖରେ ପହଞ୍ଚିଥିଲା। ପରେ କର୍ମୀମାନେ ଗେଟ ଖୋଲି ବ୍ଲକ ଭିତରକୁ ଯିବାକୁ ଚେଷ୍ଟା କରୁଥିବା ବେଳେ ଖଇରା ପୋଲିସ ସେମାନଙ୍କୁ ବାଧା ଦେଇଥିଲା। ବ୍ଲକ ଗେଟ ସମ୍ମୁଖରେ ବ୍ଲକ ଅଧ୍ୟକ୍ଷା ଅଭିଲିପ୍ସା ସାହୁଙ୍କ ପୌରୋହିତ୍ୟରେ ଆୟୋଜିତ ପ୍ରତିବାଦ ସଭାରେ ପୂର୍ବତନ ମନ୍ତ୍ରୀ ପଦ୍ମଲୋଚନ ପଣ୍ଡା, ଅଭିମନ୍ୟୁ ସେଠୀ, ଜିଲା ମହିଳା ମୋର୍ଚ୍ଚା ସଭାପତି ମନୀଷା ଚନ୍ନୟୀ ବେହେରା, ଜିଲା ପରିଷଦ ସଭ୍ୟ ଗଜେନ୍ଦ୍ର ପ୍ରସାଦ ଦାସ, ଯୁବ ନେତା ନୀଳମାଧବ ପଣ୍ଡା, ଅଣୁମାଧବ ପଣ୍ଡା, ଖଇରା ମଣ୍ଡଳ ସଭାପତି ରାଜେଶ କୁମାର ରାଉତ, ସାଧାରଣ ସମ୍ପାଦକ ନୀଳାମ୍ବର ପଣ୍ଡା, କୈଳାସ ମାଝି, ମୀନାକ୍ଷୀ ମହାପାତ୍ର, ସନ୍ତୋଷ ଶତପଥି, ପତିତପାବନ କର, ସୁଣ୍ଢିରା ସରପଞ୍ଚ ମମତାରାଣୀ ପରିଡା, ବୁଲୁ ଲେଙ୍କା, ପ୍ରଶାନ୍ତ ବେହେରା ଓ ଦୟାନଧି ନାୟକ ପ୍ରମୁଖ ବକ୍ତବ୍ୟ ରଖିଥିଲେ। ବିଡିଓ ପର୍ଶୁରାମ ପଣ୍ଡାସଭା ମଞ୍ଚ ନିକଟକୁ ଆସି ସ୍ମାରକପତ୍ର ଗ୍ରହଣ କରି ପୁଣି ଥରେ ଯାଞ୍ଚ କରି ଯୋଗ୍ୟ ହିତାଧିକାରୀଙ୍କ ନାମ ଯୋଡିବାକୁ ପ୍ରତିଶ୍ରୁତି ଦେଇଥିଲେ।
