ଓ୍ବାଶିଂଟନ୍,୧୬।୯: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ସଦିଚ୍ଛା(Goodwill) ପ୍ରଦର୍ଶନକୁ ପ୍ରଶଂସା କରିଛନ୍ତି। ଟ୍ରମ୍ପଙ୍କ ପ୍ରଶଂସା ଇରାନ ଜଣେ ଆମେରିକୀୟ ମହିଳାଙ୍କୁ ମୁକ୍ତ କରିବା ପରେ କରିଥିଲେ। ମହିଳା ଜଣଙ୍କ ଡିସେମ୍ବର ୨୦୨୪ରୁ ପ୍ରାୟ ଦେଢ଼ ବର୍ଷ ଧରି ଇରାନରେ ଅଟକ ଥିଲେ।
ଟ୍ରୁଥ ସୋସିଆଲରେ ଏକ ପୋଷ୍ଟରେ ଟ୍ରମ୍ପ ଇରାନର ପ୍ରଶଂସା କରି କହିଛନ୍ତି, ଇରାନ ଜଣେ ଆମେରିକୀୟ ନାଗରିକଙ୍କୁ ଦେଶ ଛାଡିବାକୁ ଅନୁମତି ଦେଇଛି। ତାଙ୍କୁ ଡିସେମ୍ବର ୨୦୨୪ରେ ଜୋ ବାଇଡେନଙ୍କ ରାଷ୍ଟ୍ରପତିତ୍ୱ ସମୟରେ ଭୁଲ ଭାବରେ ଅଟକ ରଖାଯାଇଥିଲା। ସେ ବର୍ତ୍ତମାନ ସୁରକ୍ଷିତ ଭାବରେ ଇରାନରୁ ବାହାରକୁ ଆସିଛନ୍ତି। ଆମେରିକା ଇରାନର ଏହି ସଦିଚ୍ଛା ପ୍ରଦର୍ଶନକୁ ପ୍ରଶଂସା କରୁଛି!
ତାଙ୍କ ପୋଷ୍ଟରେ, ଡୋନାଲ୍ଡ ଟ୍ରମ୍ପ ପୂର୍ବତନ ଆମେରିକୀୟ ରାଷ୍ଟ୍ରପତି ଜୋ ବାଇଡେନଙ୍କୁ ମଧ୍ୟ ଟାର୍ଗେଟ କରିଛନ୍ତି। ଟ୍ରମ୍ପ ଉଲ୍ଲେଖ କରିଛନ୍ତି ଯେ, ବାଇଡେନଙ୍କ କାର୍ଯ୍ୟକାଳ ସମୟରେ ଇରାନ ଦ୍ୱାରା ଆମେରିକୀୟ ମହିଳାଙ୍କୁ ଅଟକ ରଖାଯାଇଥିଲା। ସେ ମହିଳାଙ୍କ ପରିଚୟ ପ୍ରକାଶ କରି ନାହାଁନ୍ତି କିମ୍ବା ତାଙ୍କ ମୁକ୍ତିର ସର୍ତ୍ତାବଳୀ କିମ୍ବା ପରିସ୍ଥିତି ସମ୍ପର୍କରେ ଅତିରିକ୍ତ ବିବରଣୀ ପ୍ରଦାନ କରିନାହାଁନ୍ତି।
ଅନ୍ତର୍ଜାତୀୟ ମାନବାଧିକାର ଓକିଲ ଜାରେଡ ଜେନ୍ସର ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟରେ ଆମେରିକୀୟ ମହିଳାଙ୍କୁ ଡେନା କରାରି ଭାବରେ ଚିହ୍ନଟ କରିଛନ୍ତି। ତାଙ୍କ ମୁକ୍ତିକୁ ନିଶ୍ଚିତ କରି ଜେନ୍ସର ଲେଖିଛନ୍ତି, ମୁଁ ଏହା ଘୋଷଣା କରି ଖୁସି ଏବଂ ରୋମାଞ୍ଚିତ ଯେ ମୋର କ୍ଲାଏଣ୍ଟ ଏବଂ ଆମେରିକୀୟ ନାଗରିକ ଡେନା କରାରି, ଯିଏ ଡିସେମ୍ବର ୨୦୨୪ରୁ ମିଥ୍ୟା ଅଭିଯୋଗ ଯୋଗୁ ଇରାନରେ ଫସି ରହିଥିଲେ। ସେ ଏବେ ମୁକ୍ତ।
Dharitri – Odisha’s No.1 Odia Daily
