ଦେବଗଡ଼,୧୪।୨(ଡି.ଏନ୍.ଏ.) : ଦେବଗଡ଼ ପୌରପରିଷଦ କାଉନସିଲ ହଲରେ ରବିବାର ନିଆଁ ଲାଗିଯାଇଥିଲା। ନିଆଁ ଲାଗିବା ଘଟଣାକୁ ଉଚ୍ଚସ୍ତରୀୟ ତଦନ୍ତ ଦାବି କରିଛି ଭାଜପା । ଭାଜପା ପକ୍ଷରୁ ସ୍ଥାନୀୟ ବିଧାୟକଙ୍କ ବାସଭବନରେ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଥିଲା। ଏଥିରେ ବିଧାୟକ ସୁବାଷ ଚନ୍ଦ୍ର ପାଣିଗ୍ରାହୀ, ଉପନଗରପାଳ ପ୍ରଜିତ ଭୋଜ, ୱାର୍ଡମେମ୍ବର କାର୍ତ୍ତିକ ମହାକୁଲ, ଇତିଶ୍ରୀ ମିଶ୍ର, ସରୋଜିନୀ ମୁଣ୍ଡା, ମଧୁସୁଦନ ବାଘ, ପ୍ରମୁଖ ଉପସ୍ଥିତ ରହିଥିଲେ। ଏହି ଅବସରରେ ବିଧାୟକ ପାଣିଗ୍ରାହୀ ଓ ଉପନଗରପାଳ ଭୋଜ ପୌର ପରିଷଦ କର୍ମଚାରୀ ଏବଂ କେତେକ ବ୍ୟକ୍ତି ଉଦ୍ଦେଶ୍ୟ ମୂଳକ ଭାବେ ପୌରପରିଷଦର କାଉନସିଲ ହଲରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିବା ଅଭିଯୋଗ କରିଛନ୍ତି।
ଏପରିକି ପୌରପରିଷଦର ବିଭିନ୍ନ ଦୁର୍ନୀତି ଏବଂ ଆର୍ଟିଆଇ ରିପୋର୍ଟ ନ ଦେବା ପାଇଁ ଏଭଳି କାମ କରାଯାଇଥିବା ଖବରଦାତା ସମ୍ମିଳନୀରେ କୁହାଯାଇଛି। ଅନ୍ୟପକ୍ଷେ ପୌରପରିଷଦରେ ଲାଗିଥିବା ସିସି ଟିଭି କ୍ୟାମେରାକୁ ଜାଣିଶୁଣି ଦୀର୍ଘ ମାସ ହେବ ବନ୍ଦ କରିଦିଆଯିବା ଘଟଣା ସମସ୍ତଙ୍କୁ ଚକିତ କରିଛି। ଏନେଇ ଘଟଣାର ଉଚ୍ଚସ୍ତରୀୟ ତଦନ୍ତ କରାଗଲେ ସତ୍ୟାସତ୍ୟ ଜଣାପଡିବ ବୋଲି ଭାଜପା ପକ୍ଷରୁ କୁହାଯାଇଛି।
ସୂଚନା ଯୋଗ୍ୟ, ଦେବଗଡ଼ ପୌରପରିଷଦରେ ଗତ ଡିସେମ୍ବର ମାସରୁ ଲୋକାଲ ଅଡିଟ ଚାଲିଛି। ହେଲେ ରବିବାର ପ୍ରତ୍ୟୁଷରେ କାଉନସିଲ ହଲରେ ନିଆଁ ଲାଗିଯାଇଥିଲା। ଫଳରେ ରାତି ଜଗୁଆଳିଙ୍କ ସହ ସ୍ଥାନୟ ଲୋକଙ୍କ ସହାୟତାରେ ନିଆଁ ଲିଭାଇବା ସହ ଦମକଳ ବାହିନୀକୁ ସୂଚନା ଦିଆଯାଇଥିଲା। ଦମକଳ ବାହିନୀ ଘଟଣାସ୍ଥଳରେ ପହଞ୍ଚିବା ବେଳକୁ ନିଆଁ ଆୟତ୍ତ ହୋଇସାରିଥିଲା। ଏହି ଘଟଣାକୁ ନେଇ ଏବେ ନାନା ଆଲୋଚନା ହେଉଛି। ଏହାର ଠିକ୍ ତଦନ୍ତ କରାଗଲେ ସତ୍ୟାସତ୍ୟ ପଦାକୁ ଆସିବ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି। ଅନ୍ୟପକ୍ଷେ ପୋଲିସ ମଧ୍ୟ ଘଟଣାର ତଦନ୍ତ କରି ଫେରିଛି।
