ଭୁବନେଶ୍ୱର,୨୪।୪(ବ୍ୟୁରୋ): ଗତ ପଞ୍ଚାୟତ ଓ ପୌର ନିର୍ବାଚନରେ ବିଜେଡିକୁ ବିପୁଳ ଜନସମର୍ଥନ ମିଳିଛି। ଆସନ୍ତା ୨୦୨୪ରେ ସାଧାରଣ ନିର୍ବାଚନ ଅନୁଷ୍ଠିତ ହେବ। ପଞ୍ଚାୟତ ଓ ପୌର ନିର୍ବାଚନ ଭଳି ବିଧାନସଭା ଓ ଲୋକ ସଭା ନିର୍ବାଚନରେ ଦଳ କିପରି କ୍ଲିନ୍ ସୁଇପ୍ କରିବ ସେ ନେଇ ବିଜେଡି ରଣନୀତି ପ୍ରସ୍ତୁତ ଆରମ୍ଭ କରିଛି।
ସ୍ତରରେ ବିଜେଡିକୁ କିପରି ଆହୁରି ଅଧିକ ସୁଦୃଢ଼ ତଥା ସୁସଂଗଠିତ କରାଯାଇ ପାରିବେ ସେ ନେଇ ଶନିବାର ନବୀନ ନିବାସଠାରେ ଜିଲା ପର୍ଯ୍ୟବେକ୍ଷକମାନଙ୍କର ବୈଠକ ଆରମ୍ଭ ହୋଇଛି । ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତ ନିର୍ବାଚନରେ ଜିଲାରେ ଦଳର ସ୍ଥିତି ନେଇ ଜିଲାୱାରି ପର୍ଯ୍ୟବେକ୍ଷକଙ୍କ ସହ ୱାନ୍ ଟୁ ୱାନ୍ କଥା ହୋଇଛନ୍ତି । ପ୍ରଥମ ଦିବସରେ କୋରାପୁଟ, ମାଲକାନଗିରି, କେନ୍ଦ୍ରାପଡ଼ା, ବାଲେଶ୍ବର, ନୟାଗଡ଼, ଅନୁଗୋଳ, ନବରଙ୍ଗପୁର, ଢେଙ୍କାନାଳ ଓ ସୁନ୍ଦରଗଡ଼ ୯ ଜିଲାର ୮ ପର୍ଯ୍ୟବେକ୍ଷକଙ୍କ ସହ ନବୀନ ଆଲୋଚନା କରିଛନ୍ତି।
ବିଜେଡି ସଭାପତି ନବୀନ ପଟ୍ଟନାୟକ ପ୍ରଥମେ ନୟାଗଡ଼ ଜିଲା ପର୍ଯ୍ୟବେକ୍ଷକ ପଦ୍ମନାଭ ବେହେରାଙ୍କ ସହ କଥା ହୋଇଛନ୍ତି । ଏହା ପରେ ବାଲେଶ୍ବର ପର୍ଯ୍ୟବେକ୍ଷକ ପ୍ରତାପ ଦେବ, କେନ୍ଦ୍ରାପଡ଼ା ଜିଲା ପର୍ଯ୍ୟବେକ୍ଷକ ଦେବାଶିଷ ସାମନ୍ତରାୟ, କୋରାପୁଟ ଓ ମାଲକାନଗିରି ପର୍ଯ୍ୟବେକ୍ଷକ ଚନ୍ଦ୍ରସାରଥି ବେହେରା, ଅନୁଗୋଳ ପର୍ଯ୍ୟବେକ୍ଷକ ପ୍ରଶାନ୍ତ ମୁଦୁଲି, ଢେଙ୍କାନାଳ ପର୍ଯ୍ୟବେକ୍ଷକ ବିଜୟ ନାୟକ, ନବରଙ୍ଗପୁର ପର୍ଯ୍ୟବେକ୍ଷକ ତୁଷାରକାନ୍ତି ବେହେରା ଓ ସୁନ୍ଦରଗଡ଼ ପର୍ଯ୍ୟବେକ୍ଷକ ପ୍ରୀତିରଞ୍ଜନ ଘଡ଼େଇଙ୍କ ସହ ଜିଲାରେ ବିଜେଡିର ସାଂଗଠନିକ ସ୍ଥିତି ନେଇ ଆଲୋଚନା କରିଛନ୍ତି ।
ଆଲୋଚନା ସମୟରେ ପଞ୍ଚାୟତ ଓ ପୌର ନିର୍ବାଚନରେ କିଛି ସ୍ଥାନରେ କାହିଁକି ବିଜେଡି ପଛୁଆ ରହିଗଲା ଏବଂ ତୃଣମୂଳ ସ୍ତରରେ କ’ଣ ଅସୁବିଧା ରହିଛି ସେ ନେଇ ୧୦ ଦିନ ଭିତରେ ରିପୋର୍ଟ ଦେବାକୁ ପର୍ଯ୍ୟବେକ୍ଷକମାନଙ୍କୁ କୁହାଯାଇଛି ।
ଏଠାରେ ସୂଚନାଯୋଗ୍ୟ ଯେ ଆସନ୍ତା ୩ ଦିନ ଧରି ୩୦ ଜିଲାର ପର୍ଯ୍ୟବେକ୍ଷକମାନଙ୍କ ସହ ନବୀନ ଜିଲାରେ ଦଳର ସ୍ଥିତି ନେଇ ଆଲୋଚନା କରିବେ। ପର୍ଯ୍ୟବେକ୍ଷକମାନଙ୍କଠାରୁ ରିପୋର୍ଟ ମିଳିବା ପରେ ସେଗୁଡ଼ିକୁ ସମୀକ୍ଷା କରାଯିବ। କେଉଁ ପର୍ଯ୍ୟବେକ୍ଷକ ନିଜ ଦାୟିତ୍ୱକୁ କେତେ ତୁଲାଇବାରେ ସଫଳ ହୋଇଛନ୍ତି ସେ ସବୁର ତର୍ଜମା ସଭାପତି କରିବେ। ଆସନ୍ତା ମେ’ରେ ସାଂଗଠନିକ ସ୍ତରରେ ଏକ ଅଦଳବଳଦ ହେବାର ସମ୍ଭାବନା ରହିଛି। ଯେଉଁ ପର୍ଯ୍ୟବେକ୍ଷକମାନଙ୍କ ପ୍ରଦର୍ଶନ ସେତେଟା ସନ୍ତୋଷଜନକ ନ ଥିବ ଅଥବା ଜଣେ ବ୍ୟକ୍ତି ଦୁଇ କିମ୍ବା ତିନୋଟି ଦାୟିତ୍ୱରେ ଥିବେ ସେମାନଙ୍କୁ ଦାୟିତ୍ୱ ମୁକ୍ତ କରାଯିବା ନେଇ ଆଲୋଚନା ହେଉଛି।
