ବରଗଡ଼,୨୫ା୬(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ରବିଧାନ ଉଠାଣରେ ଶିଥିଳତାକୁ ନେଇ ଗୋଟିଏ ପଟେ ଚାଷୀ ଅସନ୍ତୋଷ ତେଜି ଉଠିଥିବାବେଳେ ଏହାକୁ ନେଇ ଶାସକ ଭାଜପା ଏବଂ ବିରୋଧୀ ବିଜେଡି ମୁହାଁମୁହିଁ ହୋଇଛନ୍ତି। ଚାଷୀଙ୍କ ଧାନ ଉଠାଣରେ ବିଫଳତା ଭାଜପା ସରକାରଙ୍କ ଅପାରଗତାକୁ ପଦାରେ ପକାଇ ଦେବା ସହିତ ଏହି ସରକାର ଚାଷୀଙ୍କୁ ପ୍ରତାରଣା କରିଛି ବୋଲି ବିଜେଡି କହିଛି। ଅନ୍ୟପଟେ ମଙ୍ଗଳବାର ବରଗଡ଼ ସାମ୍ବାଦିକ ସଂଘ ସମ୍ମିଳନୀ କକ୍ଷରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଶାସକ ଭାଜପା ବିରୋଧୀ ବିଜେଡିକୁ କଡ଼ା ଜବାବ ଦେଇଛି। ଚାଷୀମାନେ କୁଇଣ୍ଟାଲ ପ୍ରତି ୩୧୦୦ ଟଙ୍କାରେ ଧାନ ବିକିବା ସହିତ ଅଦିନିଆ ବର୍ଷାରେ କ୍ଷତିଗ୍ରସ୍ତ ଚାଷୀମାନେ ପ୍ରଥମଥର ଲାଗି କ୍ଷତିପୂରଣ ପାଇ ଖୁସିରେ ଅଛନ୍ତି। ମାତ୍ର ବିଜେଡି କୁମ୍ଭୀର କାନ୍ଦଣା ଭଳି ଚାଷୀମାନଙ୍କୁ ବିଭ୍ରାନ୍ତ କରି ଚାଲିଛି ବୋଲି ଭାଜପା କହିଛି। ଖବରଦାତା ସମ୍ମିଳନୀରେ ଭାଜପା ରାଜ୍ୟ କାର୍ଯ୍ୟକାରିଣୀ ସଦସ୍ୟ ସୁରେଶ୍ୱର ଶତପଥୀ କହିଥିଲେ, ଗତବର୍ଷ ରବିଧାନ ସଂଗ୍ରହ ସମୟରେ ଜିଲାର ଅତାବିରା ନିୟନ୍ତ୍ରିତ ବଜାର କମିଟି(ଆରଏମ୍ସି) ଅଧୀନ ମଣ୍ଡିଗୁଡ଼ିକରୁ ୨୪ ଲକ୍ଷ କୁଇଣ୍ଟାଲ ଧାନ କିଣାଯାଇଥିଲା। ସେହି ସମୟରେ ବିଜେଡି ସରକାର ଚାଲିଥିଲା। ଏଥର ଏପର୍ଯ୍ୟନ୍ତ ଉକ୍ତ ଆରଏମ୍ସିରୁ ୨୩ ଲକ୍ଷ ୫୦ ହଜାର କୁଇଣ୍ଟାଲ ଧାନ କ୍ରୟ ସରିଲାଣି। ଆହୁରି ପ୍ରାୟ ଅଢ଼େଇ ଲକ୍ଷ କୁଇଣ୍ଟାଲ ବିକ୍ରି ଅପେକ୍ଷାରେ ରହିଛି। ସେସବୁକୁ ମଧ୍ୟ ଆସନ୍ତା ୩୦ତାରିଖ ସୁଦ୍ଧା କିଣାଯିବ ବୋଲି ସେ କହିଥିଲେ। ସେହିପରି ପୂର୍ବ ସରକାରରେ ଟୋକନ ଅବଧି ସରିଲେ ରାଜ୍ୟସ୍ତରୀୟ ଧାନ ସଂଗ୍ରହ କମିଟିକୁ କଥା ଯାଉଥିଲା। ମାତ୍ର ଏହି ସମସ୍ୟାର ସମାଧାନ କ୍ଷମତା ଏବେ ଜିଲାପାଳଙ୍କୁ ଦିଆଯାଇଛି। ଏହା ସହିତ ଅଦିନିଆ ବର୍ଷା ହେଲେ ପୂର୍ବ ସରକାର ଚାଷୀଙ୍କୁ କ୍ଷତିପୂରଣ ପ୍ରଦାନ କରୁ ନଥିଲା। ମାତ୍ର ଭାଜପା ସରକାର ପ୍ରଥମଥର ପାଇଁ ଏଭଳି ସ୍ଥିତିରେ କ୍ଷତିପୂରଣ ଘୋଷଣା କରିଛି। ଏହି ଦୃଷ୍ଟିରୁ ଭାଜପା ସରକାର ପୂର୍ବର ବିଜେଡି ସରକାର ତୁଳନାରେ ଚାଷୀଙ୍କ ହିତ ପାଇଁ ବହୁକିଛି ପଦକ୍ଷେପ ନେଇଛି ଏବଂ ଭାଜପା ଚାଷୀଙ୍କ ଦଳ ବୋଲି ଶତପଥୀ କହିଥିଲେ। ପୂର୍ବ ସରକାରଙ୍କ ବ୍ୟବସ୍ଥାରେ ଧାନ କିଣାବିକା ଚାଲିଛି, ସେଥିରେ ବହୁ ପରିବର୍ତ୍ତନର ଆବଶ୍ୟକତା ରହିଛି। ମାତ୍ର ଗୋଟିଏ ବର୍ଷ ମଧ୍ୟରେ ସେସବୁ ପରିବର୍ତ୍ତନ ସମ୍ଭବ ନୁହେଁ ବୋଲି ମଧ୍ୟ ସେ କହିଥିଲେ। ଖବରଦାତା ସମ୍ମିଳନୀରେ ଭାଜପା ଜିଲା ସଭାପତି ଡା. ଅରୂପାନନ୍ଦ ସାହୁ ଉପସ୍ଥିତ ଥିଲେ।
