ଛତ୍ରପୁର,୧୯ା୯(ସନ୍ତୋଷ ପାଢ଼ୀ/ଦିଲୀପ ସାମଲ): ପ୍ରାୟ ବର୍ଷେ ହେଲା ଜିଲା ପରିଷଦ ବୈଠକ ହୋଇ ନ ଥିବା, ୭ ଦିନ ପୂର୍ବରୁ ନୋଟିସ ନ ଦେଇ ବୈଠକକୁ ଦିନକ ପୂର୍ବରୁ ଡକାଯିବାକୁ ବିରୋଧ କରି ଗୁରୁବାର ଗଞ୍ଜାମ ଜିଲାର ସମସ୍ତ ବିଜେଡ଼ି ଜିଲା ପରିଷଦ ସଭ୍ୟ କକ୍ଷତ୍ୟାଗ କରିଛନ୍ତି। ଛତ୍ରପୁରସ୍ଥିତ ଜ଼ିଲା ପରିଷଦର ଋଷିକୂଲ୍ୟା ସମ୍ମିଳନୀ ଗୃହରେ ଗୁରୁବାର କନିଷ୍ଠ ଶିକ୍ଷକ ନିଯୁକ୍ତି ଅନୁମୋଦନ ନେଇ ବୈଠକ ଆୟୋଜନ କରାଯାଇଥିଲା। ଗଞ୍ଜାମ ଜ଼ିଲା ପରିଷଦରେ ବିଜେଡିର ସଂଖ୍ୟା ଗରିଷ୍ଠତା ରହିଛି। ଜିଲାପରିଷଦ ଅଧ୍ୟକ୍ଷା ଓ ଉପାଧ୍ୟକ୍ଷା ଉଭୟେ ବିଜେଡିର। ତେବେ ସଭ୍ୟମାନଙ୍କ କକ୍ଷ ତ୍ୟାଗ ଯୋଗୁ ବୈଠକରେ ଶିକ୍ଷକ ତାଲିକା ଅନୁମୋଦନ ହୋଇପାରି ନାହିଁ।
ବୈଠକର ପ୍ରାରମ୍ଭରେ ଗଞ୍ଜାମ ଜିଲା ଶିକ୍ଷା ଅଧିକାରୀ ଅମିତା ପଟ୍ଟନାୟକ ଜିଲାରେ କନିଷ୍ଠ ଶିକ୍ଷକ ନିଯୁକ୍ତି ଅନୁମୋଦନ ନେଇ ପ୍ରସ୍ତାବ ସମ୍ପର୍କରେ କହିବା ମାତ୍ରେ ବିଜେଡିର ସମସ୍ତ ଜିଲା ପରିଷଦ ସଭ୍ୟ ନିଜ ଆସନରୁ ଉଠି ପ୍ରତିବାଦ କରିଥିଲେ। ବୈଠକ ସମ୍ପର୍କରେ ସେମାନଙ୍କୁ ଆଗରୁ ତଥା ନିୟମ ଅନୁଯାୟୀ ୭ ଦିନ ପୂର୍ବରୁ ଚିଠି କରା ନ ଯାଇ ଅଚାନକ କାହିଁକି ଡକାଗଲା ବୋଲି ସଭ୍ୟମାନେ ପ୍ରଶ୍ନ କରିଥିଲେ।
ପ୍ରାୟ ବର୍ଷେ ହେଲା ବୈଠକ ହେଉ ନ ଥିବାରୁ ଅଞ୍ଚଳରେ ସ୍ବାସ୍ଥ୍ୟ, ଶିକ୍ଷା, ପାନୀୟଜଳ, ବିଦ୍ୟୁତ୍, ରାସ୍ତା, କୃଷି ଆଦି ସମସ୍ୟାର ସମାଧାନ ହୋଇପାରୁ ନ ଥିବା କହି କ୍ଷୋଭ ପ୍ରକାଶ କରିଥିଲେ। ପରେ ବିଜେଡ଼ି ଜିଲା ପରିଷଦ ସଭ୍ୟମାନେ ବାହାରକୁ ଚାଲିଯାଇଥିଲେ। ବୈଠକରେ ଉପସ୍ଥିତ ବିଧାୟକ ଏବଂ ଜିଲାପାଳଙ୍କ ଅନୁରୋଧ ସତ୍ତ୍ୱେ ମଧ୍ୟ ସେମାନେ କିଛି ଶୁଣି ନ ଥିଲେ।
ଅନ୍ୟପକ୍ଷେ ୨୪ ବର୍ଷ ଧରି ବିଦ୍ୟାଳୟଗୁଡ଼ିକରେ ଶିକ୍ଷକ ଅଭାବ ଥିଲା ବେଳେ ଏବେ ନୂଆ ସରକାର ଆସିବା ପରେ ନୂତନ ଶିକ୍ଷକ ନିଯୁକ୍ତି ପାଇଁ ଚାଲିଥିବା ସରକାରୀ କାର୍ଯ୍ୟକ୍ରମରୁ ବିଜେଡି ସଭ୍ୟମାନେ ଉଠି ଚାଲିଯିବା ଘଟଣାକୁ ଭାଜପା ପକ୍ଷରୁ ନିନ୍ଦା କରାଯାଇଛି। ଦଳୀୟ ମନୋଭାବ ରଖି ବିଜେଡି ସଭ୍ୟମାନେ କକ୍ଷତ୍ୟାଗ କରିଛନ୍ତି ବୋଲି ବୈଠକରେ ଉପସ୍ଥିତ ଭାଜପା ବିଧାୟକମାନେ କହିଛନ୍ତି ।
ମାତ୍ର ୧୦୦ ଦିନର ସରକାରକୁ ବିଜେଡି ପ୍ରଶ୍ନ କରିବା ହାସ୍ୟାସ୍ପଦ ବୋଲି ଚିକିଟି ବିଧାୟକ ମନୋରଞ୍ଜନ ଧ୍ୟାନ ସାମନ୍ତରାୟ ଗଣମାଧ୍ୟମକୁ କହିଛନ୍ତି। ଶିକ୍ଷକ ନିଯୁକ୍ତି ପ୍ରକ୍ରିୟା ପୂର୍ବ ସରକାରଙ୍କ ସମୟରେ ହୋଇଥିଲା ବୋଲି ଜଣାପଡିଛି। ଆସନ୍ତା ୨୭ ତାରିଖରେ ଏ ନେଇ ଆଉ ଏକ ବୈଠକ ଅନୁଷ୍ଠିତ ହେବ ବୋଲି ଜିଲାପାଳ ଦିବ୍ୟଜ୍ୟୋତି ପରିଡା କହିଛନ୍ତି। ବୈଠକକୁ ପୂର୍ବରୁ ଗଣମାଧ୍ୟମକୁ ଡକାଯାଇଥିଲା। ହେଲେ ଅଚାନକ ସମ୍ମିଳନୀ ଗୃହରେ ଉପସ୍ଥିତ ନ ରହିବାକୁ ପ୍ରଶାସନ ପକ୍ଷରୁ କୁହାଗଲା। ଏ ସମ୍ପର୍କରେ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯିବାରୁ କେବଳ ଫଟୋ ଉଠାଇ ଆସିଯାନ୍ତୁ ବୋଲି କହିଥିଲେ।
