ଢେଙ୍କାନାଳ ଅଫିସ,୩୦ା୭: ଢେଙ୍କାନାଳ ପୌରସଂସ୍ଥା କାର୍ଯ୍ୟାଳୟ ନିର୍ବାହୀ ଅଧିକାରୀଙ୍କ ପ୍ରକୋଷ୍ଠରେ ଶନିବାର ମଧ୍ୟାହ୍ନରେ ବିଜେଡି ଓ ଭାଜପା କାଉନସିଲର ଧସ୍ତାଧସ୍ତି ହୋଇଛନ୍ତି। ଫଳରେ ପୌରସଂସ୍ଥା କାର୍ଯ୍ୟାଳୟରେ ବହୁ ସମୟ ଧରି ଉତ୍ତେଜନା ଲାଗି ରହିଥିଲା ଉଠା ଦୋକାନୀମାନଙ୍କୁ ଥଇଥାନ ପାଇଁ ପୌରସଂସ୍ଥା ପକ୍ଷରୁ ନିର୍ମିତ ଭେଣ୍ଡିଂ ଜୋନ୍ ବଣ୍ଟନ ନେଇ ଏହି ଘଟଣା ଘଟିଥିଲା। ପୌରସଂସ୍ଥାରେ ପୌରାଧ୍ୟକ୍ଷା ଜୟନ୍ତୀ ପାତ୍ର ଭାଜପାର ହୋଇଥିବା ବେଳେ ଉପାଧ୍ୟକ୍ଷ ପ୍ରକାଶ ଚନ୍ଦ୍ର କୁହଁର ବିଜେଡି। ସେହିପରି ମୋଟ୍ ୨୩ କାଉନସିଲରଙ୍କ ମଧ୍ୟରୁ ୧୪ ବିଜେଡିର ଏବଂ ୯ ଜଣ କାଉନସିଲର ଭାଜପାର। ପୌରସଂସ୍ଥା ୨ ନମ୍ବର ଓ୍ବାର୍ଡରେ ନିର୍ମିତ ଭେଣ୍ଡିଂ ଜୋନ୍ରେ ଉକ୍ତ ଅଞ୍ଚଳର ଉଠାଦୋକାନୀଙ୍କୁ ଥଇଥାନ ପାଇଁ ତାଲିକା ପ୍ରସ୍ତୁତ କରାଯାଇଥିଲା। ଏଥିରେ ସ୍ଥାନୀୟ ବିଜେଡି କାଉନସିଲରଙ୍କୁ ଅଣଦେଖା କରାଯାଇଥିଲା ବୋଲି ସେ ନିର୍ବାହୀ ଅଧିକାରୀଙ୍କୁ ଜଣାଇଥିଲେ। ଏହି ସମୟରେ ଉପାଧ୍ୟକ୍ଷଙ୍କ ସମେତ ବିଜେଡି କାରନସିଲରମାନେ ନିର୍ବାହୀ ଅଧିକାରୀଙ୍କ ପ୍ରକୋଷ୍ଠରେ ଉପସ୍ଥିତ ଥିଲେ। ନିର୍ବାହୀ ଅଧିକାରୀ ଘଟଣା ସମ୍ପର୍କରେ ଜାଣିବା ପାଇଁ ଭେଣ୍ଡିଂ ଜୋନ୍ ବଣ୍ଟନ ଦାୟିତ୍ୱରେ ଥିବା କର୍ମଚାରୀଙ୍କୁ ଡାକିଥିଲେ। କର୍ମଚରୀ ଜଣଙ୍କ ସମସ୍ତଙ୍କ ସମ୍ମୁଖରେ ପୌରାଧ୍ୟକ୍ଷାଙ୍କ ସ୍ବାମୀ ଭାଜପା ନେତା ରାମଚନ୍ଦ୍ର ପାତ୍ରଙ୍କ ତାଲିକା ପ୍ରସ୍ତୁତ ହୋଇଛି କହିବା ପରେ ଉପାଧ୍ୟକ୍ଷ ଓ ବିଜେଡି କାଉନସିଲରମାନେ ଏହାର ତୀବ୍ର ପ୍ରତିବାଦ କରିଥିଲେ। ସେହି ସମୟରେ ପୌରାଧ୍ୟକ୍ଷାଙ୍କ ପ୍ରକୋଷ୍ଠରେ ବସିଥିବା ତାଙ୍କ ସ୍ବାମୀ ରାମଚନ୍ଦ୍ରଙ୍କୁ ନିର୍ବାହୀ ଅଧିକାରୀଙ୍କ ପ୍ରକୋଷ୍ଠକୁ ଡକା ଯାଇଥିଲା। ସେଠାରେ ପ୍ରଥମେ ବିଜେଡି ୨ ନମ୍ବର କାଉନସିଲର ଓ ରାମଚନ୍ଦ୍ରଙ୍କ ମଧ୍ୟରେ କଥା କଟାକଟି ହୋଇଥିଲା। ଉପାଧ୍ୟକ୍ଷ ପ୍ରକାଶ ଚନ୍ଦ୍ର କୁହଁର, ପୌରାଧ୍ୟକ୍ଷା ହେଉଛନ୍ତି ଜୟନ୍ତୀ ପାତ୍ର, ତାଙ୍କ ସ୍ବାମୀ ରାମଚନ୍ଦ୍ର ପାତ୍ର ଏଠି କିଏ? ସେ କାହିଁକି ସବୁବେଳେ କାର୍ଯ୍ୟାଳୟକୁ ଆସି ସବୁ କାର୍ଯ୍ୟରେ ହସ୍ତକ୍ଷେପ କରୁଛନ୍ତି ବୋଲି ବଡ଼ ପାଟିରେ ପ୍ରତିବାଦ କରିବାରୁ ରାମଚନ୍ଦ୍ର ଲୋକଙ୍କ ସେବା କରୁଥିବାରୁ ଆମେ ସବୁଠିକୁ ଯାଇପାରିବୁ ବୋଲି କହିଥିଲେ। ଏହି ଘଟଣା ନେଇ ନିର୍ବାହୀ ଅଧିକାରୀଙ୍କ ଉପସ୍ଥିତିରେ ବିଜେଡି ଓ ଭାଜପା କାଉନସିଲର ମୁହଁାମୁହିଁ ହେବା ସହ ଧସ୍ତାଧସ୍ତି ହୋଇଥିଲେ। ଉଭୟ ଗୋଷ୍ଠୀ ପରସ୍ପରକୁ ଗାଳିଗୁଲଜ କରିଥିଲେ। ଫଳରେ ଦୀର୍ଘ ସମୟ ଧରି ଉତ୍ତେଜନା ଲାଗି ରହିଥିଲା। ପରେ ନିର୍ବାହୀ ଅଧିକାରୀ ସମସ୍ତଙ୍କୁ ବୁଝାଶୁଝା କରି ପ୍ରକୋଷ୍ଠରୁ ବାହାର କରିଥିଲେ। ଉପାଧ୍ୟକ୍ଷ ପୌରାଧ୍ୟକ୍ଷାଙ୍କ ଉଦ୍ଦେଶ୍ୟରେ ଆଶାଳୀନ ମନ୍ତବ୍ୟ ଦେଇଛନ୍ତି ବୋଲି ରାମଚନ୍ଦ୍ର ଅଭିଯୋଗ କରିଛନ୍ତି। ଅନ୍ୟପକ୍ଷରେ ରାମଚନ୍ଦ୍ର ଓ ଅନ୍ୟ ୨ ଜଣଙ୍କ ନାମରେ ଟାଉନ ଥାନାରେ ଅଭିଯୋଗ କରାଯିବ ବୋଲି ଉପାଧ୍ୟକ୍ଷ କହିଛନ୍ତି। ଏହି ଘଟଣା ସହରରେ ଚର୍ଚ୍ଚାର ବିଷୟ ହୋଇ ଥିବାବେଳେ ବିଜେଡି ଓ ଭାଜପା କାଉନସିଲରମାନଙ୍କ ମଧ୍ୟରେ ଅଧିକାଂଶ ସମୟରେ ବିବାଦ ଓ ସମନ୍ବୟର ଅଭାବ ଯୋଗୁ ପୌରାଞ୍ଚଳରେ ଉନ୍ନତିମୂଳକ କାର୍ଯ୍ୟ ବାଧାପ୍ରାପ୍ତ ହୋଇଛି।
