ବାହାନଗା,୧୨ା୧(ଡି.ଏନ.ଏ.)- ବାଲେଶ୍ୱର ଜିଲା ଚାନ୍ଦିପୁର ସ୍ଥିତ ଡିଆର୍ଡିଓ ତଥ୍ୟ ଲିକ୍ ଘଟଣାର ତଦନ୍ତ ସରି ନ ଥିବା ବେଳେ ସମୁଦ୍ର ଉପକୂଳ ନିଷିଦ୍ଧାଞ୍ଚଳରେ ଅନ୍ୟ ରାଜ୍ୟର ଦୁଇ ଯୁବକ ପାରା ଉଡ଼ାଇ ପରୀକ୍ଷଣ କରିବା ଚର୍ଚ୍ଚାର ବିଷୟ ହୋଇଛି। ଜିଲା ପ୍ରଶାସନର ବିନା ଅନୁମତିରେ ଏଭଳି କାର୍ଯ୍ୟରେ ନିୟୋଜିତ ଦୁଇ ଯୁବକଙ୍କ ସମେତ ସ୍ଥାନୀୟ ଅଞ୍ଚଳର ଜଣେ କାର୍ ଡ୍ରାଇଭରଙ୍କୁ ପୋଲିସ ଅଟକ ରଖି ପରେ ୪୧ ସିଆର୍ପିସିରେ ଜାମିନରେ ଛାଡ଼ିଥିବା ସୂଚନା ମିଳିଛି। ଯୁବକ ଦ୍ୱୟ ହେଲେ ଆନ୍ଧ୍ରପ୍ରଦେଶ ଭାଇଜାଗ ଅନ୍ତର୍ଗତ ଗଜୱାକା ଗ୍ରାମର ଉପେନ୍ଦ୍ର ମୋଲି ଓ କାକିନଣ୍ଡା ଗ୍ରାମର ପୱାନ କଲ୍ୟାଣ। ବାହାନଗା ବ୍ଲକ ବରିପଦା ସ୍ଥିତ ସମୁଦ୍ରକୂଳବର୍ତ୍ତୀ ଅଟାସପୁର ଆଡ଼ିଆ ଓ ଜହ୍ନିପୁର ଅଞ୍ଚଳରେ ସେମାନେ ପାରା ପରୀକ୍ଷଣ କରୁଥିବା ବେଳେ ସ୍ଥାନୀୟ ଲୋକଙ୍କ ଆକ୍ରୋଶର ଶିକାର ହୋଇଥିଲେ। ଲୋକେ ସେମାନଙ୍କୁ ଅଟକ ରଖି ପୋଲିସକୁ ଖବର ଦେଇଥିଲେ। ପରେ ପୋଲିସ ସେମାନଙ୍କୁ ଥାନାକୁ ନେବା ସହ ବ୍ୟବହାର କରିଥିବା ଏକ କାର୍ ଜବତ କରି ତଦନ୍ତ ଚଳାଇଛି। ତେବେ ପ୍ରଶାସନର ଅଜାଣତରେ ସେମାନେ ଅନ୍ୟ ରାଜ୍ୟରୁ ଆସି ପାରା ପରୀକ୍ଷଣ କରିବା ଘଟଣାରୁ ଉପକୂଳର ସୁରକ୍ଷା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ପ୍ରକାଶ ଯେ, ମଙ୍ଗଳବାର ସକାଳ ସାଢ଼େ ୭ଟା ସମୟରେ ଦୁଇ ଯୁବକ ୨୦ରୁ ଅଧିକ ପାରାଙ୍କୁ ଆଣି ସେମାନଙ୍କ ଗୋଡ଼ରେ ନାଲି, ନୀଳ ଓ ହଳଦିଆ ରଙ୍ଗର ପଟି ଏବଂ କ୍ୟାମେରା ବାନ୍ଧି ଉଡ଼ାଉଥିଲେ। ସ୍ଥାନୀୟ ଲୋକେ ଏହାକୁ ବିରୋଧ କରିବା ସହ ଉଭୟଙ୍କୁ ଅଟକ ରଖି ପୋଲିସକୁ ଖବର ଦେଇଥିଲେ। ଗୋପାଳପୁର ଫାଣ୍ଡି ପୋଲିସ ପହଞ୍ଚି ସେମାନଙ୍କୁ ଉଦ୍ଧାର କରିଥିଲା। ପଚରାଉଚରା ପରେ ସେମାନେ ଗୋଦାବରୀ ମୋମିଂ ପିଜନ ସୋସାଇଟିର ୨ଜଣ ସଦସ୍ୟ ବୋଲି ଜଣାପଡ଼ିଥିଲା। ସେମାନେ ପାରାଙ୍କୁ ଆଣି ପରୀକ୍ଷଣ କରୁଥିଲେ। ଏହିଠାରୁ ସେହି ପାରାମାନଙ୍କୁ ଛାଡ଼ିଲେ ସାଢେ ୪ ଘଣ୍ଟା ମଧ୍ୟରେ କେତୋଟି ଭାଇଜାଗରେ ପହଞ୍ଚିବେ ତାହା ଜାଣିବାକୁ ପରୀକ୍ଷଣ କରୁଥିଲେ। ସେଥିପାଇଁ ସେହି ପାରାମାନଙ୍କୁ ସ୍ବତନ୍ତ୍ର ପ୍ରଶିକ୍ଷଣ ଦିଆଯାଇଥିବା ଯୁବକ ଦ୍ୱୟଙ୍କଠାରୁ ପୋଲିସ ଜାଣିବାକୁ ପାଇଥିଲା। ଉକ୍ତ ଅନୁଷ୍ଠାନର ୧୦ଜଣ ସଦସ୍ୟ ଅଛନ୍ତି। ସେମାନଙ୍କର ମୁଖ୍ୟ ହେଲେ ଡ.ନାରାୟଣ ରାଓ। ସଂସ୍ଥାର ମୁଖ୍ୟଙ୍କଠାରୁ କାଗଜପତ୍ର ମିଳିବା ପରେ ପୋଲିସ ସେମାନଙ୍କୁ ଜାମିନରେ ଛାଡ଼ିଛି। ତେବେ ପ୍ରତିରକ୍ଷା ବିଭାଗର ନିଷିଦ୍ଧାଞ୍ଚଳରେ ପ୍ରଶାସନର ବିନା ଅନୁମତିରେ ପାରା ପରୀକ୍ଷଣ କରାଯିବା ଘଟଣାକୁ ସ୍ଥାନୀୟ ଲୋକେ ସହଜରେ ଗ୍ରହଣ କରିପାରୁ ନାହାନ୍ତି। କୋଷ୍ଟଗାର୍ଡ ଓ ସ୍ଥାନୀୟ ପୋଲିସର ନଜର ଆଢ଼ୁଆଳରେ ଅନ୍ୟ ରାଜ୍ୟର ଯୁବକ ନିର୍ବିଘ୍ନରେ ଏଭଳି କାର୍ଯ୍ୟ କରିବା ଘଟଣାର ଲୋକେ ତଦନ୍ତ ଦାବି କରିଛନ୍ତି।
