ଖୁଣ୍ଟୁଣୀ,୪।୧(ଡି.ଏନ.ଏ.): ଖୁଣ୍ଟୁଣୀ ବନାଞ୍ଚଳରେ ରବିବାର ପକ୍ଷୀ ଗଣନା କରାଯାଇଥିଲା। ଏଥିରେ ମୋଟ୍ ୧୨ ପ୍ରଜାତିର ୩୦୨୧ ପକ୍ଷୀ ଚିହ୍ନଟ ହୋଇଛନ୍ତି। ସେଥିମଧ୍ୟରୁ ୨୮୮ ପକ୍ଷୀ ଇଣ୍ଡିଆନ ସ୍କିମର ବା ପାଣିଚିରି ବୋଲି ବନାଞ୍ଚଳ ଅଧିକାରୀ ମାଗୁଣି ଚରଣ ବେହେରା କହିଛନ୍ତି। ଏହି ପକ୍ଷୀ ଗଣନା କାର୍ଯ୍ୟ ପାଇଁ ୧୫ଟି ୟୁନିଟ୍ (ଯଥା-ଖୁଣ୍ଟୁଣୀର ପଟିଆ, ଡାଲୁଆ ଜଳାଶୟ, ବାଜିଆନାଳି, ଗୋବରା ପୋଖରୀ, ଗୁରୁଡ଼ିଝାଟିଆ ପୋଖରୀ, କୁମାରିବନ୍ଧ, ଜାମୁଝର ଜଳାଶୟ, କଂସର ପୋଖରୀ, ଧବଳେଶ୍ବର-ନୂଆପଟଣା ଘାଟ, ନାକଶୁଣି ପାଟ, ପାଇକେରାପୁର ପାଟ, କୁମାରପୁର ପୋଖରୀ, ରାମଶ୍ୟାମପୁର ପାଟ, କଖଡି-ମହାନଦୀ ରିଜର୍ଭ ବ୍ୟାଙ୍କ ଓ ଭଗୁଆ ଜଳାଶୟ)ରେ କର୍ମଚାରୀଙ୍କୁ ନିୟୋଜିତ କରାଯାଇଥିଲା। ଏଥିରେ ୪ ଜଣ ଫରେଷ୍ଟର, ୧୧ ଫରେଷ୍ଟ ଗାର୍ଡ ଓ ୧୫ ପାରା କର୍ମଚାରୀ ସାମିଲ ହୋଇଥିଲେ। ସକାଳ ୭ଟାରୁ ଏହି ଗଣନା ଆରମ୍ଭ ହୋଇ ଅପରାହ୍ନରେ ଶେଷ ହୋଇଥିଲା । ପକ୍ଷୀମାନଙ୍କ ମଧ୍ୟରେ ହଂସରାଳି, ଧଳା ଛାତି ଡାହୁକ, କାଣ୍ଟିବଗ, ମାଛରଙ୍କା, ଡାହୁକ, ଟେଣ୍ଟେଇ, ଗେଣ୍ଡାଳିଆ, ଗାଇଆ ବଗ, ପାଣିକୁଆ, ଚକୁଆ ଚକୋଇ, ବଡ ବଗ ଆଦି ଚିହ୍ନଟ ହୋଇଛନ୍ତି। ଏହି ସମସ୍ତ କାର୍ଯ୍ୟକୁ ଡିଏଫଓ ସସ୍ମିତା ଲେଙ୍କା ଓ ପକ୍ଷୀ ବିଶାରଦ ସଞ୍ଜୀବ ଦାସ ତଦାରଖ କରିଥିଲେ।
