ବାୟୋ ବବଲ୍ ଚ୍ୟାଲେଞ୍ଜ: ବିଦେଶୀଙ୍କ ତୁଳନାରେ ଭାରତୀୟ ଖେଳାଳି ଅଧିକ ସହନଶୀଳ: ଗାଙ୍ଗୁଲି
21 କୋଲକାତା,୭।୪(ପି.ଟି.): ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ତଥା ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ବାୟୋ ବବଲ୍ (ଜୈବ ସୁରକ୍ଷିତ ପରିବେଶ)କୁ ନେଇ ଏକ ବଡ଼ ମନ୍ତବ୍ୟ ଦେଇଛନ୍ତି। ବାୟୋ ବବଲ୍ ଖେଳାଳିଙ୍କ ପାଇଁ ନିଶ୍ଚିତ ଭାବେ କଷ୍ଟକର ସ୍ଥିତି ସୃଷ୍ଟି କରିଛି। ମାନସିକ ଭାବେ ଏହା ଖେଳାଳି ପାଇଁ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି। ତେବେ ଭାରତୀୟ ଖେଳାଳିମାନେ ଅଧିକ ସହନଶୀଳ ହୋଇଥିବାରୁ ଏହି ଚ୍ୟାଲେଞ୍ଜକୁ ସଫଳତାର ସହ ସାମ୍ନା କରିପାରିବେ। ବିଦେଶୀ ଖେଳାଳିଙ୍କ ତୁଳନାରେ ଦେଖିବାକୁ ଗଲେ ଭାରତୀୟମାନେ ମାନସିକ ସ୍ବାସ୍ଥ୍ୟ ଦୃଷ୍ଟିକୋଣରୁ ଅଧିକ ସହନଶୀଳ ଓ ଦୃଢ଼ ବୋଲି ଗାଙ୍ଗୁଲି କହିଛନ୍ତି।
କୋଭିଡ୍-୧୯ ମହାମାରୀ ପୁଣିଥରେ ତା’ର ପ୍ରକୋପ ଆରମ୍ଭ କରିଥିବା ବେଳେ ବାୟୋ ବବଲ୍ରେ ଅନ୍ତର୍ଜାତୀୟ କ୍ରିକେଟ ଖେଳାଯାଉଛି ଓ ଏଥର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ମଧ୍ୟ ଆୟୋଜନ ହେବାକୁ ଯାଉଛି। ଖେଳାଳିମାନଙ୍କ ଜୀବନ ଏବେ ହୋଟେଲ ଓ ଷ୍ଟାଡିୟମ ମଧ୍ୟରେ ସୀମିତ ରହିବ। ଏହା କୌଣସି ଖେଳାଳିଙ୍କ ପାଇଁ ଆଦୌ ସହଜ ନୁହେଁ ବୋଲି କୁହାଯାଇପାରେ। ବାୟୋ ବବଲ୍ରେ ଖେଳାଳିମାନଙ୍କ ମାନସିକ ସ୍ଥିତି ନେଇ ପୂର୍ବରୁ ଭାରତୀୟ ଅଧିନାୟକ ବିରାଟ କୋହଲି ଚିନ୍ତାପ୍ରକଟ କରିଥିଲେ।
ପୂର୍ବରୁ ଅଷ୍ଟ୍ରେଲିଆ, ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ଖେଳାଳିଙ୍କ ସହ କ୍ରିକେଟ ଖେଳିଛି। ଏହି ଦେଶର ଖେଳାଳିମାନେ ମାନସିକ ସ୍ବାସ୍ଥ୍ୟ ଦୃଷ୍ଟିକୋଣରୁ ଭାରତୀୟଙ୍କ ଭଳି ସେତେଟା ଦୃଢ଼ ନୁହନ୍ତି ବୋଲି ଗାଙ୍ଗୁଲି କହିଛନ୍ତି। ବିଦେଶୀ ଖେଳାଳିମାନେ ଅତିଶୀଘ୍ର ହାର ମାନିଯାଉଥିବା ବେଳେ ଭାରତୀୟ ଖେଳାଳି ଅପେକ୍ଷାକୃତ ଅଧିକ ସହନଶୀଳ ବୋଲି ସେ ମତ ଦେଇଛନ୍ତି। ଗତ ୬-୭ ମାସରେ ବାୟୋ ବବଲ୍ରେ ବହୁତ କ୍ରିକେଟ ଖେଳାଯାଉଛି। ଖେଳାଳିମାନେ ହୋଟେଲରୁ ଷ୍ଟାଡିୟମ ଓ ଷ୍ଟାଡିୟମରୁ ହୋଟେଲ ଯିବା ଆସିବା କରୁଛନ୍ତି। ଏହା ନିଶ୍ଚିତ ଭାବେ କଷ୍ଟକର ବୋଲି ସେ କହିଛନ୍ତି। ଏନେଇ ସେ ଅଷ୍ଟ୍ରେଲିଆର ଉଦାହରଣ ଦେଇଛନ୍ତି। ଭାରତଠାରୁ ଘରୋଇ ପରିବେଶରେ ପରାସ୍ତ ହେବା ପରେ ଅଷ୍ଟ୍ରେଲିଆ କୋଭିଡ୍-୧୯ ପାଇଁ ଦକ୍ଷିଣ ଆଫ୍ରିକା ଗସ୍ତରୁ ଓହରିଯାଇଥିଲା। ଏହି ଗସ୍ତରେ ଅଷ୍ଟ୍ରେଲିଆ ମାର୍ଚ୍ଚ ଓ ଏପ୍ରିଲ୍ରେ ୩ଟି ଟେଷ୍ଟ ଖେଳିବାର କାର୍ଯ୍ୟକ୍ରମ ଥିଲା। ତେବେ ସ୍ବାସ୍ଥ୍ୟଗତ ବିପଦ ଓ ବାୟୋ ବବଲ୍ର କଟକଣାକୁ ଦୃଷ୍ଟିରେ ରଖି ଅଷ୍ଟ୍ରେଲିଆ ଏହି ଗସ୍ତରେ ଯିବାକୁ ମନା କରିଦେଇଥିଲା। ମହାମାରୀ ବେଳେ ସମସ୍ତେ ସକାରାତ୍ମକ ରହିବା ଉଚିତ ଓ ପରିସ୍ଥିତିର ସାମ୍ନା କରିବା ଉଚିତ।
୨୦୦୫ରେ କ୍ୟାରିୟରରେ ସମ୍ମୁଖୀନ ହୋଇଥିବା ଝଟକା କଥା ମନେପକାଇ ଗାଙ୍ଗୁଲି ସଫଳ ପ୍ରତ୍ୟାବର୍ତ୍ତନ କଥା କହିଛନ୍ତି। ନେତୃତ୍ୱରୁ ବିଦା କରିବା ସହ ତାଙ୍କୁ ସେତେବେଳେ ଦଳରୁ ମଧ୍ୟ ବାଦ୍ ଦିଆଯାଇଥିଲା। କ୍ୟାରିୟରରେ ଉତ୍ଥାନ ଓ ପତନ ତଥା ଚାପ ରହିଛି। ତେବେ ଏଭଳି ସ୍ଥିତିରେ ସକାରାତ୍ମକ ଭାବେ ମୁକାବିଲା କରାଯିବ ଉଚିତ ଓ ଆଗକୁ ବଢିବାକୁ ପ୍ରୟାସ କରାଯିବା ଉଚିତ ବୋଲି ଗାଙ୍ଗୁଲି କହିଛନ୍ତି।