ଯାଜପୁର ଅଫିସ,୧୨ା୨: ଚଳିତ ପଞ୍ଚାୟତ ନିର୍ବାଚନରେ ଯାଜପୁର ଜିଲାରେ ବିଜେଡି ପୂର୍ବର ସଫଳତା ଦୋହରାଇବାକୁ ଉଦ୍ୟମ କରୁଥିବାବେଳେ ଭାଜପା କଡ଼ା ଟକ୍କର ଦେଉଛି। ଏଭଳିସ୍ଥଳେ ବିଞ୍ଝାରପୁର ବ୍ଲକରେ ବିଜେଡି କର୍ମୀଙ୍କ ବିଦ୍ରୋହ ଦଳୀୟ ନେତାଙ୍କୁ ଚିନ୍ତିତ କରିଛି। ଇତିମଧ୍ୟରେ ବ୍ଲକର ୬ ଜଣ ଆଗଧାଡ଼ିର ବିଜେଡି କର୍ମୀଙ୍କୁ ନିଲମ୍ବନ କରାଯାଇଛି। ତଥାପି ଦଳୀୟ ଜିଲା ପରିଷଦ ସଭ୍ୟ ପ୍ରାର୍ଥୀ ଏବଂ ସମର୍ଥିତ ସରପଞ୍ଚ ଓ ସମିତି ସଭ୍ୟ ପ୍ରାର୍ଥୀଙ୍କ ବିଜୟ ନେଇ ଦଳ ଆଶଙ୍କାରେ ରହିଛି। ଏହିକ୍ରମରେ ବିଞ୍ଝାରପୁର ବିଧାୟିକା ପ୍ରମିଳା ମଲ୍ଲିକ ଅଳକୁଣ୍ଡ ପଞ୍ଚାୟତ ଅଞ୍ଚଳରେ ଏକ ନିର୍ବାଚନୀ ବୈଠକରେ ଆପଣ ଯଦି ଆଉ କାହାକୁ ଭୋଟ ଦେବେ କିଏ କ’ଣ ନେଇଗଲା, ଇନ୍ଦିରା ଆବାସ ନ ହେଲା, ଗୁହାଳ ନ ହେଲା, ରାସ୍ତା ନ ହେଲା, ଚାଉଳ ନ ହେଲା, ସେହି କଥା ମୋତେ ଆଉ କହିବେ ନାହିଁ ବୋଲି ଭୋଟରଙ୍କୁ ଚାପ ପକାଉଥିବା ଏକ ଭିଡିଓ ଭାଇରାଲ ହୋଇଛି। ଏହାକୁ ଭିତ୍ତିକରି ଯାଜପୁର ଜିଲାପାଳ ଚକ୍ରବର୍ତ୍ତୀ ସିଂ ରାଠୋର ତାଙ୍କ ପତ୍ରସଂଖ୍ୟା ୫୯୪/୧୧ା୨ା୨୦୨୨ରେ ବିଧାୟିକା ମଲ୍ଲିକଙ୍କୁ ବିଡିଓଙ୍କ ଜରିଆରେ ଜବାବ ତଲବ ନୋଟିସ ଜାରି କରିଛନ୍ତି। ଏହି ନୋଟିସର ଏକ ଅବିକଳ ନକଲରେ ବିଧାୟିକା ମଲ୍ଲିକଙ୍କ ସ୍ବାକ୍ଷର ଓ ତାରିଖ ଆଣିବାକୁ ନିର୍ଦ୍ଦେଶ ପତ୍ରରେ ଦର୍ଶାଯାଇଛି। ଏହି ଘଟଣା ସାରା ଜିଲାରେ ଚହଳ ପକାଇଛି। ଏହାପୂର୍ବରୁ କୋରେଇ ବ୍ଲକରେ ଭୋଟ ନ ଦେଲେ ରାଶନ କାର୍ଡ କାଟି ଦିଆଯିବ ଓ ସମର୍ଥନ ନ ଦେବାରୁ ଧାନ କ୍ରୟ ବନ୍ଦ କରିଥିବା ଭଳି ସମ୍ବେଦନଶୀଳ ଅଭିଯୋଗ ହୋଇଛି।
ସୂଚନାଯୋଗ୍ୟ ଯେ, ବିଞ୍ଝାରପୁର ବ୍ଲକର ୨୭ ନମ୍ବର ଜୋନ୍ରେ ବିଜେଡିରୁ ସୁନିତା ନାଏକ, ଭାଜପାରୁ ନିର୍ଝରିଣୀ ନାୟକ, କଂଗ୍ରେସରୁ ରେଖା ମଲିକ ଓ ସ୍ବାଧୀନ ଭାବେ ମାଧବୀ ଲତା ମଳିକ ନିର୍ବାଚନ ଲଢୁଛନ୍ତି। ୨୦୧୪ ସାଧାରଣ ନିର୍ବାଚନରେ ଏଠାରେ ବିଜେଡି ୫୭.୪୦%, ଭାଜପା ୧୧.୮୩% ଓ କଂଗ୍ରେସ ୨୭.୯୯% ଭୋଟ ପାଇଥିଲା। ୨୦୧୭ ପଞ୍ଚାୟତ ନିର୍ବାଚନରେ ବିଞ୍ଝାରପୁରବାସୀ ଭାଜପା ଆଡ଼କୁ ଢଳୁଥିବା ଆଭାସ ଦେଇଥିଲେ। ଏହି ପଞ୍ଚାୟତ ନିର୍ବାଚନରେ ବିଜେଡି ୪୯.୭୬%, ଭାଜପା ୪୨.୬୦% ଓ କଂଗ୍ରେସ ୯.୯୮% ଭୋଟ ପାଇଥିଲା। ୨୭ ନମ୍ବର ଜୋନ୍ରେ ଭାଜପାରୁ ଶ୍ରବଣ ଜେନା ବିଜୟୀ ହୋଇଥିଲେ। ୨୦୧୯ ସାଧାରଣ ନିର୍ବାଚନରେ ମଧ୍ୟ ବିଜେଡି ସହ ଭାଜପା କଡ଼ା ଟକ୍କର ଦେଇଥିଲା। ବିଜେଡି ୫୫.୧୮%, ଭାଜପା ୪୦.୩୭% ଓ କଂଗ୍ରେସକୁ ମାତ୍ର ୨.୭୯% ଭୋଟ ମିଳିଥିଲା। ଏହି ଭୋଟହାରକୁ ଅବଲୋକନ କଲେ ବିଜେଡି ଚିନ୍ତିତ ହେବା ସ୍ବାଭାବିକ। ତେଣୁ କଳେବଳେ କୌଶଳେ ଭୋଟ ଅକ୍ତିଆର କରିବାକୁ ଯୋଜନା ହେଉଥିବା ଆଲୋଚନା ହେଉଛି। ତେବେ ସରକାରୀ ଯୋଜନାକୁ ଆଳ କରି ଚେତାବନୀ ସମ୍ପର୍କରେ ବିଧାୟିକା ମଲ୍ଲିକ କହିଛନ୍ତି, ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିଛିି, ଲୋକମାନଙ୍କୁ ତାଙ୍କ ପ୍ରାର୍ଥୀଙ୍କୁ ଭୋଟ ଦେବାକୁ ଅନୁରୋଧ କରିଛିି, ଏଥିରେ ଅସୁବିଧା କ’ଣ ହେଲା ବୋଲି ସେ ଓଲଟା ପ୍ରଶ୍ନ କରିଛନ୍ତି।
