ଭବାନୀପାଟଣା/ଗୋଲାମୁଣ୍ଡା,୩୦।୭(ଉତ୍ତମ କୁମାର ଦାଶ/ବଟକୃଷ୍ଣ ପଣ୍ଡା): କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକରେ ପ୍ରବଳ ବର୍ଷା ଯାହାକି ଜରୁରୀକାଳୀନ ପରିସ୍ଥିତି ସୃଷ୍ଟି କରିଛି, ସେହି ସମୟରେ ବିପନ୍ନଙ୍କ ପାଇଁ ଦେବଦୂତ ସାଜିଛି ‘ବିନ୍ଦୁମିନା ସେବା ଫାଉଣ୍ଡେଶନ’। ବ୍ଲକରେ କ୍ରମାଗତ ଦୁଇ ଦିନ ଧରି ଯଥାକ୍ରମେ ୧୦୨ ମିମି ଏବଂ ୧୩୪ ମିମି ବର୍ଷା ହେବା ଫଳରେ ସମଗ୍ର ଅଞ୍ଚଳରେ ବ୍ୟାପକ କ୍ଷୟକ୍ଷତି ଘଟିଛି। ୨୮ଟି ଯାକ ପଞ୍ଚାୟତରେ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡ଼ିଥିବାବେଳେ ବହୁ ଗରିବ ପରିବାରଙ୍କ ମାଟିଘର ଭାଙ୍ଗିଯାଇଛି ଏବଂ ଅନେକ ତଳିଆ ଅଞ୍ଚଳ ଜଳବନ୍ଦୀ ହୋଇ ରହିଛି।
ଚୁଲି ଜଳୁ ନଥିବାରୁ ଏବଂ ଖାଦ୍ୟ ଅଭାବରୁ ଶିଶୁ ଓ ବୃଦ୍ଧବୃଦ୍ଧାମାନେ ସଂଘର୍ଷ କରୁଥିବା ବେଳେ ଫାଉଣ୍ଡେଶନ ପକ୍ଷରୁ ସମସ୍ତ ୨୮ଟି ପଞ୍ଚାୟତର କୋଣ-ଅନୁକୋଣରେ ପହଞ୍ଚି ଯୋଗ୍ୟ ପରିବାରଙ୍କୁ ଚିହ୍ନଟ କରାଯାଇଛି। ପ୍ରଶାସନିକ ସହାୟତା ପହଞ୍ଚିବା ପୂର୍ବରୁ ଫାଉଣ୍ଡେଶନର ସଦସ୍ୟମାନେ ବିପନ୍ନଙ୍କ ଦୁଆର ମୁହଁରେ ପହଞ୍ଚି ଚାଉଳ, ଡାଲି, ତେଲ, ଆଳୁ ସମେତ ବିସ୍କୁଟ, ମିକ୍ଚର, ସାବୁନ ଓ ଛତା ଆଦି ଅତ୍ୟାବଶ୍ୟକୀୟ ସାମଗ୍ରୀ ବଣ୍ଟନ କରିଛନ୍ତି। ଏହି ତ୍ୱରିତ ପଦକ୍ଷେପ ଯୋଗୁ ଶତାଧିକ ପରିବାର ଭୋକଉପାସରୁ ରକ୍ଷା ପାଇପାରିଛନ୍ତି।
ବିନ୍ଦୁମିନା ସେବା ଫାଉଣ୍ଡେଶନର ଅଧ୍ୟକ୍ଷ ତଥା ଗୋଲାମୁଣ୍ଡା ବ୍ଲକ ଅଧ୍ୟକ୍ଷ ବିନ୍ଦୁ ମହାନନ୍ଦଙ୍କ ସଫଳ ନେତୃତ୍ୱ ଓ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ମାନବୀୟ କାର୍ଯ୍ୟକ୍ରମ ପରିଚାଳିତ ହେଉଛି। ବିପର୍ଯ୍ୟୟ ସମୟରେ ବ୍ଲକ ଅଧ୍ୟକ୍ଷ ନିଜେ କ୍ଷେତ୍ରସ୍ତରକୁ ଓହ୍ଲାଇ କାମ କରିଥିବାରୁ ସ୍ଥାନୀୟ ଜନସାଧାରଣ ତାଙ୍କୁ କୃତଜ୍ଞତା ଓ ସାଧୁବାଦ ଜଣାଇଛନ୍ତି। ଏହି ମହତ୍ କାର୍ଯ୍ୟରେ ଜୟନ୍ତ ସିଂ, ବସନ୍ତ ଚଲାନ, ଦୁର୍ଗେଶ ଅଗ୍ରୱାଲ, ବିଶି କେଶନ ଜୋତିଶ, ଭାଗ୍ୟବାନ ବାଗ, ବୈଶାଖୁ କେତକୀଙ୍କ ସମେତ ଅଞ୍ଚଳର ବହୁ ଯୁବକ ଓ ବିଶିଷ୍ଟ ବ୍ୟକ୍ତି ଦିନରାତି ଏକ କରି ସାମଗ୍ରୀ ପହଞ୍ଚାଇବାରେ ସମ୍ପୂର୍ଣ୍ଣ ସହଯୋଗ କରିଛନ୍ତି। ଆଗାମୀ ଦିନରେ ମଧ୍ୟ ଏହି ସେବା କାର୍ଯ୍ୟ ଜାରି ରହିବ ବୋଲି ଫାଉଣ୍ଡେଶନ ପକ୍ଷରୁ ସୂଚନା ଦିଆଯାଇଛି।
