ଅହମଦାବାଦ,୧୮ ।୮: ବିଲକିସ ବାନୋ ବଳାତ୍କାର ମାମଲାର ସମସ୍ତ ୧୧ ଦୋଷୀଙ୍କୁ ଜେଲରୁ ମୁକୁଳାଇ ଦେବା ପରେ ପ୍ରଥମ ପ୍ରତିକ୍ରିୟା ରଖିଛନ୍ତି ପୀଡ଼ିତା ବିଲକିସ ବାନୋ । ସେ କହିଛନ୍ତି, ୧୫ ଅଗଷ୍ଟ ୨୦୨୨ରେ ମୋ ଉପରେ ଯେମିତି ୨୦ ବର୍ଷ ପୁରୁଣା ଦୁଃଖର ପାହାଡ ପୁଣିଥିରେ ଭାଙ୍ଗି ପଡିଛି । ଯେତେବେଳେ ମୁଁ ଶୁଣିଲି ମୋ ଜୀବନକୁ ସମ୍ପୂର୍ଣ୍ଣ ନଷ୍ଟ କିରିଦେଇଥିବା, ମୋ ଆଖି ସାମ୍ନାରେ ମୋ ପରିବାରକୁ ଶେଷ କରିଦେବା, ମୋ ୩ ବର୍ଷର ଝିଅକ ମୋଠାରୁ ଛଡାଇ ନେବା ଏ ସମସ୍ତ ଦୋଷର ୧୧ ଜଣ ଦୋଷୀଙ୍କୁ ଜେଲରୁ ମୁକୁଳାଇ ଦିଆଯାଇଛି । ଏବେ ସେମାନେ ଖୁସିରେ ବୁଲୁଛନ୍ତି । ଏହା ଶୁଣିବା ପରେ ମୋ ପାଖରେ ଆଉ କୌଣସି ଶବ୍ଦ ନାହିଁ କହିବାକୁ, ମୁଁ ନିର୍ବାକ ହୋଇଯାଇଛି ।
ମୁଁ କେବଳ ଏତିକି କହିପାରିବି, ଏହା କ’ଣ ଜଣେ ମହିଳାଙ୍କୁ ନ୍ୟାୟ ଦେବାର ଅନ୍ତ । ଦେଶର ସର୍ବୋଚ୍ଚ ନ୍ୟାୟାଳୟ ଉପରେ ମୁଁ ଭରସା ରଖିଥିଲି, ମୁଁ ଏହି ବ୍ୟବସ୍ଥା ଉପରେ ବିଶ୍ୱାସ କରିଥିଲି, ମୁଁ ଧୀରେ ଧୀରେ ମୋ ଦୁଃଖ ଭିତରେ ବଞ୍ଚିବା ଶିଖୁଥିଲି । ହେଲେ ୧୧ ଦୋଷୀଙ୍କୁ ମୁକ୍ତ କରିବା ମୋ ଶାନ୍ତିକୁ ପୁଣି ଛଡାଇ ନେଇଛି ଓ ନ୍ୟାୟ ବ୍ୟବସ୍ଥା ଉପରେ ଥିବା ମୋ ଭରସାକୁ ଦୋହଲାଇ ଦେଇଛି । ତେବେ ଏହା କେବଳ ମୋ ପାଇଁ ନୁହେଁ ଆଇନର ଲଢେଇ ଲଢୁଥିବା ଦେଶର ସମସ୍ତ ମହିଳାଙ୍କ ପାଇଁ ଏହା ଏକ ଆଶ୍ଚର୍ଯ୍ୟ କରିବା ଭଳି ରାୟ । ଏମାନଙ୍କୁ ମୁକ୍ତ କରିବା ପୂର୍ବରୁ ମୋତେ କେହି ଥରେ ପଚାରି ନାହାନ୍ତି ବା ମୋ ସୁରକ୍ଷା କଥା ଚିନ୍ତା କରି ନାହାନ୍ତି ବୋଲି କହିଛନ୍ତି ବାନୋ ।
ସଚନାଯୋଗ୍ୟ, ୨୭ ଫେବୃୟାରୀ ୨୦୦୨ରେ ଗୁଜରାଟର ଗୋଧରା ଷ୍ଟେଶନରେ ସାବରମତି ଏକ୍ସପ୍ରେସର କୋଚକୁ ଜଳାଇ ଦିଆଯାଇଥିଲା । ଏଥିରେ କରସେବକ ଅଯୋଦ୍ଧ୍ୟାରୁ ଫେରୁଥିଲେ । ଏହି କରସେବକଙ୍କ ମଧ୍ୟରୁ ୫୮ ଜଣଙ୍କ ମୃତ୍ୟୁ ହୋଇଥିଲା । ଏହାପରେ ଗୁଜରାଟରେ ଦଙ୍ଗା ଉପୁଜିଥିଲା । ଏହି ଦଙ୍ଗାର ନିଆଁରୁ ନିଜକୁ ବଞ୍ଚାଇବାକୁ ବିଲକିସ ବାନୋ ତାଙ୍କ ପିଲ ଓ ପରିବାର ସହ ଗାଁ ଛାଡି ଚାଲି ଯାଇଥିଲେ । ହେଲେ ସେମାନେ ଯେଉଁଠାରେ ଲୁଚି ରହିଥିଲେ ସେଠାରେ ୩ ମାର୍ଚ୍ଚ ୨୦୦୨ରେ ୨୦-୩୦ ଲୋକ ଭିଡ ଭିତରେ ଖଣ୍ଡା ଓ ଲାଠିରେ ଆକ୍ରମଣ କରିଥିଲେ । ଏହାସହ ଏହି ଭିଡ ଭିତରେ ବିଲକିସ ବାନୋଙ୍କୁ ବଳାତ୍କାର କରିଥିଲେ । ସେତେବେଳେ ବିଲକିସ ୫ ମାସର ଗର୍ଭବତୀ ଥିଲେ । କେବଳ ସେତିକି ନୁହେଁ ତାଙ୍କ ପରିବାରର ୭ ଜଣଙ୍କୁ ହତ୍ୟା କରିଥିଲେ । ଅନ୍ୟ ୬ ଜଣ ସେଠାରୁ ପଳାଇ ଯାଇଥିଲେ ।
