ଦିଗପହଣ୍ଡି,୧୩।୮(ଅଶେଷ ନାଥ ମିଶ୍ର) ଦିଗପହଣ୍ଡି – ବ୍ରହ୍ମପୁର ୧୭ ନଂ ରାଜ୍ୟ ରାଜପଥର ଖେମୁଣ୍ଡି କାଳୁଆ ଛକଠାରେ ବୁଧବାର ଅପରାହ୍ନରେ ଏକ ଦୃତଗାମୀ କାର ଧକ୍କାରେ ଜଣେ ବାଇକ ଚାଳକ ଗୁରୁତର ହୋଇଥିବା ଜଣାପଡିଛି । ଗୁରୁତର ବାଇକ ଚାଳକ ଜଣକ ହେଲେ ଦିଗପହଣ୍ଡି ଥାନା ସିଦ୍ଧେଶ୍ୱର ପଞ୍ଚାୟତ ଗୋପାଳପୁର ଗ୍ରାମର ଉଦୟନାଥ ସ୍ବାଇଁଙ୍କ ଏକମାତ୍ର ପୁଅ ଜଗନ କୁମାର ସ୍ବାଇଁ (୨୩) । ଦୁର୍ଘଟଣା ସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ପରେ ଉତ୍ତେଜିତ ଲୋକେ ଟାୟାର ଜାଳି ରାସ୍ତା ଅବରୋଧ କରିଥିଲେ। ଫଳରେ ବ୍ରହ୍ମପୁର – ରାୟଗଡ଼ା – କୋରାପୁଟ – ମାଲକାନାଗିରି ଜିଲାକୁ ଯାଉଥିବା ଗାଡ଼ି ଅଟକି ରହିଥିଲା। ଜଗନ ନିଜ ବାଇକ ନଂ. ( ଓଡି ୦୭ ଏକେ ୨୮୩୯) ଯୋଗେ ମା’ ସୁଦଷ୍ଣା ସ୍ବାଇଁଙ୍କୁ ଆଣିବା ନିମନ୍ତେ ଗଣିଆନାଳ ଛକକୁ ଯାଉଥିଲେ । ଏହି ସମୟରେ ବ୍ରହ୍ମପୁର ଅଞ୍ଚଳର ୩ ଯୁବକ ଏକ କାର ନଂ. ( ଓ ଆର୍ ୦୭ ଜେଡ ୪୨୩୨) ଯୋଗେ ମା’ ବାଙ୍କେଶ୍ବରୀ ପୀଠକୁ ଏକ ଭୋଜି କାର୍ଯ୍ୟରେ ଯୋଗଦେବା ପାଇଁ ଦୃତ ଗତିରେ ଯିବା ବାଟରେ ଜଗନଙ୍କ ବାଇକକୁ ଧକ୍କା ଦେଇଥିଲେ। ଏହି ଦୁର୍ଘଟଣାରେ କାରଟିର ସମ୍ମୁଖଭାଗ ସମ୍ପୂର୍ଣ୍ଣ ନଷ୍ଟ ହୋଇଥିବା ବେଳେ ବାଇକ ସହ ଜଗନ ରାସ୍ତାକଡର ବିଲ ଭିତରକୁ ଛିଟିକି ପଡ଼ିଥିଲେ। ରାସ୍ତାରେ ଯା ଆସ କରୁଥିବା ଲୋକେ ଗୁରୁତର ଅବସ୍ଥାରେ ଜଗନକୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ବ୍ରହ୍ମପୁର ବଡ଼ ମେଡ଼ିକାଲ ପଠାଇଥିଲେ। ପ୍ରାଥମିକ ଚିକିତ୍ସାପରେ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ଭୁବନେଶ୍ୱର ସ୍ଥିତ ଏମ୍ସକୁ ସ୍ଥାନାନ୍ତରିତ କରାଯାଇଥିବା ସୂଚନା ମିଳିଛି। ଅପରପକ୍ଷରେ ଉତ୍ତ୍ୟକ୍ତ ଲୋକେ କାର୍ରେ ଥିବା ୩ ଯୁବକଙ୍କୁ କାବୁ କରି ଦିଗପହଣ୍ଡି ପୋଲିସରେ ଜିମା ଦେବା ସହ କ୍ଷତିପୂରଣ ଦାବିରେ ରାସ୍ତାରୋକ କରିଥିଲେ। ଦିଗପହଣ୍ଡି ପୋଲିସ ଓ ଚିକିଟି ଏସଡିପିଓ ବିଶାମିତ୍ର ହରପାଲ ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତା ଅବରୋଧ ହଟିଥିଲା। ପୋଲିସ ଦୁର୍ଘଟଣାଗ୍ରସ୍ତ ଦୁଇଟି ଗାଡ଼ି ଜବତ କରି ଥାନାକୁ ନେଇଛନ୍ତି। ସ୍ଥାନୀୟ ସରପଞ୍ଚ ବିଜୟ ପ୍ରଧାନ ଏବଂ ସମିତି ସଭ୍ୟ ପ୍ରତିନିଧି ବାବୁନ ବାବୁନି ପ୍ରଧାନଙ୍କ ସମେତ ପରିବାର ଲୋକେ ଦିଗପହଣ୍ଡି ଥାନାରେ ପହଞ୍ଚି ଏତଲା ଦେଇଥିବା ଜଣାପଡିଛି ।
