ଲାଞ୍ଜିଗଡ଼,୨୭।୮(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ଲାଖବାହିଲି ପଞ୍ଚାୟତର ପତରପଡ଼ାଠାରେ ବିକଶିତ ଗାଁ ବିକଶିତ ଓଡ଼ିଶା କାମ ସ୍ଥାନାନ୍ତରିତ ନେଇ ଟଣାଓଟରା ହେଉଥିବା ବେଳେ ଗୋଟିଏ କାମ ପାଇଁ ୨ଗୋଟି ଫଳକ ଲାଗିଥିବା ଅଭିଯୋଗ। ପ୍ରତ୍ୟେକ ଗାଁରେ ସରକାରଙ୍କ ମୌଳିକ ସୁବିଧା ସୁଯୋଗ ପହଞ୍ଚିବ। ସରକାରୀ ଯୋଜନାରୁ କେହି ମଧ୍ୟ ବଞ୍ଚିତ ରହିବେ ନାହିଁ। ଗାଁରେ ଶିକ୍ଷା, ସ୍ବାସ୍ଥ୍ୟ, ଗମନାଗମନ, ବିଜୁଳି ଭଳି ରହିଥିବା ସମସ୍ୟା ଦୂର କରିବା ପାଇଁ ବିକଶିତ ଗାଁ, ବିକଶିତ ଓଡ଼ିଶାର ଅନୁଦାନ ପ୍ରତ୍ୟେକ ପଞ୍ଚାୟତକୁ ପହଞ୍ଚିଛି। ଏହି ପରିପ୍ରେକ୍ଷୀରେ ଲାଞ୍ଜିଗଡ଼ ବ୍ଲକରେ ମଧ୍ୟ ବିକଶିତ ଗାଁ ବିକଶିତ ଓଡ଼ିଶାର ତିନି କୋଟିରୁ ଉର୍ଦ୍ଧ ଟଙ୍କା ଅନୁଦାନ ଆସିଛି। ଏହି ଅନୁଦାନ ରାଶି ବ୍ଲକର ବିଭିନ୍ନ ପ୍ରକଳ୍ପ ପାଇଁ କମ ପଡୁଥିବା ବେଳେ ପ୍ରତ୍ୟେକ ପଞ୍ଚାୟତର ଅତି ଆବଶ୍ୟକ କାମ କରିବା ପାଇଁ ଭାଗ ବଣ୍ଟା ହୋଇଛି। ହେଲେ ଏହି ଅନୁଦାନ ଆସିବା ପୂର୍ବରୁ ବ୍ଲକର ପଞ୍ଚାୟତ ମାନଙ୍କରେ ସରପଞ୍ଚ, ସମିତି ସଭ୍ୟ, ୱାଡ଼ମେମ୍ବର ଓ ପଞ୍ଚାୟତବାସୀଙ୍କ ଉପସ୍ଥିତିରେ ପଲ୍ଲୀସଭା ଓ ଗ୍ରାମସଭା ମାଧ୍ୟମରେ ବିଭିନ୍ନ ପ୍ରକଳ୍ପ ରଖାଯାଇଥିଲା। ଇତି ମଧ୍ୟରେ ସରକାର ବଦଳି ଯାଇଛି। ହେଲେ ଯେଉଁ ପ୍ରକଳ୍ପ ପାଇଁ ଅନୁଦାନ ରଖାଯାଇଥିଲା ତାହା ନକରି ସେହି ପ୍ରକଳ୍ପକୁ ଅନ୍ୟ ଗାଁକୁ ସ୍ଥାନାନ୍ତର କରାଯାଇଛି। ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଯାଇଛି। ଏଭଳି ଏକ ଘଟଣା ଦେଖିବାକୁ ମିଳିଛି ଲାଞ୍ଜିଗଡ ବ୍ଳକ ଲାଖବାହିଲି ପଞ୍ଚାୟତର ପତରପଡ଼ାଠାରେ। ପୂର୍ବରୁ ବ୍ଳକ ପ୍ରଶାସନ ପକ୍ଷରୁ ନିର୍ଦ୍ଧାରିତ ହୋଇଥିବା ପତରପଡ଼ା କଲବଟ ପାଇ ଚାରିଲକ୍ଷ ଟଙ୍କା ଆସି ଥିବା ବେଳେ କାମ ଆରମ୍ଭ ପୂର୍ବରୁ ଉକ୍ତ ସ୍ଥାନରେ ସୂଚନା ଫଳକ ଲାଗିଛି। କିନ୍ତୁ କାମ କରିବା ବିଳମ୍ବ ଓ ଦଳ ଗତ ରାଜନୀତି ଯୋଗୁଁ ସେହି ସ୍ଥାନରେ କାମ ନହୋଇ ଗାଁ ଠାରୁ ୨୦୦ ଶହ ମିଟର ଦୂରରେ ଥିବା ଲାଖବାହାଳି-ବାରଗୁଡା ଗାଁକୁ ସଂଯୋଗ କରୁଥିବା ମୁଖ୍ୟ ରାସ୍ତା କଡକୁ କାମ ସ୍ଥାନାନ୍ତରିତ କରାଯାଇ ସେଠାରେ ମଧ୍ୟ ଅନ୍ୟ ଏକ ସମାନ ସୂଚନା ଫଳକ ଲାଗିଛି। ହେଲେ ପତରପ କଲବଟ ନଥିବା ଯୋଗୁଁ ଛାତ୍ରୀଛାତ୍ରଙ୍କୁ ସ୍କୁଲ ଯିବା ଓ ଗୁରୁତର ରୋଗୀଙ୍କୁ ଡାକ୍ତରଖାନା ନେବାରେ ବହୁତ ଅସୁବିଧା ହେଉଛି । ଲୋକେ କାଠ ପକାଇ ବର୍ଷ ବର୍ଷ ଧରି ବିପଦ ସଂକେତ ଭାବେ ଯାତାୟାତ କରୁଥିବା ବେଳେ ସେହି ସ୍ଥାନରେ ହିଁ କଲଭଟ ନିହାତି ଆବଶ୍ୟକ ରହିଥିବା ବେଳେ ସେହି କାମକୁ ସ୍ଥାନାନ୍ତରିତ କରାଯାଇଛି ବୋଲି ପତରପଡାବାସୀ ଅସନ୍ତୋଷ ପ୍ରକାଶ କରିଛନ୍ତି। ତେବେ ଯେଉଁ ସ୍ଥାନରେ କାମ ଆବଶ୍ୟକ ଅଛି ସେହି ସ୍ଥାନରେ କରାଯାଉ ବୋଲି ଲାଖବାହିଲି ପୂର୍ବତନ ସରପଞ୍ଚ ରାମତୁ ମାଝୀ ପ୍ରକାଶ କରିଛନ୍ତି। ଏନେଇ ଲାଞ୍ଜିଗଡ ବିଡ଼ିଓ ଶଶାଙ୍କ ପାତ୍ରଙ୍କୁ ପଚାରିବାରୁ ପଞ୍ଚାୟତ ଦାୟିତ୍ୟରେ ଥିବା କନିଷ୍ଠ ଯନ୍ତ୍ରୀଙ୍କୁ ପଚାରିବି ଓ ଘଟଣାର ତଦନ୍ତ କରିବି ବୋଲି ପ୍ରକାଶ କରିଛନ୍ତି ।
