ଦାରିଙ୍ଗବାଡି,୧।୬(ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ବୁଡ଼ାଗୁଡା ଗ୍ରାମପଞ୍ଚାୟତରେ ପ୍ରଥମଥର ପାଇଁ ମିଳିତ ଅଭିଯୋଗ ଶୁଣାଣି କାର୍ଯ୍ୟକ୍ରମ ସୋମବାର ଅନୁଷ୍ଠିତ ହୋଇଯାଇଛି। ବିଡ଼ିଓ ପ୍ରୀତିରଞ୍ଜନ ରଥଙ୍କ ତତ୍ତ୍ୱାବଧାନରେ ଗ୍ରାମପଞ୍ଚାୟତ ଉନ୍ନୟନ ଅଧିକାରୀ ସୁରେଶ ପଣ୍ଡା, ସହକାରୀ ଏଡିଇଓ ବିମଳ ମଲିକ, ପଞ୍ଚାୟତ କାର୍ଯ୍ୟର୍ନିବାହୀ ଅଧିକାରୀ ଘନଶ୍ୟାମ ବେହେରା ଗ୍ରାମ୍ୟ ଜଲଯୋଗାଣ ବିଭାଗର ଯନ୍ତ୍ରୀ (୨ )ଓମ ଶଙ୍କର ପରିଡା, ରାଜସ୍ବ ନିରୀକ୍ଷକ ଯଶ୍ମୀନା ପ୍ରଧାନ,ସରପଞ୍ଚ ତାତୁରା ପ୍ରଧାନ ପ୍ରମୁଖ ମଞ୍ଚାସୀନ ରହି ଅଭିଯୋଗ ଶୁଣିଥିଲେ। ପ୍ରଥମଥର ପାଇଁ ଏହି ଅଭିଯୋଗ ଶୁଣାଣି ପଞ୍ଚାୟତସ୍ତରରେ ହେଉଥିବାରୁ ଏଥିରେ ୧୨ଟି ସାମୂହିକ ଅଭିଯୋଗ ଆସିଥିଲା। ସେଥିରେ ଭତ୍ତା, ପିଇବା ପାଣି, ଗ୍ରାମ୍ୟ ଉନ୍ନୟନ ବିଭାଗ ରାସ୍ତା ସମ୍ପ୍ରସାରଣବେଳେ ପାଇପ ନଷ୍ଟ କାରଣରୁ ଦୀର୍ଗ ଦିନ ଧରି ଜଳ ଯୋଗାଣ ବନ୍ଦ ରହିଛି ତାକୁ ଯୋଗାଇବା ବ୍ୟବସ୍ଥା, ବିଦ୍ୟୁତ ବିଭ୍ରାଟ, ମୋବାଇଲ ସେବା ଆଦି ମୌଳିକ ସୁବିଧାରୁ ଲୋକ ବଞ୍ଚିତ ହେଉଥିବା ଅଭିଯୋଗ ହୋଇଥିଲା।
ସୂଚନାଯୋଗ୍ୟ ଯେ, ପୂର୍ବରୁ ଏହି ଅଭିଯୋଗ ଜିଲା ଓ ବ୍ଲକ ସ୍ତରରେ କରାଯାଉଥିଲା ଏବେ ରାଜ୍ୟ ସରକାର ଏହି ଅଭିଯୋଗ ଶୁଣିବା ପାଇଁ ବ୍ଲକସ୍ତରୀୟ ବିଭିନ୍ନ ବିଭାଗର ଅଧିକାରୀ ମାନେ ଲୋକଙ୍କ ଅଭିଯୋଗ ଶୁଣିବାକୁ ନିର୍ଦ୍ଦେଶ ରହିଛି। ଏହି କ୍ରମରେ ଚଳିତ ମାସର ପ୍ରଥମ ସୋମବାର ଏହା ଆରମ୍ଭ ହୋଇଥିବାବେଳେ ଛୁଟି ବ୍ୟତୀତ ସମସ୍ତ ସୋମବାର ଗୋଟିଏ ଲେଖାଏ ପଞ୍ଚାୟତ କାର୍ଯ୍ୟଳୟରେ ଏହି ଅଭିଯୋଗ ଶୁଣାଣି କରାଯିବ ବୋଲି ବିଡ଼ିଓ ପ୍ରୀତିରଞ୍ଜନ ରଥ କହିଛନ୍ତି।
Dharitri – Odisha’s No.1 Odia Daily
