ନୂଆଦିଲ୍ଲୀ,୨।୯: ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (BCCI) ଗୁରୁବାର ୩ ସେପ୍ଟେମ୍ବରରେ ମୁମ୍ବାଇ ସ୍ଥିତ ଅଫିସ୍ରେ ଏକ ହାଇ-ଲେଭଲ୍ ମିଟିଂ କରିବ। ଏହି ବୈଠକରେ ବୋର୍ଡର ସମସ୍ତ ପଦାଧିକାରୀଙ୍କ ସହ ଟିମ୍ ଇଣ୍ଡିଆର ହେଡ୍ କୋଚ୍ ଗୌତମ ଗମ୍ଭୀର, ଚିଫ୍ ସିଲେକ୍ଟର ଅଜିତ ଅଗରକର ଏବଂ ସେଣ୍ଟର ଅଫ୍ ଏକ୍ସିଲେନ୍ସ (COE)ର ମୁଖ୍ୟ VVS ଲକ୍ଷ୍ମଣ ମଧ୍ୟ ସାମିଲ ହେବେ।
ସବୁଠାରୁ ବଡ଼ କଥା ହେଉଛି, ଏହି ବୈଠକରେ ଷ୍ଟାର୍ ବ୍ୟାଟର୍ ରୋହିତ ଶର୍ମାଙ୍କ ଭବିଷ୍ୟତକୁ ନେଇ ଆଲୋଚନା ହୋଇପାରେ । ୨୦୨୭ ଓଡିଆଇ ବିଶ୍ୱକପ୍ରେ ରୋହିତ ଖେଳିବେ କି ନାହିଁ, ସେନେଇ ମଧ୍ୟ ବଡ଼ ନିଷ୍ପତ୍ତି ହୋଇପାରେ। ଇଂଲଣ୍ଡ ଓ ଆୟର୍ଲାଣ୍ଡରେ ଟିମ୍ ଇଣ୍ଡିଆର ସାମ୍ପ୍ରତିକ ପରାଜୟ ଏବଂ ଇଂଲଣ୍ଡ ବିପକ୍ଷ ଓଡିଆଇ ସିରିଜ୍ରେ ମିଳିଥିବା ହାରକୁ ନେଇ ପୂର୍ବରୁ ଏହି ବୈଠକ ଡକାଯାଇଥିଲା। କିନ୍ତୁ ଜିମ୍ବାୱେ ଟି-୨୦ ସିରିଜ୍ ଏବଂ ଶ୍ରୀଲଙ୍କା ବିପକ୍ଷ ଟେଷ୍ଟ ସିରିଜ୍ କାରଣରୁ ବୈଠକକୁ ସ୍ଥଗିତ ରଖାଯାଇଥିଲା। ପରେ ଭାରତ ଜିମ୍ବାୱେ ଟି-୨୦ ଏବଂ ଶ୍ରୀଲଙ୍କା ବିପକ୍ଷ ଟେଷ୍ଟ ସିରିଜ୍ ଜିତିଥିଲା। ଏବେ ଗୁରୁବାର ହେବାକୁ ଥିବା ବୈଠକରେ ସିନିୟର ପୁରୁଷ ଦଳର ସାମ୍ପ୍ରତିକ ପ୍ରଦର୍ଶନର ବିସ୍ତୃତ ସମୀକ୍ଷା କରାଯିବ। କେଉଁଠି ଭୁଲ୍ ହେଲା ଏବଂ କେଉଁ ଦିଗ ଭଲ ରହିଲା, ତାହା ଉପରେ ଆଲୋଚନା ହେବ।
ରୋହିତ ଶର୍ମାଙ୍କ ୨୦୨୭ ଓଡିଆଇ ବିଶ୍ୱକପ୍ ପ୍ଲାନ୍ରେ ନଥିବା ନେଇ କିଛି ମିଡିଆ ରିପୋର୍ଟ ପ୍ରକାଶ ପାଇଛି । ତେଣୁ ଗୁରୁବାରର ବୈଠକରେ ଏହି ପ୍ରସଙ୍ଗ ଉପରେ ଆଲୋଚନା ହେବାର ସମ୍ଭାବନା ରହିଛି। ତେବେ ରୋହିତଙ୍କ ବିଷୟରେ ଏପର୍ଯ୍ୟନ୍ତ BCCI ପକ୍ଷରୁ କୌଣସି ଅଧିକାରିକ ଘୋଷଣା ହୋଇନାହିଁ ।
ବୈଠକରେ ହାର୍ଦ୍ଦିକ ପାଣ୍ଡ୍ୟାଙ୍କ ସମେତ ଅନେକ ଖେଳାଳିଙ୍କ ଆଘାତ ଓ ଫିଟନେସ୍କୁ ନେଇ ମଧ୍ୟ ଆଲୋଚନା ହେବ । ଏହା ସହ ନ୍ୟୁଜିଲାଣ୍ଡର ମଲ୍ଟି-ଫର୍ମାଟ୍ ଗସ୍ତ, ଘରୋଇ ବର୍ଡର-ଗାଭାସ୍କର ଟ୍ରଫି ଏବଂ ୨୦୨୭ ପୁରୁଷ ଓଡିଆଇ ବିଶ୍ୱକପ୍ ପାଇଁ ଭବିଷ୍ୟତ ଯୋଜନା ଉପରେ ମଧ୍ୟ ରୋଡମ୍ୟାପ୍ ପ୍ରସ୍ତୁତ ହୋଇପାରେ। କେବଳ ରୋହିତ ଶର୍ମା ନୁହେଁ, ଚିଫ୍ ସିଲେକ୍ଟର ଅଜିତ ଅଗରକରଙ୍କ ଭବିଷ୍ୟତ ନେଇ ମଧ୍ୟ ଏହି ବୈଠକରେ ଆଲୋଚନା ହୋଇପାରେ। ତେବେ ଏନେଇ ମଧ୍ୟ ବର୍ତ୍ତମାନ ସୁଦ୍ଧା କୌଣସି ଅଧିକାରିକ ସୂଚନା ସାମ୍ନାକୁ ଆସିନାହିଁ।
