ନୂଆଦିଲ୍ଲୀ,୭।୯: ମହଙ୍ଗା ପଡ଼ିଲା ଇନିଂସର ୧୯ତମ ଓଭର। ଏଥିଯୋଗୁ ସୁପର-୪ ମୁକାବିଲାରେ ପ୍ରଥମେ ପାକିସ୍ତାନ ଏବଂ ପରେ ଶ୍ରୀଲଙ୍କାଠାରୁ ପରାଜିତ ହୋଇଛି ଟିମ୍ ଇଣ୍ଡିଆ। କିଛି ଏଭଳି ଚର୍ଚ୍ଚା ଏବେ ବଢ଼ିବାରେ ଲାଗିଛି। କାରଣ ଉଭୟ ମ୍ୟାଚ୍ରେ ଦଳ ଶେଷ ଓଭରରେ ହାରିଛି।
ଟି-୨୦ କ୍ରିକେଟରେ ଶେଷ ଓଭରର ଗୁରୁତ୍ୱ ଅଧିକ ଥାଏ। ବିଶେଷକରି ୧୯ତମ ଓଭରରେ। ଏଥିରେ ଚାପ ଅଧିକ କିମ୍ବା କମ୍ ଉପରେ ହିଁ ମ୍ୟାଚ୍ର ସ୍ଥିତି ନିର୍ଦ୍ଧାରିତ ହୋଇଥାଏ। ଭାରତ ଖେଳିଥିବା ଦୁଇଟି ଯାକ ମ୍ୟାଚ୍ରେ ଏହି ଗୁରୁତ୍ୱପୂର୍ଣ୍ଣ ଓଭରରେ ବୋଲିଂ ଦାୟିତ୍ୱ ଭୁବନେଶ୍ୱର କୁମାରଙ୍କୁ ଦିଆଯାଇଥିଲା। ତାଙ୍କ ଓଭରରେ ବ୍ୟାଟ୍ସମ୍ୟାନ୍ ଜବରଦସ୍ତ ବ୍ୟାଟିଂ କରିଥିଲେ। ଏଥିଯୋଗୁ ବିରୋଧୀ ଟିମ୍ ସହଜରେ ଲକ୍ଷ୍ୟ ହାସଲ କରିନେବାରେ ସଫଳ ହୋଇଥିଲା।
ପାକସ୍ତାନ ବିପକ୍ଷ ମ୍ୟାଚ୍ରେ ଦଳକୁ ଜିତିବା ଲାଗି ଶେଷ ଦୁଇ ଓଭରରେ ୨୬ ରନ୍ର ଆବଶ୍ୟକତା ଥିଲା। ହେଲେ ଭୁବନେଶ୍ୱର ୧୯ତମ ଓଭରରେ ବୋଲିଂ କରି ୧୯ ରନ୍ ଦେଇ ଦେଇଥିଲେ। ଏହାପରେ ପାକିସ୍ତାନ ସହଜରେ ଜିତି ଯାଇଥିଲା। ସେହିଭଳି ଶ୍ରୀଲଙ୍କା ବିପକ୍ଷରେ ସେ ୧୪ ରନ୍ ଦେଇଥିଲେ। ଫଳରେ ଶ୍ରୀଲଙ୍କା ସହଜରେ ଲକ୍ଷ୍ୟ ହାସଲ କରିନେଇଥିଲା। ଏହାକୁ ନେଇ ଭୁବନେଶ୍ୱର ୨ ଓଭରରେ ଭାରତକୁ ବୁଡ଼ାଇ ଦେଇଥିବା ନେଇ କୁହାଯାଇଛି।
