ଲଣ୍ଡନ,୨୮।୪: ଷ୍ଟାର ଅଲରାଉଣ୍ଡର ବେନ ଷ୍ଟୋକ୍ସଙ୍କୁ ଇଂଲଣ୍ଡର ନୂତନ ଟେଷ୍ଟ ଅଧିନାୟକ ଭାବେ ମନୋନୀତ କରାଯାଇଛି। ଜୋ ରୁଟଙ୍କ ଇସ୍ତଫା ପରେ ଷ୍ଟୋକ୍ସ ଏବଂ ଜନି ବେୟାରଷ୍ଟୋଙ୍କ ସମେତ ଅନେକ ଖେଳାଳି ଇଂଲଣ୍ଡର ଅଧିନାୟକ ଦୌଡ଼ରେ ଥିଲେ, କିନ୍ତୁ ଷ୍ଟୋକ୍ସ ଏହି ରେସ ଜିତିଛନ୍ତି। ଷ୍ଟୋକ୍ସ ଏ ପର୍ଯ୍ୟନ୍ତ ଇଂଲଣ୍ଡ ପାଇଁ ୭୯ଟି ଟେଷ୍ଟ ମ୍ୟାଚ ଖେଳି ୧୧ଟି ଶତକ ଏବଂ ୨୬ଟି ଅର୍ଦ୍ଧାଶତକ ସହ ୫୦୬୧ ରନ ସଂଗ୍ରହ କରିଛନ୍ତି। ଏଥିସହ ସେ ୧୭୪ ଉଇକେଟ ନେଇଛନ୍ତି।
ୱେଷ୍ଟଇଣ୍ଡିଜ ବିପକ୍ଷ ଟେଷ୍ଟ ସିରିଜରେ ଦଳ ୧-୦ରେ ପରାସ୍ତ ହେବା ପରେ ଜୋ ରୁଟ ଅଧିନାୟକ ପଦରୁ ଇସ୍ତଫା ଦେଇଥିଲେ। ଏହି ସିରିଜରେ ହାରିଯିବା ପରେ ଇଂଲଣ୍ଡ ଦଳ ବିଶ୍ୱ ଟେଷ୍ଟ ଚାମ୍ପିୟନଶିପ ଟେବୁଲର ଟେବୁଲ ୯ମ ସ୍ଥାନରେ ଅଛି। ବର୍ତ୍ତମାନ ତାଙ୍କ ଦଳକୁ ଉଠାଇବା ଷ୍ଟୋକ୍ସଙ୍କ ମୁଖ୍ୟ ଦାୟିତ୍ୱ ହେବ।
