ବଅଁରପାଳ,୧୬ା୭(ଡି.ଏନ.ଏ.) ଅନେକ ମେକାନିକ ଅଛନ୍ତି ଯେଉଁମାନେ ଗ୍ରାହକଙ୍କଠାରୁ ଅଧିକ ଅର୍ଥ ନେବାରେ ଆଗ୍ରହ ରଖନ୍ତି। ସେମାନେ ଦାବି କରିଥିବା ଅର୍ଥ ପରିଶ୍ରମର ଉଚିତ ମୂଲ୍ୟ କି ନୁହେଁ ତାହା ଦେଖନ୍ତିନି। କିନ୍ତୁ ଦୀର୍ଘ ୧୩ ବର୍ଷର ଓଲଡିଂ କାମ ମଧ୍ୟରେ ଏପରି କରିବାକୁ ମନ ବଳାଇନାହିଁ। ଗ୍ରାହକଙ୍କୁ ଶୋଷଣ କରିବା ଅପେକ୍ଷା ସେମାନଙ୍କୁ ପାରୁ ପର୍ଯ୍ୟନ୍ତ ସେବା ଯୋଗାଇବାରେ ବିଶ୍ୱାସ ରଖେ ବୋଲି କହିଛନ୍ତି ଅନୁଗୋଳ ଜିଲା ବଅଁରପାଳ ବଜାରର ଫାଇବର ଓଲଡିଂ ମିସ୍ତ୍ରି ଲମ୍ବୋଦର ସାହୁ।
ଲମ୍ବୋଦର କହିଛନ୍ତି, ବଅଁରପାଳରେ ଦୋକାନ କରିଥିଲେ ବି ତାଙ୍କ ଘର ଅନୁଗୋଳ ବ୍ଲକ ଅଙ୍ଗାରବନ୍ଧ ସମାକୋଇ ଗ୍ରାମରେ। ଗଁା ସ୍କୁଲରେ ସେ ୧୦ମ ଶ୍ରେଣୀ ଯାଏ ପଢ଼ିଛନ୍ତି। ପରିବାରର ଆର୍ଥିକ ଅବସ୍ଥା ଦୁର୍ବଳ ଥିବାରୁ ସେ ରୋଜଗାର ଆଶାରେ ଛତିଶଗଡ଼ ପଳାଇଥିଲେ। ସେଠାରେ କିଛି ବର୍ଷ ଏକ କମ୍ପାନୀରେ କାର୍ଯ୍ୟ କରିବା ପରେ ତାଳଚେର ପଳାଇ ଆସି ଫାଇଭର ଓଲଡିଂ ଉପରେ ତାଲିମ ନେଇଥିଲେ। ଏହାପରେ ବଅଁରପାଳ ବଜାରରେ ଦୋକାନ ଖୋଲି ଓଲଡିଂ କାର୍ଯ୍ୟ କରୁଛନ୍ତି। ବସ୍, ଟ୍ରକ୍, କାର ଓ ବାଇକ୍ର ଭାଙ୍ଗି ଯାଇଥିବା ଫାଇବର ପାର୍ଟ ଯୋଡ଼ିବା ତାଙ୍କର ମୁଖ୍ୟ କାମ। ଏଥିପାଇଁ ତାଙ୍କର ବହୁ ଗ୍ରାହକ ଅଛନ୍ତି। ଭଲ ଓଲଡିଂ କରୁଥିବାରୁ ଆଖପାଖ ଅଞ୍ଚଳର ଲୋକମାନେ ମଧ୍ୟ ସେମାନଙ୍କ ଭଙ୍ଗା ପ୍ଲାଷ୍ଟିକ ଓ ଫାଇବର ପାଣି ଟାଙ୍କି ଧରି ଆସିଥାନ୍ତି। ଗ୍ରାହକମାନେ ଯେପରି ଅଧିକ ଖର୍ଚ୍ଚାନ୍ତ ନ ହେବେ ସେଥିପାଇଁ ନୂଆ ପରିବର୍ତ୍ତେ ପୁରୁଣା ଫାଇବର ସାମଗ୍ରୀରେ ସେ କାମ ଚଳାଇ ନେଇଥାନ୍ତି। ଏଥିପାଇଁ ଅଧିକ ଅର୍ଥ ମଧ୍ୟ ଦାବି କରନ୍ତି ନାହିଁ। ଦୈନିକ ସକାଳ ୬ଟାରୁ ଉଠି କାମ ସାରି ୮ଟା ସୁଦ୍ଧା ଦୋକାନରେ ପହଞ୍ଚିଯାଆନ୍ତି। ସନ୍ଧ୍ୟା ପର୍ଯ୍ୟନ୍ତ ପରିଶ୍ରମ କରି ଯାହା କିଛି ରୋଜଗାର କରନ୍ତି ସେଥିରେ ସ୍ତ୍ରୀ ଓ ୨ ଝିଅ ଚଳିଯାଉଛନ୍ତି ବୋଲି ଲମ୍ବୋଦର ପ୍ରକାଶ କରିଛନ୍ତି।
