ପାଟନା,୧୬ ।୯: ବିହାର ବେଗୁସରାଇରେ ଆଖିବୁଜା ଗୁଳିଚାଳନା ମାମଲାରେ ପୋଲିସ ଜଣେ ଅଭିଯୁକ୍ତଙ୍କୁ ଚଳନ୍ତା ଟ୍ରେନରୁ ଗିରଫ କରିଥିବା ଜଣାପଡିଛି । ଅଭିଯୁକ୍ତଙ୍କ ନାମ କେଶବ ବୋଲି କୁହାଯାଉଛି । ପୋଲିସ ଗୁପ୍ତ ସୂଚନା ପାଇବା ପରେ ଚଳନ୍ତା ଟ୍ରେନରୁ ଅଭିଯୁକ୍ତଙ୍କୁ ଗିରଫ କରିଛି । ଏହା ପୂର୍ବରୁ ପୋଲିସ ଗୁରୁବାର ୪ ସନ୍ଦିଗ୍ଧ ଅଭିଯୁକ୍ତଙ୍କୁ ଗିରଫ କରିଥିଲା ।
ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତ କେଶବ ମୌର୍ଯ୍ୟ ଏକ୍ସପ୍ରେସ ଟ୍ରେନରେ ଯାତ୍ରା କରୁଥିଲେ । ଏହାର ସୂଚନା ପାଇବା ପରେ ଝାଝା ପୋଲିସ ବଡ ସତର୍କତାର ସହ ଚଳନ୍ତା ଟ୍ରେନରୁ କେଶବଙ୍କୁ ଗିରଫ କରିଥିଲା । ଏହାପରେ ଝାଝା ପୋଲିସ କେଶବଙ୍କୁ ବେଗୁସରାଇ ପୋଲିସକୁ ହସ୍ତାନ୍ତର କରି ଦେଇଥିଲା ।
ସୂଚନାଯୋଗ୍ୟ, ବେଗୁସରାଇରେ ମଙ୍ଗଳବାର ସନ୍ଧ୍ୟାରେ ପ୍ରାୟ ୫ଟାରେ ଦୁଇ ଦୁର୍ବୁତ୍ତ ନ୍ୟାଶନାଲ ହାଇୱେ ୨୮ରେ ଥିବା ୪ଟି ଥାନା ଅଞ୍ଚଳରେ ଆଖିବୁଜା ଗୁଳି ଚାଳନା କରି ତାଣ୍ଡବ ରଚିଥିଲେ । ଦୁର୍ବୁତ୍ତମାନେ ପ୍ରାୟ ୧୦ ଜଣଙ୍କୁ ଗୁଳି କରିଥିଲେ । ଏଥିରେ ୩୧ ବର୍ଷିୟ ଚନ୍ଦନ କୁମାରଙ୍କର ମୃତ୍ୟୁ ହୋଇଯାଇଥିଲା । ଦୁଇ ବନ୍ଧୁକଧାରୀ ପ୍ରାୟ ୩୦ କିଲୋମିଟର ଅଞ୍ଚଳରେ ଗୁଳି ବର୍ଷା କରି ଚାଲିଥିଲେ । ଯିଏବି ସାମ୍ନାକୁ ଆସିଥିଲା ତାକୁ ସେମାନେ ଟାର୍ଗେଟ କରିଥିଲେ । ହେଲେ ପୋଲିସ ଏମାନଙ୍କୁ ଅଟକାଇବାରେ ସକ୍ଷମ ହୋଇ ନ ଥିଲା । ପରେ ଏମାନଙ୍କୁ ଧରାଇଦେଲେ ୫୦ ହଜାର ଟଙ୍କାର ପୁରସ୍କାର ରାଶି ମିଳିବ ବୋଲି ପୋଲିସ ଘୋଷଣା କରିଥିଲା । ଏହି ଘଟଣାର କଡା ସମାଲୋଚନା ପରେ ସରକାର ୭ ପୋଲିସଙ୍କୁ ସସପେଣ୍ଡ ବି କରିଥିଲେ ।
