ନୂଆଦିଲ୍ଲୀ,୭।୯: ବେଡ ବଗ ବା ଛାରପୋକ ଏବଂ ମଶା କାହାର ବି ନିଦକୁ ନଷ୍ଟ କରିପାରନ୍ତି। ସେମାନେ ଟ୍ରେନ ପାଇଁ ମଧ୍ୟ ବିପଦ ସୃଷ୍ଟି କରିପାରନ୍ତି । ହଁ! ଆପଣଙ୍କୁ ଏହା ଶୁଣିବାକୁ ଆଶ୍ଚର୍ଯ୍ୟ ଲାଗିପାରେ, କିନ୍ତୁ ଏହା ସତ୍ୟ। ରେଳ ଚଳାଚଳ କକ୍ଷରେ ରଖାଯାଇଥିବା ଅଭିଯୋଗ ପୁସ୍ତକରେ ଲିପିବଦ୍ଧ ହୋଇଥିବା ଅଭିଯୋଗରୁ ଏହା ସାମ୍ନାକୁ ଆସିଛି। ରନିଂ ରୁମ ହେଉଛି ସେହି ସ୍ଥାନ ଯେଉଁଠାରେ ଲୋକୋ ପାଇଲଟ ବା ଟ୍ରେନ ଡ୍ରାଇଭର ନିଜ ଡ୍ୟୁଟି ସାରିବା ପରେ ବିଶ୍ରାମ କରନ୍ତି। ରନିଂ ରୁମରେ ଛାରପୋକ ଏବଂ ମଶା ଯୋଗୁଁ ଲୋକା ପାଇଲଟ ଶୋଇପାରୁ ନାହାଁନ୍ତି। ସେମାନଙ୍କ ଅଭିଯୋଗ ସଂଖ୍ୟା ବହୁତ ଅଧିକ। ବର୍ତ୍ତମାନ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରି ତୁରନ୍ତ ଏହାର ସମାଧାନ ପାଇଁ ରେଳ ବୋର୍ଡ ସମସ୍ତ ଜୋନକୁ ନିର୍ଦ୍ଦେଶ ଦେଇଛି। ଖରାପ ଖାଦ୍ୟ, ମଇଳା କୋଠରୀ ଏବଂ ତ୍ରୁଟିପୂର୍ଣ୍ଣ ଏସି ସମ୍ବନ୍ଧରେ ମଧ୍ୟ ଅନେକ ଅଭିଯୋଗ କରାଯାଇଛି।
ଅଗଷ୍ଟ ୨୮ରେ ଉତ୍ତର ପଶ୍ଚିମ ରେଳ ଜୋନର ଅଜମେର ଡିଭିଜନରେ ଏକ ରନିଂ ରୁମର ଅଭିଯୋଗ ପୁସ୍ତକରେ ଜଣେ ଲୋକୋ ପାଇଲଟ ଏବଂ ତାଙ୍କ ସହାୟକ ଲେଖିଥିଲେ, ‘ରୁମ ନମ୍ବର ୧୦ରେ ବେଡବଗ ବା ଛାରପୋକ କାରଣରୁ ମୁଁ ରାତି ୧୨ଟା ୩୦ରୁ ଜାଗ୍ରତ ଅଛି। ଅସମ୍ପୂର୍ଣ୍ଣ ବିଶ୍ରାମ ଯୋଗୁଁ ମୁଁ ଅସହଜ ଅନୁଭବ କରୁଛି। ଏହା ଟ୍ରେନ ଅପରେସନରେ କ୍ଷତି ପହଞ୍ଚାଇପାରେ। ସେଣ୍ଟ୍ରାଲ ରେଲୱେ ଜୋନ ଅନ୍ତର୍ଗତ ନାଗପୁର ଡିଭିଜନର ବଲହର୍ଶା ରନିଂ ରୁମରେ ଆସିଷ୍ଟାଣ୍ଟ ଲୋକୋ ପାଇଲଟ ମଧ୍ୟ ସମାନ ପ୍ରସଙ୍ଗ ଉଠାଇଥିଲେ ଏବଂ ବେଡବଗ ବା ଛାରପୋକ ବିଷୟରେ ତାଙ୍କର ପୂର୍ବ ଅଭିଯୋଗକୁ ଅଣଦେଖା କରାଯାଇଥିବା ଅଭିଯୋଗ କରିଥିଲେ।
ଏହି ଲୋକୋ ପାଇଲଟମାନେ ଠିକ ଭାବରେ ବିଶ୍ରାମ ନ ନେଲେ ପରବର୍ତ୍ତି ସମୟରେ ବହୁ ଅସୁବିଧା ସୃଷ୍ଟି କରିପାରେ ବୋଲି ଅଭିଯୋଗ ବି ହୋଇଛି। ଏବେ ଏହାକୁ ନେଇ ଚିନ୍ତାରେ ପଡିଯାଇଛି ରେଲଓ୍ବେ ବୋର୍ଡ।
