ସବୁଜ ସୁନ୍ଦର ବନାନୀରେ ଆଚ୍ଛାଦିତ ପ୍ରକୃତି ସୁନ୍ଦରୀ ଶିମିଳିପାଳ। ଏହା କେବଳ ନୈସର୍ଗିକ ସୌନ୍ଦର୍ଯ୍ୟର ଗନ୍ତାଘର ନୁହେଁ ବରଂ ଅସନ୍ତୁଳିତ ପରିବେଶକୁ ସନ୍ତୁଳିତ କରେ। ଆଦିବାସୀ ପରିବାରର ଜୀବନ କଳସକୁ ପୂର୍ଣ୍ଣକରେ। ପ୍ରକୃତିର ଅପରୂପ ଶୋଭାରାଜି ବହନ କରିଥିବା ପ୍ରକୃତିରାଣୀ ଶିମିଳିପାଳ ସବୁବେଳେ ପ୍ରକୃତି ପ୍ରେମୀଙ୍କୁ ଆକର୍ଷିତ କରିଛି ତା କୋଳକୁ। ଯିଏ ଥରେ ଏହାର ସୌନ୍ଦର୍ଯ୍ୟ ପ୍ରେମରେ ପଡିଛି, ସେ ବାରମ୍ବାର ତା ଭିତରେ ନିଜକୁ ହଜାଇ ଦେବାର ଇଚ୍ଛା କରିଛି। ଦେଶର ସର୍ବବୃହତ୍ ବିଷୁବ ମଣ୍ଡଳୀୟ ଜଙ୍ଗଲ ଭାବେ ଏହା ବିଶ୍ୱ ପ୍ରସିଦ୍ଧ। ଏକାଧାରରେ ଜାତୀୟ ଉଦ୍ୟାନ,ବ୍ୟାଘ୍ର ସଂରକ୍ଷଣ ପ୍ରକଳ୍ପ ଓ ହସ୍ତୀ ଅଭୟାରଣ୍ୟ ଭାବେ ପରିଚିତ ଶିମିଳିପାଳକୁ ୟୁନେସ୍କା ପକ୍ଷରୁ ମିଳିଛି ବିଶ୍ୱ ଐତିହ୍ୟ ମାନ୍ୟତା।
ଶିମିଳିପାଳର ସୌନ୍ଦର୍ଯ୍ୟ ଉପଭୋଗ ପାଇଁ ପ୍ରତିବର୍ଷ ଦେଶ ବିଦେଶରୁ ପ୍ରକୃତିପ୍ରେମୀ ତଥା ପର୍ଯ୍ୟଟକଙ୍କ ସୁଅ ଛୁଟିଥାଏ। ପର୍ଯ୍ୟଟକଙ୍କ ପାଇଁ ବର୍ଷର ୭ମାସ ଖୋଲା ରହୁଥିବା ଅଭୟାରଣ୍ୟରେ ରାତ୍ରିଯାପନର ବ୍ୟବସ୍ଥା ରହିଛି ା ପର୍ଯ୍ୟଟକଙ୍କ ରହଣି ସୁବିଧା ନିମନ୍ତେ କଟେଜର ବ୍ୟବସ୍ଥା କରାଯାଇଛି। ଶିମିଳିପାଳକୁ ପ୍ରବେଶ ପାଇଁ ରହିଛି ଦୁଇଟି ମୁଖ୍ୟ ଫାଟକ। ଜିଲାର ସଦର ମହକୁମା ବାରିପଦା ଲୁଲୁଙ୍ଗ ଗେଟ୍ ଓ ଯଶିପୁର କାଳିଆଣି ଗେଟ୍ ଦେଇ ଅଭୟାରଣ୍ୟକୁ ଯିବା ପାଇଁ ଅନୁମତି ମିଳିଥାଏ। ପ୍ରାକୃତିକ ସୌନ୍ଦର୍ଯ୍ୟ ଭରା ପରିବେଶରେ ପର୍ଯ୍ୟଟକଙ୍କ ନିମନ୍ତେ ରହିବାର ବ୍ୟବସ୍ଥା କରାଯାଇଛି। ଜେନାବିଲ, ଜାମୁଆଣି, କୁମାରୀ, ଗୁଡୁଗୁଡିଆ, ବରେହିପାଣି ଓ ରାମତୀର୍ଥଠାରେ ୫ଟି ନେଚର କ୍ୟାମ୍ପର ବ୍ୟବସ୍ଥା କରାଯାଇଛି ା ଏହା ସହିତ ୫ଟି ବଫର ଜୋନ୍ରେ ରାତ୍ରିଯାପନ କରିବା ପାଇଁ ମୋଟ ୫୯ଟି କୁଟୀର ବା କଟେଜ ନିର୍ମାଣ କରାଯାଇଛି। ଅନ୍ଲାଇନ ମାଧ୍ୟମରେ ବୁକିଂ କରି ପର୍ଯ୍ୟଟକମାନେ ଭିତରେ ପ୍ରବେଶ କରୁଛନ୍ତି। ଅଭୟାରଣ୍ୟର କୁମାରୀ ଓ ମୁକ୍ତାପୁରରେ ରେଷ୍ଟୁରାଣ୍ଟର ବ୍ୟବସ୍ଥା କରାଯାଇଥିବା ବେଳେ ପର୍ଯ୍ୟଟକମାନଙ୍କୁ ଆଦିବାସୀ ଖାଦ୍ୟ ପରଷାଯାଇଥାଏ। ପ୍ରତି କୁଡ଼ିଆରେ ଖାଦ୍ୟ ପାନୀୟ ବ୍ୟବସ୍ଥା ରହିଛି। ଶାଳପତ୍ର ପ୍ଲେଟ ଓ ଦନାରେ ସୁସ୍ବାଦୁ ଖାଦ୍ୟ ପରିଷବା ସହିତ ମାଟି ପାତ୍ରରେ ଚା’ ଯୋଗାଇ ଦିଆଯାଉଛି ା ପର୍ଯ୍ୟଟକଙ୍କ ନିମନ୍ତେ ସ୍ବତନ୍ତ୍ର ସ୍କ୍ବାଡ୍ ନିୟୋଜିତ କରାଯାଇଛି ା ରାତ୍ରିଯାପନ ସମୟରେ ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିବା ସାଙ୍ଗକୁ ବନ୍ୟପ୍ରାଣୀଙ୍କୁ ଦେଖିବାର ସୁଯୋଗ ପାଇଥାନ୍ତି। ବନ୍ୟପ୍ରାଣୀଙ୍କ ବଂଶବୃଦ୍ଧି ତଥା ସୁରକ୍ଷା କ୍ଷେତ୍ରରେ କୋଟି କୋଟି ଟଙ୍କା ଅନୁଦାନ ଆସୁଥିଲେ ମଧ୍ୟ ତାହା ଠିକ୍ ଭାବେ କାର୍ଯ୍ୟକାରୀ ହେଉ ନ ଥିବା ପ୍ରାକ୍ତନ ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଭାନୁମିତ୍ର ଆଚାର୍ଯ୍ୟ କହିିଛନ୍ତି। ଶିମିଳିପାଳ ପାଦଦେଶରେ ବସବାସ କରୁଥିବା ଜନଜାତି ଲୋକଙ୍କ ଆୟର ସିଂହଭାଗ ନିର୍ଭର କରେ ଏହି ଅଭୟାରଣ୍ୟ ଉପରେ। ଏହାକୁ ସୁରକ୍ଷିତ ଓ ସଂରକ୍ଷିତ ରଖିବା ବନ ବିଭାଗର କର୍ତ୍ତବ୍ୟ ବୋଲି ପ୍ରକୃତିପ୍ରେମୀମାନେ ମତ ଦେଇଛନ୍ତି।
-ନୀଳାଦ୍ରି ବିହାରୀ ଦଣ୍ଡପାଟ, ବାରିପଦା
