ଭୁବନେଶ୍ୱର,୧୪।୯(ବ୍ୟୁରୋ): ରାଜଧାନୀର ନିଶାମୁକ୍ତି କେନ୍ଦ୍ର କୃପା ଫାଉଣ୍ଡେଶନରେ ଘଟିଥିବା ହତ୍ୟା ଘଟଣାର ଦୀର୍ଘ ଏକ ମାସ ପରେ କମିଶନରେଟ ପୋଲିସ ପରଦା ଉଠାଇଛି। ଅଗଷ୍ଟ ୫ରେ ଜଗତ୍ସିଂହପୁର ଥାନା ଅଧୀନ ଜୋତ ଗ୍ରାମର ତ୍ରିନାଥ ସେଠୀଙ୍କୁ ଶହୀଦନଗର ଥାନା ଅନ୍ତର୍ଗତ ପାଣ୍ଡରାସ୍ଥିତ କୃପା ଫାଉଣ୍ଡେଶନରେ ବାଉଁଶରେ ପିଟିପିଟି ହତ୍ୟା କରାଯିବା ପରେ ଏହାକୁ ଦୁର୍ଘଟଣାର ରୂପ ଦିଆଯାଇଥିଲା। ମୃତଦେହ ବ୍ୟବଚ୍ଛେଦ ରିପୋର୍ଟରୁ ସତ୍ୟାସତ୍ୟ ଜଣାପଡ଼ିବା ପରେ ପୋଲିସ ଏହି ନିଶାମୁକ୍ତି କେନ୍ଦ୍ରର ମାଲିକଙ୍କୁ ପିପିଲିରୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ସେ ହେଲେ ପୁରୀ ଜିଲା ସତ୍ୟବାଦୀ ଥାନା ଅଧୀନ ଶ୍ରୀରାମଚନ୍ଦ୍ରପୁର ଗ୍ରାମର କୀର୍ତ୍ତି ତ୍ରିପାଠୀ। ହତ୍ୟା ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତମାନଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ଜୋନ୍-୫ ଏସିପି ସଞ୍ଜୀବ ଶତପଥୀ କହିଛନ୍ତି।
ସୂଚନା ଅନୁଯାୟୀ, ଅଗଷ୍ଟ ୫ତାରିଖ ଅପରାହ୍ନରେ ଉକ୍ତ ନିଶାମୁକ୍ତି କେନ୍ଦ୍ରରୁ ୫ଜଣ ରୋଗୀ ଖସି ପଳାଇଥିଲେ। ସେମାନଙ୍କ ମଧ୍ୟରୁ କାର୍ତ୍ତିକଙ୍କ ସମେତ ୩ଜଣଙ୍କୁ କେନ୍ଦ୍ରର କର୍ମଚାରୀମାନେ ଧରିଥିଲେ। ଏହାପରେ ତ୍ରିନାଥଙ୍କୁ ଉକ୍ତ କେନ୍ଦ୍ରର ମୁଖ୍ୟ କୀର୍ତ୍ତି ଓ କେୟାରଟେକର୍ମାନେ ମିଶି ବାଉଁଶରେ ନିସ୍ତୁକ ମାଡ଼ ମାରିଥିଲେ। ଫଳରେ ତ୍ରିନାଥ ଗୁରୁତର ହୋଇ ପ୍ରାଣ ହରାଇଥିଲେ। ଏହାପରେ ସେଠାରୁ ତାଙ୍କୁ କ୍ୟାପିଟାଲ ହସ୍ପିଟାଲ ନିଆଯାଇଥିଲା। ତେବେ ନିଶାମୁକ୍ତି କେନ୍ଦ୍ରର ଛାତ ଉପରୁ ପଡ଼ି ତ୍ରିନାଥଙ୍କ ମୃତ୍ୟୁ ହୋଇଥିବା କୀର୍ତ୍ତି ପୋଲିସକୁ କହିଥିଲେ। ପୋଲିସ ଏକ ଅପମୃତ୍ୟୁ ମାମଲା (ନଂ-୪୧/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା। ତେବେ ମୃତଦେହ ବ୍ୟବଚ୍ଛେଦ ରିପୋର୍ଟରୁ ତାଙ୍କୁ ପିଟିପିଟି ହତ୍ୟା କରାଯାଇଥିବା ସ୍ପଷ୍ଟ ହୋଇଥିଲା। ତେଣୁ ପୋଲିସ ଅଗଷ୍ଟ ୨୪ରେ ଏକ ହତ୍ୟା ମାମଲା (ନଂ-୩୨୬/୨୧) ରୁଜୁ କରି ଘଟଣାର ତଦନ୍ତ ଜାରି ରଖିଥିଲା। ପୋଲିସ ସତ୍ୟାସତ୍ୟ ଜାଣିବା ପରେ କୀର୍ତ୍ତି ଏବଂ କେୟାରଟେକରମାନେ ଫେରାର ହୋଇଯାଇଥିଲେ।
ମୃତକଙ୍କ ବାପା ବାବାଜୀ ଚରଣ ସେଠୀଙ୍କ କହିବା ଅନୁଯାୟୀ, ୬ ମାସ ହେବ ସେ କୃପା ଫାଉଣ୍ଡେଶନର ନିଶାମୁକ୍ତି କେନ୍ଦ୍ରରେ ତ୍ରିନାଥଙ୍କୁ ଛାଡିଥିଲେ। ଏଥିପାଇଁ ସେ ଉକ୍ତ ଫାଉଣ୍ଡେଶନକୁ ଟଙ୍କା ପଠାଉଥିଲେ। ତେବେ ଅଗଷ୍ଟ ୫ ତାରିଖ ବିଳମ୍ବିତ ରାତିରେ ତାଙ୍କ ପୁଅକୁ ହତ୍ୟା କରାଯାଇଥିବା ଜଣେ ଅଜଣା ବ୍ୟକ୍ତି ତାଙ୍କୁ ଫୋନ କରି ଜଣାଇଥିଲେ। ସେ ୬ ତାରିଖରେ କ୍ୟାପିଟାଲ ହସ୍ପିଟାଲରେ ପହଞ୍ଚିଥିଲେ। ଛାତରୁ ପଡ଼ି ତ୍ରିନାଥଙ୍କ ମୃତ୍ୟୁ ହୋଇଥିବା ପୋଲିସ ତାଙ୍କୁ କହିଥିଲା। ତେବେ ତାଙ୍କ ପୁଅର ହାତ କିମ୍ବା ଗୋଡ଼ ଭାଙ୍ଗି ନ ଥିବା ସହ ମୁଣ୍ଡରେ କୌଣସି କ୍ଷତ ଚିହ୍ନ ନ ଥିଲା। ତେଣୁ ପୋଲିସ କଥାରେ ସେ ବିଶ୍ୱାସ କରି ନ ଥିଲେ। ତ୍ରିନାଥଙ୍କୁ ହତ୍ୟା କରାଯାଇଥିବା ବାବାଜୀ ଥାନାରେ ଲିଖିତ ଅଭିଯୋଗ କରିଥିଲେ।
