ମୁମ୍ବାଇ,୧୪।୯ : ମହାରାଷ୍ଟ୍ରରେ ସାଧୁଙ୍କ ଉପରେ ଆକ୍ରମଣର ଘଟଣା ଦିନକୁ ଦିନ ବଢ଼ିବାରେ ଲାଗିଛି। ସାଂଗଲିର ଏକ ସଦ୍ୟତମ ଘଟଣାରେ ଗ୍ରାମବାସୀମାନେ ଚାରିଜଣ ସାଧୁଙ୍କୁ ପିଲା ଚୋର ବୋଲି କହି ନିସ୍ତୁକ ପିଟିଥିଲେ। ମଙ୍ଗଳବାର ଏହି ଘଟଣା ଘଟିଛି। ପୋଲିସର ସୂଚନାନୁସାରେ, ଚାରି ସାଧୁ ଉତ୍ତରପ୍ରଦେଶର ମଥୁରାର ବାସିନ୍ଦା ଏବଂ କର୍ନାଟକର ବିଜାପୁରରୁ ପନ୍ଦରପୁର ଅଭିମୁଖେ ଦର୍ଶନ ପାଇଁ ଯାଉଥିଲେ। ପୋଲିସ କହିଛି ଯେ ସାଧୁମାନେ ଏ ବାବଦରେ କୌଣସି ଅଭିଯୋଗ କରିନାହାଁନ୍ତି, ତେଣୁ ଏପର୍ଯ୍ୟନ୍ତ ଏଫଆଇଆର ପଞ୍ଜୀକୃତ ହୋଇନାହିଁ।
ସେମାନେ ସୋମବାର ଗାଁର ଏକ ମନ୍ଦିରରେ ରହିଥିଲେ। ଜଣେ ପୋଲିସ ଅଧିକାରୀ କହିଛନ୍ତି ଯେ ମଙ୍ଗଳବାର ଯାତ୍ରା ଆରମ୍ଭ କରିବାବେଳେ ସେମାନେ ଜଣେ ପିଲାଙ୍କୁ ରାସ୍ତା ସମ୍ପର୍କରେ ପଚାରି ବୁଝିଥିଲେ। ଏହାଦ୍ୱାରା କିଛି ସ୍ଥାନୀୟ ଲୋକ ସନ୍ଦେହ କରିଥିଲେ ଯେ ସେମାନେ ପିଲାମାନଙ୍କୁ ଅପହରଣ କରୁଥିବା ଅପରାଧୀ ଗ୍ୟାଙ୍ଗର ସଦସ୍ୟ। ଏହା ପରେ କିଛି ଗ୍ରାମବାସୀ ସାଧୁଙ୍କୁ ବାଡ଼ିରେ ପିଟିବା ଆରମ୍ଭ କରିଥିଲେ। ଖବର ପାଇ ପୋଲିସ ଟିମ ଘଟଣାସ୍ଥଳରେ ପହଞ୍ଚି ପଚରାଉଚରା ବେଳେ ସାଧୁ ଉତ୍ତରପ୍ରଦେଶର ଏକ ଆଖଡାର ସଦସ୍ୟ ବୋଲି ଜାଣିବାକୁ ପାଇଥିଲେ।
ଭାଷା ବୁଝିବାରେ ଅସୁବିଧା ଯୋଗୁ ସ୍ଥାନୀୟ ଲୋକମାନେ ସନ୍ଦେହ ପ୍ରକଟ କରିଥିଲେ। ଗଣମାଧ୍ୟମ ରିପୋର୍ଟ ଅନୁଯାୟୀ, ରାସ୍ତାରେ ସ୍ଥାନୀୟ ଲୋକଙ୍କ ସହ କଥାବାର୍ତ୍ତା ବେଳେ ପରସ୍ପରର ସ୍ଥାନୀୟ ଭାଷା ବୁଝାନପଡ଼ିବାରୁ ଥିବାରୁ ଏହି ମାମଲା ଏଭଳି ଘଟିଥିଲା ।
ଏହାପୂର୍ବରୁ, ୨୦୨୦ ମସିହାରେ, ପାଲଘରର ଗାଡଚିଞ୍ଚାଲେ ଗ୍ରାମରେ ଲୋକେ ଦୁଇଜଣ ସାଧୁଙ୍କୁ ଶିଶୁ ଚୋର ସନ୍ଦେହରେ ହତ୍ୟା କରିଥିଲେ।
