ଢେଙ୍କାନାଳ ଅଫିସ, ୧୮।୧୨ ଢେଙ୍କାନାଳ ଜିଲା ଓକିଲ ସଂଘ ପକ୍ଷରୁ ଶୁକ୍ରବାର ସନ୍ଧ୍ୟାରେ ‘ଭାରତୀୟ ସମାଜର ବିକାଶରେ ଆଇନଜୀବୀଙ୍କ ଭୂମିକା’ ସମ୍ପର୍କିତ ଏକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ହାଇକୋର୍ଟ ବିଚାରପତି ଜଷ୍ଟିସ୍ କୃଷ୍ଣରାମ ମହାପାତ୍ର ଅତିଥି ଭାବେ ଯୋଗଦେଇ କହିଲେ, ସମାଜ ଗଠନରେ ଯୁବ ଆଇନଜୀବୀଙ୍କ ଭୂମିକା ଗୁରୁତ୍ୱପୂର୍ଣ୍ଣ। ସଚ୍ଚୋଟ ହେବା ସହିତ ବୃତ୍ତିକୁ ଭଲ ପାଇବା ଦରକାର। ଦୈନିକ କିଛି ନା କିଛି ଶିଖିବା ଉଦ୍ଦେଶ୍ୟ ରଖି ଲାଇବ୍ରେରିରେ ୧୦% ସମୟ ଦେବାକୁ ପଡ଼ିବ। କାରଣ ଲାଇବ୍ରେରି ହେଉଛି ଆଇନଜୀବୀଙ୍କ ବଡ ସମ୍ପତ୍ତି। କୌଣସି ଆଶା ନ ରଖି ଅଧିକ ଜ୍ଞାନ ଆହରଣ ପାଇଁ ବ୍ରତୀ ହେବାକୁ ସେ ପରାମର୍ଶ ଦେଇଥିଲେ। ଅନ୍ୟତମ ଅତିଥି ଭାବେ ହାଇକୋର୍ଟ ବିଚାରପତି ଜଷ୍ଟିସ ଶଶିକାନ୍ତ ମିଶ୍ର ଯୋଗଦେଇ କହିଲେ, ସ୍ବାଧୀନତା ସଂଗ୍ରାମରେ ଆଇନଜୀବୀଙ୍କ ସବୁଠାରୁ ଗୁରୁତ୍ୱପୂର୍ଣ୍ଣ ଭୂମିକା ଥିଲା। ଉତ୍କଳ ଗୌରବ ମଧୁସୂଦନ ଓଡ଼ିଆଙ୍କ ସ୍ବାଭିମାନର ପ୍ରତୀକ ଥିଲେ। ମଧୁବାବୁଙ୍କ ଆଦର୍ଶରେ ଅନୁପ୍ରାଣିତ ହେବା ପାଇଁ ସେ ଆଇନଜୀବୀଙ୍କୁ ଆହ୍ବାନ ଦେଇଛନ୍ତି। ଅନ୍ୟତମ ଅତିଥି ଜିଲା ଦୌରାଜଜ୍ ଶରତ ଚନ୍ଦ୍ର ଦେହୁରୀ ଆଇନସେବାରେ ଢେଙ୍କାନାଳ ଜିଲାର ଭୂମିକା, ବରିଷ୍ଠ ଆଇନଜୀବୀ ନବୀନଚନ୍ଦ୍ର ନାରାୟଣ ଦାସ ଏବଂ କୃଷ୍ଣଚନ୍ଦ୍ର ସାହୁ ଭାରତୀୟ ସମାଜର ବିକାଶରେ ଆଇନଜୀବୀଙ୍କ ଭୂମିକା ସମ୍ପର୍କରେ ଆଲୋକପାତ କରିଥିଲେ। ଜିଲା ଓକିଲ ସଂଘ ସଭାପତି ସଞ୍ଜୟ କୁମାର ମିଶ୍ର ହାଇକୋର୍ଟ, ଢେଙ୍କାନାଳ ସିଭିଲ କୋର୍ଟର ଐତିହ୍ୟ ସମ୍ପର୍କରେ ସୂଚନା ଦେଇଥିଲେ। ସାଧାରଣ ସମ୍ପାଦକ ଟଙ୍କଧର ବେହେରା ଧନ୍ୟବାଦ ଅର୍ପଣ କରିଥିଲେ। ଏହି ଅବସରରେ ବନ୍ଦେ ଉତ୍କଳଜନନୀ ସଙ୍ଗୀତ ଗାନ କରାଯାଇଥିଲା।
