ଟାଟୁ କରିବା ଆଜିକାଲି ସମସ୍ତଙ୍କର ବିଶେଷ କରି ଯୁବପିଢ଼ିଙ୍କ ଲାଗି ଫ୍ୟାଶନ ଟ୍ରେଣ୍ଡ ପାଲଟିଛି। ହେଲେ ପ୍ରଥମେ ପ୍ରଥମେ ଏହି ଟାଟୁଗୁଡ଼ିକୁ ଖୁବ୍ ଭଲ ପାଉଥିବା ଅନେକେ କିଛି ମାସ ବା ବର୍ଷ ପରେ ଏହା ବଦଳରେ ପୂର୍ବଭଳି ସ୍ପଟ୍ଲେସ୍ ସ୍କିନ୍ ପାଇବାକୁ ଇଚ୍ଛା ପ୍ରକାଶ କରୁଛନ୍ତି। ଆଉ ଏଥିପାଇଁ ସେମାନେ ଟାଟୁ ରିମୁଭ୍ କରାଉଥିବା ମଧ୍ୟ ଦେଖିବାକୁ ମିଳୁଛି। ହେଲେ ଏପରି କରିବା ଦ୍ୱାରା ତ୍ୱଚା ଉପରେ ନକାରାତ୍ମକ ପ୍ରଭାବ ପଡ଼ିଥାଏ। ଆସନ୍ତୁ ଜାଣିବା ଏ ସମ୍ପର୍କରେ …
ଆପଣ ବହୁ ଦିନ ଧରି ଶରୀରର ଯେକୌଣସି ସ୍ଥାନରେ ଟାଟୁ କରିଛନ୍ତି, ତେବେ ଏହାକୁ ରିମୁଭ୍ କରିବା ଲାଗି ଆଦୌ ଘରୋଇ ଉପଚାର କରନ୍ତୁ ନାହିଁ । କାରଣ ଏହା ଶରୀର ପାଇଁ କ୍ଷତି ପହଞ୍ଚାଏ। ତେଣୁ ଅଭିଜ୍ଞ ଡାକ୍ତର କିମ୍ବା ଟାଟୁ ଆର୍ଟିଷ୍ଟଙ୍କ ପାଖରେ ହିଁ ରିମୁଭ୍ କରାନ୍ତୁ।
ରିମୁଭ୍ ସର୍ବଦା ଯେ ଠିକ୍ ଭାବେ ହୋଇପାରିବ, ତା’ କହିବା କଷ୍ଟକର। କାରଣ ବେଳେବେଳେ ଟାଟୁ ରିମୁଭ୍ ଭଲ ଭାବେ ନ ହୋଇପାରିଲେ, ଏହା ଦାଗ ଆକାରରେ ଆମ ଶରୀରରେ ଅନେକ ଦିନ ଧରି ରହିଯାଏ।
କେତେକଙ୍କଠାରେ ଏପରି କରିବା ପରେ ଉକ୍ତ ସ୍ଥାନରେ ପ୍ରକୃତ ସ୍କିନ୍ ଟୋନ୍ ବଦଳିଯାଇ କଳା କିମ୍ବା ଧଳା ପଡ଼ିଯାଇ ଶରୀରର ସୌନ୍ଦର୍ଯ୍ୟ ନଷ୍ଟ କରିଥାଏ।
ପାଖେ ଟାଟୁ ରିମୁଭ୍ କରିବା ବେଳେ ଆଲର୍ଜି ହେବା କିମ୍ବା ଇମ୍ଫେକ୍ସନ୍ ହେବାର ଅଧିକ ଆଶଙ୍କା ଥାଏ। ତେଣୁ ଚର୍ମ ବିଶେଷଜ୍ଞଙ୍କ ପରାମର୍ଶ ନେଇ ସତର୍କତାର ସହ ଏହା କରାଇବା ଆବଶ୍ୟକ।
ଅନେକେ ଲିପ୍ ଲାଇନର୍, ଆଇ ଲାଇନର୍, ଆଇବ୍ରୋ ଆଦିରେ କସ୍ମେଟିକ୍ ଟାଟୁ କରାଉଛନ୍ତି । କେହି କେହି ଏହାକୁ ଲେଜର ଟ୍ରିଟ୍ମେଣ୍ଟ କରାଇ ରିମୁଭ୍ କରାଇବାକୁ ମଧ୍ୟ ଚେଷ୍ଟା କରୁଥିବା ଦେଖିବାକୁ ମିଳୁଛି। ହେଲେ ଏହାଦ୍ୱାରା ତାହା ନର୍ମାଲ୍ କଲର୍ଠାରୁ ଆହୁରି ଫେଡ୍ ବା ଲାଇଟ୍ ହୋଇଯିବାର ଅଭିଯୋଗ ଅନେକଙ୍କଠାରୁ ଶୁଣିବାକୁ ମିଳୁଛି।
ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି, ରିମୁଭ୍ କରିବା ପାଇଁ ବ୍ୟବହୃତ ହେଉଥିବା ରାସାୟନିକ ପଦାର୍ଥ। ଯଦି ଭୁଲ୍ବଶତଃ ଆବଶ୍ୟକତାଠାରୁ ଅଧିକ ବ୍ୟବହାର ହୋଇଯାଏ, ତେବେ ଏହାର ପାର୍ଶ୍ୱପ୍ରତିକ୍ରିୟାରେ ଜୀବନ ଚାଲିଯିବାର ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ।
