ଛେଣ୍ଡିପଦା,୮।୫(ଡି.ଏନ୍.ଏ.): ଅନୁଗୋଳ ଜିଲା ଛେଣ୍ଡିପଦା ଥାନା ମାଝି ଗୋହିରାପଶି ଗାଁରେ ଅଭାବନୀୟ ଘଟଣା ଦେଖିବାକୁ ମିଳିଛି। ଜଣେ ୬୫ ବର୍ଷୀୟ ବୃଦ୍ଧଙ୍କ ମୃତ୍ୟୁ ଘଟିବା ପରେ କରୋନା ଭୟରେ କେହି ପାଖ ମାଡ଼ିଲେ ନାହିଁ। ଶେଷରେ ନିଜେ ବିଡିଓ ଏବଂ ସରପଞ୍ଚ ପିପିଇ କିଟ୍ ପିନ୍ଧି ମୃତଦେହ ସତ୍କାର କରିବା ପାଇଁ ମଶାଣିକୁ କାନ୍ଧେଇ ନେଇଥିଲେ। ମୃତ ବୃଦ୍ଧ ଜଣକ ହେଲେ ଅନୁଗୋଳ ଜିଲା ଛେଣ୍ଡିପଦା ଥାନା ବାହାଳସାହି ପଞ୍ଚାୟତ ମାଝି ଗୋହିରାପଶି ଗାଁର ଗୋବିନ୍ଦ ମାଝି। ଶୁକ୍ରବାର ରାତିରେ ତାଙ୍କ ଅସ୍ବାଭାବିକ ମୃତ୍ୟୁ ଘଟିଥିଲା। ଏହା ପରେ ପରିବାର ଓ ଗାଁରେ ଭୟର ବାତାବରଣ ଖେଳିଯାଇଥିଲା।
କରୋନାରେ ଗୋବିନ୍ଦଙ୍କ ମୃତ୍ୟୁ ହୋଇଥିବା ଭାବି କେହି ପାଖ ମାଡ଼ ନ ଥିଲେ। ଏପରିକି ଗ୍ରାମବାସୀ ମଧ୍ୟ ମୃତଦେହ ପାଖରୁ ଦୂରେଇ ଯାଇଥିଲେ। ଫଳରେ ଶନିବାର ପୂର୍ବାହ୍ନ ୧୧ଟା ପର୍ଯ୍ୟନ୍ତ ସେମିତି ବୃଦ୍ଧଙ୍କ ମୃତଦେହ ପଡ଼ିି ରହିଲା। ଖବର ପାଇ ବାହାଳସାହି ସରପଞ୍ଚ ନାରାୟଣ ବେହେରା ଓ ଖବରଦାତାମାନେ ପହଞ୍ଚି ଗ୍ରାମବାସୀଙ୍କୁ ବୁଝାଇବା ପାଇଁ ଉଦ୍ୟମ କରିଥିଲେ ମଧ୍ୟ ଗ୍ରାମବାସୀ ଶୁଣି ନ ଥିଲେ। ଏ ପରି ଅମାନବୀୟ ଘଟଣାର ଖବର ପାଇ ଛେଣ୍ଡିପଦା ବିଡିଓ ସଞ୍ଜୟ କୁମାର ଆଚାର୍ଯ୍ୟ,ପଞ୍ଚାୟତ ସଂପ୍ରସାରଣ ଅଧିକାରୀ ଓ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଘଟଣାସ୍ଥଳରେ ପହଞ୍ଚିଥିଲେ। ଗାଁ ଲୋକ ଓ ପରିବାର ଲୋକଙ୍କୁ ବୁଝାଶୁଝା କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିଲା। ଏପରି କ୍ଷେତ୍ରରେ ମହାନତା ଦେଖାଇଥିଲେ ଛେଣ୍ଡିପଦା ବିଡିଓ, ସ୍ଥାନୀୟ ସରପଞ୍ଚ , ପଞ୍ଚାୟତ ସମ୍ପ୍ରସାରଣ ଅଧିକାରୀ ଓ କାର୍ଯ୍ୟନିର୍ବାହୀ ଅଧିକାରୀ । ସେମାନେ ସମସ୍ତେ ପିପିଇ କିଟ୍ ପିନ୍ଧି ମୃତଦେହକୁ କାନ୍ଧେଇ ସତ୍କାର କରିବା ପାଇଁ ଶ୍ମଶାନକୁ ନେଇ ଯାଇଥିଲେ। ବିଡିଓଙ୍କ ଏପରି ମହାନ କାର୍ଯ୍ୟ ଦେଖି ବିଭିନ୍ନ ମହଲରେ ପ୍ରଶଂସା କରାଯାଉଛି।
