ନୂଆଦିଲ୍ଲୀ,୭।୬ : ବ୍ରିଟିଶ ବ୍ରୋଡକାଷ୍ଟିଂ କର୍ପୋରେଶନ (ବିବିସି) ଭାରତରେ ୪୦ କୋଟି ଟଙ୍କା କମ ଆୟକର ଦେଇଥିଲା। ମିଡିଆ ରିପୋର୍ଟ ଅନୁଯାୟୀ, ସେଣ୍ଟ୍ରାଲ ବୋର୍ଡ ଅଫ ଡାଇରେକ୍ଟ ଟ୍ୟାକ୍ସ (ସିବିଡିଟି) କୁ ପଠାଯାଇଥିବା ଚିଠିରେ ବିବିସି ଏହି ଚୋରିକୁ ସ୍ବୀକାର କରିଛି। ଚିଠିରେ କୁହାଯାଇଛି ଆୟକର ରିଟର୍ନରେ ଯାହା ଦେବା ଉଚିତ ତାହାଠାରୁ କମ ଟିକସ ବିବିସି ଦେଇଛି।
କୁହାଯାଉଛି ବର୍ତ୍ତମାନ ବିବିସିକୁ ଆନୁଷ୍ଠାନିକ ଭାବରେ ଏକ ସଂଶୋଧିତ ରିଟର୍ନ ଦାଖଲ କରିବାକୁ ପଡିବ। ଯେଉଁଥିରେ ଏହି ରାଶି ଉପରେ ସମସ୍ତ ଦେୟ, ସୁଧ ଏବଂ ଜରିମାନା ଲାଗୁ କରାଯିବ। ସୂଚନାନୁସାରେ, ବୋର୍ଡର ଦୁଇଜଣ ଅଧିକାରୀ ବିବିସିର ଏହି ଆୟକର ଛାଡକୁ ନିଶ୍ଚିତ କରିଛନ୍ତି। ସେ କହିଛନ୍ତି ଦେଶର ଆଇନ ସମସ୍ତଙ୍କ ପାଇଁ ସମାନ, ତେଣୁ ବିବିସି ସମେତ କୌଣସି କମ୍ପାନୀକୁ କିଛି ବି ରିହାତି ଦିଆଯିବ ନାହିଁ। କମ୍ପାନୀ ଭାରତୀୟ ହେଉ କିମ୍ବା ବିଦେଶୀ ସମସ୍ତଙ୍କ ପାଇଁ ସମାନ ନୀତି ଆପଣାଯିବ। ବିବିସିକୁ ଭାରତର ନିୟମ ମାନିବାକୁ ପଡ଼ିବ। ଏହାର ଯୁକ୍ତିଯୁକ୍ତ ସିଦ୍ଧାନ୍ତରେ ପହଞ୍ଚିବା ପର୍ଯ୍ୟନ୍ତ ବିଭାଗ ଏହି ମାମଲା ଜାରି ରଖିବ।
ବିଭାଗୀୟ ସୂତ୍ର ଅନୁଯାୟୀ, ଆଇଟି ଅଧିକାରୀଙ୍କ ସର୍ବେକ୍ଷଣ ସମୟରେ ବିବିସି ଏହାକୁ ପ୍ରତିଶୋଧ ନେବାକୁ ଚେଷ୍ଟା କରାଯାଉଥିବା ଦର୍ଶାଯାଇଥିଲା। କିନ୍ତୁ ବର୍ତ୍ତମାନ ଏହା ଟିକସ ଫାଙ୍କିବା ମାମଲାକୁ ସ୍ବୀକାର କରିଛି।
ଚଳିତ ବର୍ଷ ଫେବୃଆରୀରେ ଆୟକର ବିଭାଗ ନୂଆଦିଲ୍ଲୀ ଏବଂ ବିବିସିର ମୁମ୍ବାଇ କାର୍ଯ୍ୟାଳୟରେ ଟିକସ ଫାଙ୍କିବା ମାମଲାରେ ସର୍ଭେ କରିଥିଲା। ସେହି ସମୟରେ ବିବିସିର ଆୟ ଏବଂ ଲାଭ ମଧ୍ୟରେ ଅସଙ୍ଗତି ଥିବା ଅଧିକାରୀମାନେ କହିଥିଲେ। ଭାରତରେ ଏହାର ୟୁନିଟ ଗୁଡିକ ଯେଉଁ ପରିମାଣରେ କାର୍ଯ୍ୟ କରୁଛି, ତାହା ବିବିସି ଦ୍ୱାରା ଦିଆଯାଇଥିବା ରାଜସ୍ବ ଆକଳନ ସହିତ ସମାନ ନୁହେଁ । ସେତେବେଳେ ବିବିସି ମହାନିର୍ଦ୍ଦେଶକ ଟିମ ଡେଭି ଏକ ବିବୃତ୍ତି ଦେଇଥିଲେ ତାଙ୍କ ସଂଗଠନ ଏକ ଏଜେଣ୍ଡା ନୁହେଁ ଏକ ଉଦ୍ଦେଶ୍ୟ ସହିତ କାମ କରେ। ବ୍ରିଟିଶ ସରକାର ବିବିସିକୁ ରକ୍ଷା କରୁଥିବାବେଳେ ସମ୍ପାଦକୀୟ ସ୍ବାଧୀନତା ବିଷୟରେ ମଧ୍ୟ କହିଥିଲେ। ଭାରତ ସରକାର ଏହାର ଉପଯୁକ୍ତ ଉତ୍ତର ଦେଇଥିଲେ।
