ଯାଜପୁର ଅଫିସ,୧୭ା୩: ଯାଜପୁର ଜିଲାରେ ଥିବା ଦୁଇ ମ୍ୟୁନିସିପାଲିଟି ମଧ୍ୟରୁ ବ୍ୟାସନଗର ନିର୍ବାଚନ ଉପରେ ଅନେକଙ୍କ ନଜର ରହିଛି। ଏଠାରେ ବିରୋଧୀ ଭାଜପା ଓ କଂଗ୍ରେସରେ ବହୁ ଦକ୍ଷ ନେତ୍ରୀ/ନେତା ସହ ବିଦ୍ରୋହୀ ସ୍ବାଧୀନ ପ୍ରାର୍ଥୀ ବିଜେଡି ପାଇଁ କଣ୍ଟା ହୋଇପାରେ ବୋଲି ଚର୍ଚ୍ଚା ହେଉଛି। ଏହାସହ ବ୍ୟାସନଗର ସହରର ଲୋକସଂଖ୍ୟାକୁ ଅବଲୋକନ କଲେ ଭୋଟର ତାଲିକା ପ୍ରସ୍ତୁତିରେ ବ୍ୟାପକ ତ୍ରୁଟି ରହିିଥିବା ସନ୍ଦେହ କରାଯାଉଛି। ପ୍ରମୁଖ ଦଳର ନେତୃବର୍ଗ ଝୁପୁଡି ଓ ବସ୍ତିବାସିନ୍ଦାଙ୍କ ଭୋଟ ଉପରେ ଅଧିକ ଭରସା ରଖି ନିର୍ବାଚନୀ ବୈତରଣୀ ପାର ହୋଇଯିବେ ବୋଲି ଆଶା ରଖିଛନ୍ତି। ଅନ୍ୟପକ୍ଷେ ଜିଲା ସଦର ମହକୁମା ଯାଜପୁରରେ ବିରୋଧୀ ଏବଂ ବିଦ୍ରୋହୀଙ୍କ ସ୍ବର ସେତେଟା ଶାଣିତ ମନେ ହେଉନାହିଁ। ତେଣୁ ମ୍ୟୁନିସିପାଲିଟି ଭୋଟକୁ ନେଇ ନୀରବ ଭୋଟରମାନେ କ୍ରମେ ମୁହଁ ଖୋଲିବା ସହ ପ୍ରତିଦ୍ୱନ୍ଦ୍ୱିତାର ଚିତ୍ର ସ୍ପଷ୍ଟ ହେବାରେ ଲାଗିଛି। ଦଳୀୟ ଚିହ୍ନରେ ମତଦାନ ହେଉଥିବାରୁ ପ୍ରମୁଖ ଦଳଗୁଡ଼ିକ ଏହାକୁ ଗୁରୁତ୍ୱ ଦେଉଛନ୍ତି। କାରଣ ଏହାର ପ୍ରଭାବ କିଛି ନା କିଛି ୨୦୨୪ ସାଧାରଣ ନିର୍ବାଚନ ଉପରେ ପଡ଼ିବ ବୋଲି ଅନେକେ ମତ ଦେଉଛନ୍ତି।
୨୦୧୯ ସାଧାରଣ ନିର୍ବାଚନରେ ମହିଳା, ଗରିବ, ନିରକ୍ଷର, ଦିନ ମଜୁରିଆ ପ୍ରମୁଖଙ୍କ ମୁହଁରେ ଗୋଟିଏ କଥା ଥିଲା ନବୀନ। କିନ୍ତୁ ପ୍ରାୟ ସବୁଠି ଭାଜପା କଡା ଟକ୍କର ଦେଇଥିଲା। ଯାଜପୁର ଜିଲାରେ ଭାଜପା ପ୍ରାୟ ୪୦% ଭୋଟ ଅକ୍ତିଆର କରି ଅନ୍ୟମାନଙ୍କ ପାଇଁ ଚ୍ୟାଲେଞ୍ଜ ସୃଷ୍ଟି କରିଥିଲା। ହେଲେ ସେହି କଥା ଏଥର ବଦଳିଯାଇଛି। ନିକଟରେ ଶେଷ ହୋଇଥିବା ପଞ୍ଚାୟତ ନିର୍ବାଚନରେ ଭାଜପା ଅମାନତ ହରାଇବା ପରେ ଚଳିତ ପୌର ନିର୍ବାଚନରେ ଦଳ ତିଷ୍ଠି ପାରିବ କି ନାହିଁ ସେନେଇ ସନ୍ଦେହ ରହିଛି।
ଏଥର ବ୍ୟାସନଗର ଓ ଯାଜପୁର ଅଧ୍ୟକ୍ଷା ପଦବୀ ପାଇଁ ଅଭିଜ୍ଞତା ହିଁ ମାପକାଠି ହେବ ବୋଲି ରାଜନୈତିକ ବିଶେଷଜ୍ଞମାନେ ମତପୋଷଣ କରୁଛନ୍ତି। ୨୬ ୱାର୍ଡ ବିଶିଷ୍ଟ ବ୍ୟାସନଗରରେ ୩୫,୩୪୮ ଭୋଟର ସେମାନଙ୍କ ମତ ସାବ୍ୟସ୍ତ କରିବେ। ସେଥିମଧ୍ୟରୁ ପ୍ରାୟ ୮ ହଜାର ଭୋଟର ବସ୍ତିବାସିନ୍ଦା। ଯଦି ୬୦% ମତଦାନ ହେଉଛି ତେବେ ୨୧ହଜାର ଭୋଟର ଭୋଟ ଦେବେ। ଏଭଳି ସ୍ଥିତିରେ ବସ୍ତିବାସିନ୍ଦାଙ୍କ ଭୋଟ ନିର୍ଣ୍ଣାୟକ ହେବ ବୋଲି ମତପ୍ରକାଶ ପାଉଛି। ଅନ୍ୟପକ୍ଷେ ବ୍ୟାସନଗର ସହରରେ ବେସରକାରୀ ଭାବେ ଲୋକସଂଖ୍ୟା ପ୍ରାୟ ଦେଢ ଲକ୍ଷ। କିନ୍ତୁ ଭୋଟର ତାଲିକା ପ୍ରସ୍ତୁତି ଉପଯୁକ୍ତ ଭାବେ ହୋଇ ନ ଥିବାରୁ ଭୋଟର ସଂଖ୍ୟା ୩୮ ହଜାରରେ ସୀମିତ। ଏହା ଶାସକ ଦଳକୁ ସୁହାଉଛି ବୋଲି ଅଭିଯୋଗ ହେଉଛି। ପ୍ରାୟତଃ ଟଙ୍କିକିଆ ଚାଉଳ, ଭତ୍ତା, ଆବାସ ଆଦି ଯୋଜନାରେ ସାମିଲ କରି ବିଜେଡି ବସ୍ତିବାସିନ୍ଦାଙ୍କ ପ୍ରିୟଭାଜନ ହୋଇପାରିଛି। ତେଣୁ ବିରୋଧୀ ଦଳ ଯେତେ ଚେଷ୍ଟା କଲେ ବି ବସ୍ତିବାସିନ୍ଦାଙ୍କ ମତ ବଦଳାଇବା କଷ୍ଟକର ମନେହେଉଛି। ଏହିକ୍ରମରେ ପୌର ନିର୍ବାଚନରେ ବି ବିଜେଡି ପୋଛି ନେବ ବୋଲି ଚର୍ଚ୍ଚା ହେଉଛି। ତେବେ ଚଳିତ ନିର୍ବାଚନରେ ବିଦ୍ରୋହୀ ସ୍ବାଧୀନ ପ୍ରାର୍ଥୀ ବିଜେଡି ପାଇଁ ସମସ୍ୟା ସୃଷ୍ଟି କରିବା ଆଶଙ୍କା ରହିଥିବାବେଳେ ଭାଜପା ଭଲ ପ୍ରଦର୍ଶନ କରିବ ବୋଲି କର୍ମୀମାନେ ବିଶ୍ୱାସ ରଖିଛନ୍ତି। ଏଠାରେ କଂଗ୍ରେସର ରାଜ୍ୟ ମହିଳା ସଭାନେତ୍ରୀ ବନ୍ଦିତା ପରିଡ଼ା ନେତୃତ୍ୱ ନେଉଛନ୍ତି। କଂଗ୍ରେସ ନିଜ ସ୍ଥିତି ସୁଧୁରିବ ବୋଲି ଆଶା କରୁଛି। ୨୦୧୩ ନିର୍ବାଚନ ଫଳାଫଳକୁ ଅବଲୋକନ କଲେ ଯାଜପୁରରେ ସମସ୍ତ ୧୮ଟି ୱାର୍ଡରେ ବିଜେଡି ପ୍ରାର୍ଥୀ ବିଜୟୀ ହୋଇଥିଲେ। ଗତ ସାଧାରଣ ନିର୍ବାଚନରେ ମଧ୍ୟ ଯାଜପୁର ବିଧାନସଭା ଆସନରେ ବିଜେଡିର ପ୍ରଣବ ପ୍ରକାଶ ଦାସ ପ୍ରାୟ ୩୦ ହଜାର ଭୋଟ ବ୍ୟବଧାନରେ ବିଜୟୀ ହୋଇଥିଲେ। ଯାଜପୁର ସହରରେ ବିରୋଧୀ ପ୍ରସଙ୍ଗ ଖୋଜି ପାଉନାହାନ୍ତି। କେବଳ କେନ୍ଦ୍ର ସରକାରଙ୍କ ବିଭିନ୍ନ ଯୋଜନା ଉପରେ ଆଲୋକପାତ କରି ନିର୍ବାଚନ ଲଢ଼ୁଛନ୍ତି।
