ଖଜୁରିପଡ଼ା,୨୧ା୧୧(ବିଦୁର ବେହେରା): ଖଜୁରିପଡ଼ା ବ୍ଲକ ବାରିକୁମ୍ପା ମେଡ଼ିକାଲରେ ସ୍ବାସ୍ଥ୍ୟ ସେବା ବିପର୍ଯ୍ୟସ୍ତ ହୋଇଯାଇଛି। ଲୋକଙ୍କୁ ମିଳୁଛି ଦିନ ବେଳା ଡାକ୍ତର ବିହୀନ ଚିକିତ୍ସା ସୁବିଧା। ରାତିରେ ମିଳୁଛି ଆଟେନାନଙ୍କ ଦ୍ୱାରା ପ୍ରାଥମିକ ଚିକିତ୍ସା। ଆଜକୁ ୧୩ ଦିନ ହେଲା ଫାର୍ମାସିଷ୍ଟ ଭରସାରେ ଚାଲିଛି ସ୍ବାସ୍ଥ୍ୟ ଆରାଗ୍ୟ କେନ୍ଦ୍ର। ଚିକିତ୍ସା ପାଇଁ ଅଧ ରାତିରେ ଫୁଲବାଣୀ ମେଡିକାଲକୁ ଧାଉଁଛନ୍ତି ରୋଗୀ। ଡାକ୍ତର ନାହାନ୍ତ ନଥିବାରୁ ୧୩ ଦିନ ହେଲା ବାରିକୁମ୍ପା ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ଚଳାଉଛନ୍ତି ଫାର୍ମାସିଷ୍ଟ। ଫାର୍ମାସିଷ୍ଟ ଜଣଙ୍କ ରୋଗୀଙ୍କ ରକ୍ତ ପରୀକ୍ଷା, ରୋଗୀଙ୍କୁ ଇଞ୍ଜେକସନ ଦେବା, ସାଲାଇନ ଦେବା ସବୁ ପ୍ରକାର ସ୍ବାସ୍ଥ୍ୟସେବା ଯୋଗାଇ ଆସୁଛନ୍ତି। ପ୍ରତିଦିନ ପ୍ରାୟ ୫୦ରୁ ୬୦ ଜଣ ରୋଗୀ ଏହି ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ରକୁ ଚିକିତ୍ସା ପାଇଁ ଆସିଥାନ୍ତି। ଫାର୍ମାସିଷ୍ଟଙ୍କୁ ସହାୟତା କରିବା ପାଇଁ ଜଣେ ଆୟୁଷ ଡାକ୍ତର ବର୍ଷା ରାଣୀ ପୃଷ୍ଠି, ନର୍ସିଂ ଅଧିକାରିଣୀ ପ୍ରୀତିଲତା ସାହାଣୀ, ଏଏନ୍ଏମ୍ ନନ୍ଦିନୀ ପ୍ରଭା ସାହାଣୀ, ଦୁଇଟି ଆଟେଣ୍ଡାଣ୍ଟ ଲିଜାବତୀ ବେହେରା ଏବଂ ଶର୍ମିଲା ପ୍ରଧାନ ସହିତ ଜଣେ ଏଲ୍ଟି ଶଙ୍କରସନ ବେହେରା ଏବଂ ଜଣେ ଝାଡୁଦାର ଝିଲି ଦିଗାଲ ପ୍ରମୁଖ ମିଶି ସ୍ବାସ୍ଥ୍ୟକେନ୍ଦ୍ରକୁ ଚଳାଉଛନ୍ତି। ଗୁରୁତର ରୋଗୀ, ପ୍ରସୂତୀ ଆସିଲେ ସଙ୍ଗେ ସଙ୍ଗେ ଖଜୁରିପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ କିମ୍ବା ଫୁଲବାଣୀ ମେଡିକାଲକୁ ସ୍ଥାନାନ୍ତର କରିଦେଉଛନ୍ତି। ଏହି ସ୍ବାସ୍ଥ୍ୟକେନ୍ଦ୍ର ଉପରେ ବଲସକୁମ୍ପା, ଟିଟ୍ରାପଙ୍ଗା, ଆଡାସୀପଡା, ଦୂତିପଡା, ଦୂତିମେଣ୍ଡି ପଞ୍ଚାୟତର ହଜାର ହଜାର ଲୋକେ ନିର୍ଭର କରିଥାନ୍ତି। ଏ ନେଇ ଫାର୍ମାସିଷ୍ଟ ଚନ୍ଦ୍ର ଶେଖର ବେହେରାଙ୍କୁ ପଚାରିବାରୁ ସେ କହିଛନ୍ତି ଯେ ପୂର୍ବରୁ ଡାକ୍ତର ପୀୟୂଷ ମୋହନ ସାମଲ ଏଠାରେ ଥିଲେ। ସେ ପଢିବା ପାଇଁ ଭୁବନେଶ୍ୱର ୭ ନଭେମ୍ବରରେ ଗଲେ। ତେଣୁ ଏବେ ଡାକ୍ତର ନ ଥିବାରୁ ରୋଗୀ ଚିକିତ୍ସା କରିବାରେ ସମସ୍ୟା ହେଉଛି ବୋଲି କହିଛନ୍ତି। ଅଞ୍ଚଳବାସୀଙ୍କ କହିବା ଅନୁସାରେ, ରୋଗୀଙ୍କ ସ୍ବାସ୍ଥ୍ୟାବସ୍ଥା ଅଧିକ ବିଗିଡିଲେ ବାଧ୍ୟ ହୋଇ ୧୫ କିଲୋମିଟର ଦୂର ଫୁଲବାଣୀ ବଡ ମେଡିକାଲ ଯିବାକୁ ପଡୁଛି। ତେଣୁ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଜଣେ ଉତ୍ତମ ସେବା ଯୋଗାଉଥିବା ଡାକ୍ତର ଦେବାକୁ ମା’ ଇଷ୍ଟ ଦେବୀ ଯୁବ କଳା ପରିଷଦ ଯୁବକ ସଂଘ ଦାବି କରିଛି। ଏ ନେଇ ଗୋଷ୍ଠୀ ଚିକିତ୍ସା ଅଧିକାରୀ ନିମାଇଁ ଚରଣ ବିଶିଙ୍କୁ ପଚାରିବାରୁ ସେ ଏ ସମ୍ବନ୍ଧରେ ଅବଗତ ଅଛନ୍ତି ଜିଲା ଚିକିତ୍ସା ଅଧିକାରୀଙ୍କ ସହିତ କଥା ହୋଇ ଡାକ୍ତର ପଠେଇବା ପାଇଁ ସେ କହିଛନ୍ତି।
