ବରଗଡ଼,୮।୧୦(ପ୍ରେମାନନ୍ଦ ଖମାରୀ):ଶାନ୍ତିପ୍ରିୟ ବରଗଡ଼ ଜିଲାକୁ ଅପରାଧୀମାନେ ମୁହାଁଇଛନ୍ତି। ଏହି ଜିଲାକୁ ସେମାନଙ୍କ ନିରାପଦ, ସୁରକ୍ଷିତ ମନେ କରି ଚୋରା ପିସ୍ତଲ, ଗୁଳି ସହିତ ପ୍ରବେଶ କରିଛନ୍ତି। ବରଗଡ଼ ଏବେ ଅପରାଧୀଙ୍କ ହବ୍ ପାଲଟିଛି। କିନ୍ତୁ ସେମାନେ କୌଣସି ବଡ଼ ଧରଣର ଅପରାଧ ଘଟାଇବା ପୂର୍ବରୁ ପୋଲିସ ଜାଲରେ ପଡ଼ି ଯାଇଛନ୍ତି। ଗତ ୨ଦିନ ମଧ୍ୟରେ ହୋଇଥିବା ପୋଲିସ କାର୍ଯ୍ୟାନୁଷ୍ଠାନରୁ ଏହା ସ୍ପଷ୍ଟ ବାରି ହୋଇ ପଡ଼ିଛି। ସୋମବାର ପୋଲିସ ୫ ଦେଶୀ ପିସ୍ତଲ, ୨୦ଗୁଳି ସହିତ ୧୫ ଅଭିଯୁକ୍ତଙ୍କୁ ଗିରଫ କରିଥିଲା। ଏହାର ୨୪ଘଣ୍ଟା ନ ପୂରୁଣୁ ମଙ୍ଗଳବାର ପୁଣି ଗୋଟିଏ ଦେଶୀ ପିସ୍ତଲ ଏବଂ ୪ ଗୁଳି ସହିତ ୨ଅଭିଯୁକ୍ତ ପୋଲିସ ହାତରେ ଧରାପଡ଼ିଛନ୍ତି। ୨ଦିନ ମଧ୍ୟରେ ୬ପିସ୍ତଲ, ୨୪ଗୁଳି ସହିତ ୧୭ଅଭିଯୁକ୍ତ ଧରାପଡ଼ିବା ଜିଲାରେ ଆଲୋଡ଼ନ ଖେଲାଇ ଦେଇଛି।
ସେହିପରି ଏତେ ପରିମାଣରେ ପିସ୍ତଲ, ଗୁଳି କେଉଁଠାରୁ ଏଠାକୁ ଆସୁଛି, ତାକୁ ନେଇ ଏବେ ନାନା କଳ୍ପନାଜଳ୍ପନା ପ୍ରକାଶ ପାଇଥିବା ବେଳେ ପୋଲିସ କାର୍ଯ୍ୟାନୁଷ୍ଠାନ ଯଦି ଏଭଳି ଜାରି ନ ରହେ, ତେବେ ଆଗକୁ ଜନ ଜୀବନ ବିପନ୍ନ ଆଡ଼କୁ ମୁହାଁଇବା ସ୍ବାଭାବିକ ବୋଲି ସାଧାରଣରେ ମତପ୍ରକାଶ ପାଇଛି। ଦେଶୀ ପିସ୍ତଲ, ଗୁଳି କେଉଁଠାରୁ ଆସୁଛି, ସେ ନେଇ ତଦନ୍ତ ଚାଲିଛି ବୋଲି ବରଗଡ଼ ଟାଉନ ଥାନା ପରିସରରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ଈନ୍ଦୁରେଖା ପଶ୍ଚିମ କବାଟ କହିଛନ୍ତି।
ବରଗଡ଼ ଜିଲାରେ ଚୋରା ପିସ୍ତଲ କାରବାର ନୂଆଁ ନୁହେଁ। ବିଗତ ଦିନରେ ମଧ୍ୟ ଏଠାରେ ଦେଶୀ ପିସ୍ତଲ ସହିତ ଅଭିଯୁକ୍ତମାନେ ଧରାପଡ଼ିଥିଲେ। କେବଳ ସେତିକି ନୁହେଁ, ଏଠାକୁ ରାଜ୍ୟ ବାହାରୁ ଚୋରା ପିସ୍ତଲ ବିକ୍ରି କରିବା ନେଇ ଅପରାଧୀମାନେ ଆସିଥିବାବେଳେ ମଧ୍ୟ ପୂର୍ବରୁ ପୋଲିସ ଜାଲରେ ପଡ଼ିଥିବା ନଜୀର ରହିଛି। ତେବେ ଦୀର୍ଘଦିନର ବ୍ୟବଧାନ ପରେ ଗତ ୨ଦିନ ମଧ୍ୟରେ ଏଠାରୁ ଯେଭଳି ପିସ୍ତଲ, ଗୁଳି ଜବତ ହୋଇଛି, ତାକୁ ନେଇ ସାଧାରଣରେ ଚିନ୍ତା ବଢ଼ିଥିବାବେଳେ ଏହା ପୋଲିସ ପାଇଁ ମଧ୍ୟ ମୁଣ୍ଡବ୍ୟଥାର କାରଣ ପାଲଟିଛି।
ସେହିପରି ପୋଲିସ ୨ଦିନରେ ୬ ପିସ୍ତଲ, ୨୪ଗୁଳି ଜବତ କରିଥିଲେ ସୁଦ୍ଧା ଜିଲାରେ ଆହୁରି ଲୁଚାଛପା ଏଭଳି ଚୋରା ପିସ୍ତଲ, ଗୁଳି ଅଭିଯୁକ୍ତମାନେ ରଖି ନଥିବେ, ତାକୁ ଏଡ଼ାଇ ଦେଇ ହେଉ ନାହିଁ। ଫଳରେ ଚୋରା ପିସ୍ତଲ, ଗୁଳିର ଚେର କେଉଁଠାରୁ ବରଗଡ଼କୁ ଲମ୍ବିଛି, ସେଠାକୁ ପୋଲିସ ପହଞ୍ଚି ପାରିଲେ ଆଗକୁ ପୋଲିସକୁ ଆହୁରି ବଡ଼ ସଫଳତା ମିଳିବ ଏବଂ ଜିଲାରେ ଚାଳିଥିବା ଏଭଳି ଚୋରା ପିସ୍ତଲ, ଗୁଳି କାରବାର ଉପରେ କିଛିମାତ୍ରାରେ ଅଙ୍କୁଶ ଲାଗି ପାରିବ ବୋଲି ସଚେତନ ନାଗରିକ ମହଲରେ ମତପ୍ରକାଶ ପାଇଛି।
ସୋମବାର ଭଳି ମଙ୍ଗଳବା ମଧ୍ୟ ଚୋରା ପିସ୍ତଲ, ଗୁଳି ଜବତ କରିବାରେ ବରଗଡ଼ ପୋଲିସକୁ ସଫଳତା ମିଳିଥିଲା। ସ୍ଥାନୀୟ ଟାଉନ ଥାନା ପରିସରରେ ଅନୁଷ୍ଠିତ ଏକ ଖବରଦାତା ସମ୍ମଳନୀରେ ଅତିରିକ୍ତ ଏସ୍ପି ପଶ୍ଚିମ କବାଟ ସୂଚନା ଦେଇ କହିଥିଲେ, ବରଗଡ଼ ସହର ଉପକଣ୍ଠ ଜୀରାବ୍ରିଜ ତଳେ ଅଭିଯୁକ୍ତମାନେ ଅବସ୍ଥାନ କରି ଅପରାଧ ଘଟାଇବା ପାଇଁ ଯୋଜନା କରୁଥିଲେ। ସୂଚନା ପାଇବା ପରେ ବରଗଡ଼ ଟାଉନ ଥାନାର ଏକ ପୋଲିସ ସେଠାକୁ ପହଞ୍ଚି ଚଢ଼ାଉ କରିଥିଲା। ଚଢ଼ାଉରେ ସେଠାରୁ ୨ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ସେମାନେ ହେଲେ କେନ୍ଦ୍ରାପଡ଼ା ଜିଲା ଟାଉନ ଥାନା ଜୟପୁରା ଗ୍ରାମର ଶେଖ୍ ୱାହିଦ୍ ଅଲୀ(୩୫) ଏବଂ ସୋନପୁର ଜିଲା ଏସ. ରାମପୁର ଥାନା ବ୍ରାହ୍ମଣୀପାଲିର ତନ୍ମୟ ବାଗ(୨୫)। ସେମାନଙ୍କ ପାଖରୁ ଗୋଟଏ ଦେଶୀ ପିସ୍ତଲ, ଗୋଟିଏ ମେଗାଜିନ, ୪ ଗୁଳି, ୩ଖୋଲା କାଟ୍ରିଜ ଏବଂ ୩ମୋବାଇଲ ଜବତ ହୋଇଛି। ଗିରଫ ଅଭିଯୁକ୍ତମାନେ ପେଶାଦାର ଅପରାଧୀ ବୋଲି ତଦନ୍ତରୁ ଜଣାପଡ଼ିଥିବା ଅତିରିକ୍ତ ଏସ୍ପି ସୂଚନା ଦେଇଛନ୍ତି। ଅଭିଯୁକ୍ତ ତନ୍ମୟଙ୍କ ବିରୋଧରେ ବରଗଡ଼, ସମ୍ବଲପୁର, ପୁଇଁନ୍ତଳା, ଅଇଁଠାପାଲି ଆଦି ଥାନାରେ ଏକାଧିକ ମାମଲା ରହିଛି। ସେହିପରି ଅନ୍ୟ ଅଭିଯୁକ୍ତ ଶେଖ୍ ୱାହିଦ ଅଲୀଙ୍କ ବିରୋଧରେ କେନ୍ଦ୍ରାପଡ଼ା ଜିଲାରେ ଅନେକ ଅପରାଧିକ ମାମଲା ରହିଥିବା ଖବରଦାତା ସମ୍ମିଳନୀରେ ସୂଚନା ଦିଆଯାଇଛି।
Dharitri – Odisha’s No.1, Most Trusted Odia Daily
