ଚଣ୍ଡିଖୋଲ,୨।୭(ପ୍ରଦୀପ୍ତ କୁମାର ପୃଷ୍ଟି):କଟକ ଚାରବାଟିଆ ପୂର୍ତ୍ତ ବିଭାଗ ଡିଭିଜନର ବଡ଼ଚଣା ଉପଖଣ୍ଡ ଅଧୀନରେ ରହିଛି ବନ୍ଦାଳୋ-ଏଣ୍ଡରପଦା ରାସ୍ତା। ଏହି ରାସ୍ତାଟି ବଡ଼ଚଣା ବ୍ଲକରେ ଅବସ୍ଥିତ ହୋଇଥିବାବେଳେ ଢେଙ୍କାନାଳ ଜିଲାକୁ ଗମନାଗମନ ପାଇଁ ସ୍ପର୍ଶ କରିଛି। ହେଲେ ରାସ୍ତାର ଅବସ୍ଥା ଦିନକୁ ଦିନ ଅତ୍ୟନ୍ତ ଖରାପ ଆଡ଼କୁ ଗତିକରୁଛି। ଯେଉଁଥି ପାଇଁ ଗତ ମାସ ୧୨ ତାରିଖରେ ବଡ଼ଚଣା ପୂର୍ତ୍ତ ବିଭାଗ ଉପଖଣ୍ଡ କାର୍ଯ୍ୟାଳୟ ସମ୍ମୁଖରେ ୩ ପଞ୍ଚାୟତର ଅଧିବାସୀ ଆନ୍ଦୋଳନ କରିଥିଲେ। ବନ୍ଦାଳୋ-ଏଣ୍ଡରପଦା ରାସ୍ତା ଉନ୍ନୟନ କମିଟି ତରଫରୁ ଗଣଧାରଣା ଦିଆଯାଇଥିବାବେଳେ ସହକାରୀ ନିର୍ବାହୀ ଯନ୍ତ୍ରୀ ସ୍ନିଗ୍ଧା ଦାସ ଖୁବ୍ଶୀଘ୍ର ରାସ୍ତା ମରାମତି ହେବ ବୋଲି ପ୍ରତିଶ୍ରୁତି ଦେଇଥିଲେ। ହେଲେ ଅଦ୍ୟାବଧି କୌଣସି ପ୍ରତିଶ୍ରୁତି ପାଳନ କରାଯାଇନାହିଁ।
୧୮ କିଲୋମିଟର ଲମ୍ବ ଏହି ରାସ୍ତା କାର୍ଯ୍ୟ ପାଇଁ ୨୦୧୮ରେ ୨ଟି ପର୍ଯ୍ୟାୟରେ ଟେଣ୍ଡର କରାଯାଇଥିଲା। ୨୦୧୮ ଡିସେମ୍ବରରେ ୭ କିଲୋମିଟର ରାସ୍ତା ପାଇଁ ୪ କୋଟି ୪୮ ଲକ୍ଷ ଟଙ୍କା ବ୍ୟୟବରାଦହେବ ବୋଲି ବିଭାଗ ତରଫରୁ କୁହାଯାଇଥିଲା। ସେହିପରି ଏହାର ୨ୟ ଭାଗକୁ ୬ କୋଟି ୫୭ ଲକ୍ଷ ଟଙ୍କା ବ୍ୟୟ ବରାଦରେ ଟେଣ୍ଡର କରାଯାଇଥିଲା। ରାସ୍ତା ନିର୍ମାଣ ପରେ ଏହା ଖାଲଖମାରେ ଭର୍ତ୍ତି ହୋଇ ଯାଇଥିଲା। ପରେ ପୂର୍ତ୍ତ ବିଭାଗ ତରଫରୁ ରାସ୍ତା ମରାମତି ଆଳରେ ଗୁପ୍ତ ଟେଣ୍ଡର କରାଯାଇଥିଲା। ନିର୍ଦ୍ଦିଷ୍ଟ ଠିକାଦାରଙ୍କ ନାମରେ ଗୁପ୍ତ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଥିଲା। ଏପରି କି ଜଣେ ଜଣେ ଠିକାଦାରଙ୍କ ନାମରେ ଏକାଧିକ ଟେଣ୍ଡର ହୋଇଥିବା ସୂଚନା ଅଧିକାର ଆଇନବଳରେ ମିଳିଥିବା ତଥ୍ୟରୁ ଜଣାପଡ଼ିଛି।
ତଥ୍ୟ ମୁତାବକ, ୧୫ା୨ା୨୦୨୧ରେ ଠିକାଦାର ସସ୍ମିତା ସିଂହଙ୍କ ନାମରେ ୪ଲକ୍ଷ ୩୬ ହଜାର ୬୯ ଟଙ୍କା, ୨୫ା୦୨ା୨୧ରେ ୩ ଲକ୍ଷ ୮୯ ହଜାର ୭୧୮ ଟଙ୍କା, ୧୫ା୦୭ା୨୦୨୧ରେ ୪ ଲକ୍ଷ ୯୭ ହଜାର ଟଙ୍କା, ୧୪ା୧୨ା୨୦୨୧ରେ ୪ଲକ୍ଷ ୮୭ହଜାର ୪୮୨ ଟଙ୍କା, ୧୫ା୧୨ା୨୦୨୧ରେ ୪ଲକ୍ଷ ୮୫ହଜାର ୧୧୭ ଟଙ୍କା ବିଲ୍ ହୋଇଥିବା ଦର୍ଶାଯାଇଛି। ସେହିପରି ଦିବାକର ସାହୁଙ୍କ ନାମରେ ୧୫ା୦୨ା୨୦୨୧ରେ ୨ଲକ୍ଷ ୨ ହଜାର ୮୩୧ ଟଙ୍କା, ୧୨ା୦୩ା୨୦୨୧ରେ ୪ଲକ୍ଷ ୨୭ହଜାର ୭୨୨ ଟଙ୍କା, ୧୩ା୦୩ା୨୦୨୧ରେ ୧ ଲକ୍ଷ ୮୮ହଜାର ୫୭୨ ଟଙ୍କା, ୧ା୧୧ା୨୦୨୧ରେ ୯୬ ହଜାର ୪୧୩ ଟଙ୍କା, ୧୦ା୧୧ା୨୦୨୧ରେ ୪ ଲକ୍ଷ ୭୯ ହଜାର ୬୩୨ଟଙ୍କା, ୨୫ା୧୧ା୨୦୨୧ରେ ୨ ଲକ୍ଷ ୧୯ ହଜାର ୫୫୪ ଟଙ୍କା, ୧୦ା୧୨ା୨୦୨୧ରେ ୯୬ହଜାର ୭୨୧ ଟଙ୍କା, ୧୦ା୦୧ା୨୦୨୨ରେ ୪ଲକ୍ଷ ୮୭ହଜାର ୮୦ଟଙ୍କା ବିଲ୍ ହୋଇଥବା ଦର୍ଶାଯାଇଛି। ଶିଶିର କୁମାର ସ୍ବାଇଁଙ୍କ ନାମରେ ୨୪ା୦୨ା୨୦୨୧ରେ ୧୧ଲକ୍ଷ ୪୭ହଜାର ୬୪୮ଟଙ୍କା, ଶ୍ରୀବତ୍ସ ବିଶ୍ୱାଳଙ୍କ ନାମରେ ୧୨ା୦୩ା୨୦୨୧ରେ ୨ଲକ୍ଷ ୮ହଜାର ୨୮୩ ଟଙ୍କା, ଅକ୍ଷୟ କୁମାର ଦାସଙ୍କ ନାମରେ ୦୭ା୦୧ା୨୦୨୨ରେ ୪ଲକ୍ଷ ୪୪ହଜାର ୯୪୨ ଟଙ୍କା, ୧୦ା୦୧ା୨୦୨୨ରେ ୪ଲକ୍ଷ ୭୬ହଜାର ୮୮୪ଟଙ୍କା, ୧୫ା୦୩ା୨୦୨୨ରେ ୪ଲକ୍ଷ ୮୨ହଜାର ୩୩୮ଟଙ୍କା, ସେହିଭଳି ପ୍ରଦୀପ୍ତ କୁମାର ବଳଙ୍କ ନାମରେ ୮ା୦୭ା୨୦୨୧ରେ ୪ ଲକ୍ଷ ୯୭ ହଜାର ଟଙ୍କା ଓ ୦୭ା୦୧ା୨୦୨୨ରେ ୪ଲକ୍ଷ ୮୦ହଜାର ୫୮୧ ଟଙ୍କା ବିଲ୍ ହୋଇଥିବା ଦର୍ଶାଯାଇଛି। ତେବେ ଏତେଟଙ୍କା ଖର୍ଚ୍ଚ ପରେବି ରାସ୍ତାର ୫ କିଲୋମିଟର ଯାତାୟାତ ପାଇଁ ଅନୁପଯୁକ୍ତ ହୋଇପଡ଼ିଛି, ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ତେଣୁ ଶୀଘ୍ର ଏହି ରାସ୍ତା ମରାମତି କରିବାକୁ ଦାବି ହୋଇଛି। ଏ ସମ୍ପର୍କରେ ବିଭାଗୀୟ ଅଧୀକ୍ଷଣ ଯନ୍ତ୍ରୀ ପ୍ରଦୀପ୍ତ କୁମାର ମହାନ୍ତିଙ୍କୁ ପଚାରିବାରେ ସେ କହିଛନ୍ତି, ଖୁବ୍ଶୀଘ୍ର ରାସ୍ତା ମରାମତି କରାଯାଇ ଗମନାଗମନ ସୁବିଧା କରାଯିବ।
