ସମ୍ବଲପୁର,୧୩ା୧(ବ୍ୟୁରୋ):ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦୧୯ରେ ସମ୍ବଲପୁର ଗସ୍ତରେ ଆସିଥିବାବେଳେ ବିଜୁ ଯୁବ ବାହିନୀ ସମାବେଶରେ ଯୋଗଦେଇ ବୀର ସୁରେନ୍ଦ୍ର ସାଏ ଷ୍ଟାଡିୟମ ଉନ୍ନତି ପାଇଁ ୩ କୋଟି ଟଙ୍କା ଦେବାକୁ ଘୋଷଣା କରିଥିଲେ। ଇତିମଧ୍ୟରେ ୩ବର୍ଷ ବିତିଯାଇଥିଲେ ବି ଟଙ୍କା ଆସି ନାହିଁ। ତେଣୁ ବିକାଶ ମୂଳକ କାମରେ ବାଧା ସୃଷ୍ଟି ହେଉଥିବା ଅଭିଯୋଗ ହେଉଛି। ଜିଲା କ୍ରୀଡା ସଂଘ ଉପସଭାପତି ଦୁଲାଲ ପ୍ରଧାନ ଏ ନେଇ ଅଭିଯୋଗ କରିବା ସହ ଶୀଘ୍ର ପଦକ୍ଷେପ ଗ୍ରହଣ କରିବାକୁ ଦାବି କରିଛନ୍ତି।
ସେ ଅଭିଯୋଗ କରିଛନ୍ତି, ହକି ବିଶ୍ୱକପ ଓଡ଼ିଶାରେ ଆୟୋଜିତ ହେଉଛି। ଏହା ଆମ ପାଇଁ ଗର୍ବର ବିଷୟ। ଅନ୍ୟପଟେ ପ୍ରତି ଜିଲା ଓ ବ୍ଲକରେ ଷ୍ଟାଡିୟମ ନିର୍ମାଣ କରାଯାଉଛି। ହେଲେ ସମ୍ବଲପୁର ଜିଲାର ପୁରାତନ ଭିଏସ୍ଏସ୍ ଷ୍ଟାଡିୟମ ଅବହେଳିତ ହୋଇପଡିଛି। ଏହାର ବିକାଶ ପାଇଁ ୩ କୋଟି ଟଙ୍କା ଦେବାକୁ ମୁଖ୍ୟମନ୍ତ୍ରୀ ଘୋଷଣା କରି ୨ କୋଟିର ଏକ ଚେକ୍ ଜିଲା ପ୍ରଶାସନକୁ ହସ୍ତାନ୍ତର କରିଥିଲେ। ହେଲେ ଏହା କେବଳ କାଗଜପତ୍ରରେ ସୀମିତ ରହିଯାଇଛି। ଏହାକୁ ନେଇ ମୁଖ୍ୟମନ୍ତ୍ରୀ ଓ କ୍ରୀଡ଼ା ସଚିବ, କ୍ରୀଡ଼ାମନ୍ତ୍ରୀ ପ୍ରମୁଖଙ୍କୁ ଜିଲା କ୍ରୀଡାସଂଘର ସଦସ୍ୟମାନେ ଭେଟି ଅନୁରୋଧ କରିଥିଲେ। ୩ କୋଟି ନୁହେଁ, ଯାହା ଟଙ୍କା ଲାଗିବ ଦିଆଯିବ ବୋଲି ପ୍ରତିଶ୍ରୁତି ମିଳିଥିଲା। ଇଡ୍କୋକୁ ଟଙ୍କା ଦିଆଯାଇଛି, କାମ ହୋଇଯିବ ବୋଲି ମଧ୍ୟ କହିଥିଲେ। ହେଲେ ଉକ୍ତ ଟଙ୍କା ଆସି ନାହିଁ। ଅନ୍ୟପଟେ ଏକ ବିଶେଷଜ୍ଞ ଦଳ ଆସି ଫଟୋ, ଡ୍ରଇଁ ନେଇ ଫେରିଛନ୍ତି। ପ୍ରାୟ ଏକବର୍ଷ ହୋଇଯିବ ସବୁଠାରେ ବାରମ୍ବାର ଅଭିଯୋଗ ପରେ ମଧ୍ୟ କାର୍ଯ୍ୟକାରୀ ହୋଇପାରି ନାହିଁ। ଭିଏସ୍ଏସ୍ ଷ୍ଟାଡିୟମରେ ରଣଜୀ ଟ୍ରଫି, ଦେଓଧର ଟ୍ରଫି, ସିକେ ନାଇଡୁ ଟ୍ରଫି ଭଳି ଜାତୀୟ ସ୍ତରର କ୍ରିକେଟ ମ୍ୟାଚ ଆୟୋଜିତ ହେଉଛି। ଏହାସହ ଜିଲାସ୍ତରୀୟ ଖେଳକୁଦ ଆୟୋଜନ କରାଯାଉଛି। ତେଣୁ ଷ୍ଟାଡିୟମ ଉନ୍ନତି ନେଇ ପଦକ୍ଷେପ ନେବାକୁ ସେ ଦାବି କରିଥିଲେ। ଏ ସମ୍ପର୍କରେ ଇଡ୍କୋ ଅଧିକାରୀ ବିଧାନ ମାଝି କହିଛନ୍ତି, ଷ୍ଟାଡିୟମର ଜରୁରୀ ଆବଶ୍ୟକ ଥିବା କେତେକ କାମ କରାଯାଇଛି। ବଡ ଅନୁଦାନ ଆସି ନାହିଁ। ଅନୁଦାନ ଆସିବା ମାତ୍ରେ କାମ କରାଯିବ ବୋଲି କହିଥିଲେ।
