ଦେବଗଡ଼, ୨୨/୬ (ଶଶାଙ୍କ ଶେଖର ଝାଙ୍କର): ଦେବଗଡ଼ ଜିଲା ବାରକୋଟ ଥାନା ଅନ୍ତର୍ଗତ ସିଙ୍ଗଶାଳ-ଚଟିଆପାଲି ବାଲିଘାଟରେ ଜଣେ ଯୁବକଙ୍କୁ ହତ୍ୟା କରି ଶବକୁ ବାଲି ଭିତରେ ପୋତି ଦିଆଯାଇଥିବା ଅଭିଯୋଗକୁ ନେଇ ଅଞ୍ଚଳରେ ଉତ୍ତେଜନା ଦେଖାଦେଇଛି। ଘଟଣାର ପ୍ରତିବାଦରେ ଉତ୍ୟକ୍ତ ଲୋକେ ରବିବାର ଦ୍ୱିତୀୟ ଦିନ ପାଇଁ ୧୦ ନମ୍ବର ରାଜ୍ୟ ରାଜପଥର ସିଙ୍ଗଶାଳ ଛକରେ ରାସ୍ତାରୋକ କରିଛନ୍ତି। ଫଳରେ ବାହାଡାପୋଷିରୁ ରାଉରକେଲାକୁ ସଂଯୋଗ କରୁଥିବା ମୁଖ୍ୟ ସଡ଼କରେ ଯାତାୟାତ ଠପ୍ ହୋଇଯାଇଛି।
ସୂଚନା ଅନୁଯାୟୀ, ସିଙ୍ଗଶାଳ ଗ୍ରାମର ଇନ୍ଦ୍ର ମୁଣ୍ଡା ଉକ୍ତ ବାଲିଘାଟରେ କାମ କରୁଥିଲେ। ଗତ ୧୯ ତାରିଖ ରାତିରେ ସେ ବାଲିଘାଟକୁ ଯାଇଥିବା ବେଳେ ଆଉ ଘରକୁ ଫେରି ନ ଥିଲେ। ପରିବାର ଲୋକେ ବିଭିନ୍ନ ଆଶଙ୍କା କରି ବାରକୋଟ ଥାନାରେ ଏନେଇ ଅଭିଯୋଗ କରିଥିଲେ।
ପୋଲିସ ତଦନ୍ତ ଆରମ୍ଭ କରି ଗତକାଲି ସନ୍ଧ୍ୟାରେ ଚଟିଆପାଲି ବାଲିଘାଟ ଅଞ୍ଚଳରୁ ଯୁବକଙ୍କ ମୃତଦେହ ଠାବ କରିଥିଲା। ହତ୍ୟା ପରେ ଶବକୁ ବାଲି ଭିତରେ ପୋତି ଦିଆଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି। ଏହି ଘଟଣାରେ ବାଲିଘାଟ ମାଲିକ, ଏକ୍ସକାଭେଟର ଅପରେଟର, ହାଇୱା ଚାଳକ ସମେତ ଅନ୍ୟ କିଛି ଲୋକ ସମ୍ପୃକ୍ତ ଥିବା ନେଇ ପରିବାର ପକ୍ଷରୁ ଅଭିଯୋଗ ହୋଇଛି।
ଘଟଣାସ୍ଥଳରୁ ମୃତଦେହ ଉଦ୍ଧାର ପ୍ରକ୍ରିୟା ସମ୍ପୂର୍ଣ୍ଣ ଶେଷ ହୋଇନଥିବା ବେଳେ ଏପର୍ଯ୍ୟନ୍ତ କାହାକୁ ଗିରଫ କରାଯାଇନଥିବା ଜଣାପଡ଼ିଛି। ଏହାକୁ ନେଇ ଅଞ୍ଚଳରେ ଅସନ୍ତୋଷ ବଢ଼ିଥିବା ବେଳେ ମୃତକଙ୍କ ପରିବାରକୁ ଉପଯୁକ୍ତ କ୍ଷତିପୂରଣ, ହତ୍ୟାକାଣ୍ଡରେ ସମ୍ପୃକ୍ତ ଅଭିଯୁକ୍ତଙ୍କ ତୁରନ୍ତ ଗିରଫ ଏବଂ ବେଆଇନ ବାଲି ଖନନ ଉପରେ କଡ଼ା କାର୍ଯ୍ୟାନୁଷ୍ଠାନ ଦାବିରେ ସ୍ଥାନୀୟ ଲୋକେ ରାସ୍ତା ଅବରୋଧ କରିଛନ୍ତି। ଘଟଣାସ୍ଥଳରେ ବାରକୋଟ ପୋଲିସ ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା ଓ ବୁଝାସୁଝା ଜାରି ରଖିଥିବା ଜଣାପଡ଼ିଛି।
