କଟକ,୧୦ା୧୧(ସୁପ୍ରିୟା ପ୍ରିୟଦର୍ଶିନୀ): କଟକ ବାଲିଯାତ୍ରା ପାଇଁ ପ୍ରସ୍ତୁତି ଜୋର୍ ଧରିଛି। ଗତବର୍ଷ ଭଳି ଚଳିତବର୍ଷ ବାଲିଯାତ୍ରାରେ ଚଢା ପାର୍କିଂ ଦରକୁ ନେଇ ଅସନ୍ତୋଷ ଦେଖାଦେଇଛି। ଚଳିତବର୍ଷ ବାଲିଯାତ୍ରାରେ ଗାଡି ପାର୍କିଂ ପାଇଁ କଟକ ମହାନଗର ନିଗମ (ସିଏମ୍ସି) ପକ୍ଷରୁ ୧୫ଟି ପାର୍କିଂସ୍ଥଳ ଚିହ୍ନଟ କରାଯାଇଛି। ଏଥିସହ ଗାଡି ପାର୍କିଂ ଫି’ ଧାର୍ଯ୍ୟ ହୋଇଛି। ସାଇକେଲ ଏବଂ ଟ୍ରାଇସାଇକେଲ ନିମନ୍ତେ ୧୦ ଟଙ୍କା, ସ୍କୁଟର ଓ ବାଇକ୍ ପାଇଁ ୫୦ ଟଙ୍କା ରଖାଯାଇଛି। ସେହିପରି କାର୍, ଭ୍ୟାନ୍, ଅଟୋ ପାର୍କିଂ ପାଇଁ ୧୦୦ ଟଙ୍କା ଏବଂ ବସ୍, ଟ୍ରକ୍ ନିମନ୍ତେ ୧୫୦ ଟଙ୍କା ଦେୟ ଧାର୍ଯ୍ୟ ହୋଇଛି। ୧୨ ଘଣ୍ଟା ପର୍ଯ୍ୟନ୍ତ ରଖିବା ପାଇଁ ଏହି ଫି’ ଧାର୍ଯ୍ୟ କରାଯାଇଛି। ପାର୍କିଂ ଲିଜ୍ ନେଇଥିବା ସଂସ୍ଥା ସମସ୍ତ ଦେୟର ଚାଟ୍ ପାର୍କିଂସ୍ଥଳରେ ଲଗାଇବା ବାଧ୍ୟତାମୂଳକ। ଧାର୍ଯ୍ୟ ମୂଲ୍ୟଠାରୁ ଅଧିକ ଟଙ୍କା ଆଦାୟ କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସିଏମ୍ସି ପକ୍ଷରୁ କୁହାଯାଇଛି। ଅପରପକ୍ଷରେ ପାର୍କିଂ ସ୍ଥାନ ଓ ଦରକୁ ନେଇ ଅସନ୍ତୋଷ ଦେଖାଦେଇଛି। ୨ ଚକିଆ ଗାଡ଼ି ପାଇଁ ପୂର୍ବରୁ ପାର୍କିଂ ଫି’ ୩୦ ଟଙ୍କା ଥିବାବେଳେ ଗତବର୍ଷଠାରୁ ୫୦ ଟଙ୍କା କରାଯାଇଛି। ଯଦି ଗରିବ ବର୍ଗ ଲୋକ ଦୁଇଟି ବାଇକ୍ରେ ଆସେ ତେବେ ତାଙ୍କୁ ୧୦୦ ଟଙ୍କା ଦେବାକୁ ପଡିବ। ଏହି ୧୦୦ ଟଙ୍କା ଗୋଟିଏ ଗରିବ କିମ୍ବା ମଧ୍ୟବିତ୍ତ ପରିବାରର ଲୋକଙ୍କ ପାଇଁ ବହୁତ ଅଧିକ। ତେଣୁ ପାର୍କିଂ ଫି’ ହ୍ରାସ କରାଯାଉ ବୋଲି ସାଧାରଣରେ ଦାବି ହେଉଛି।
ଅପରପକ୍ଷରେ ୧୫ଟି ପାର୍କିଂସ୍ଥାନ ପାଇଁ ସିଏମ୍ସି ପକ୍ଷରୁ ଗୁରୁବାରଠାରୁ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଛି। ଟେଣ୍ଡର ମାଧ୍ୟମରେ ଘରୋଇ ଅନୁଷ୍ଠାନ ଏବଂ ବ୍ୟକ୍ତିଙ୍କୁ ଦାୟିତ୍ୱ ଦିଆଯିବ। ପ୍ରତି ପାର୍କିଂସ୍ଥଳକୁ ଲିଜ୍ ନେବା ପାଇଁ ଭିନ୍ନ ଭିନ୍ନ ଦେୟ ଧାର୍ଯ୍ୟ କରାଯାଇଛି। ନଭେମ୍ବର ୨୭ରୁ ଡିସେମ୍ବର ୪ ତାରିଖ ପର୍ଯ୍ୟନ୍ତ ଏହି ପାର୍କିଂଗୁଡିକ ରହିବ। ଆସନ୍ତା ୧୮ ତାରିଖ ପର୍ଯ୍ୟନ୍ତ ଟେଣ୍ଡର ପ୍ରକ୍ରିୟା ଜାରି ରହିବ। ଏହାପରେ ୨୦ ତାରିଖରେ ଟେଣ୍ଡର ବାକ୍ସ ଖୋଲାଯିବ ବୋଲି ସିଏମ୍ସି ପକ୍ଷରୁ ସୂଚନା ମିଳିଛି। ରିଂବନ୍ଧର ପଶ୍ଚିମ ଏବଂ ପୂର୍ବ ପାର୍ଶ୍ୱରୁ ସିଲଭର ସିଟି ବୋଟିଂ କମ୍ପ୍ଲେକ୍ସ ପାର୍ଶ୍ୱବର୍ତ୍ତୀ ଅଞ୍ଚଳରେ ୭ଟି ପାର୍କିଂସ୍ଥଳୀ ରଖାଯାଇଛି। ସେହିଭଳି କାର୍ତ୍ତିକେଶ୍ୱର ଗଡାର ପୂର୍ବ ଏବଂ ପଶ୍ଚିମ ପାର୍ଶ୍ୱରେ ୨ଟି, ଖ୍ରୀଷ୍ଟିଆନ ପଡିଆ, ଦୟାଶ୍ରମ ସମ୍ମୁଖ, ଗୋରାକବର ପଡିଆ, ବକ୍ଳି ବାଳିକା ଉଚ୍ଚ ବିଦ୍ୟାଳୟ ସମ୍ମୁଖ, ଭୁଆଶୁଣୀ ପଡିଆ ଓ ହାଡିଆ ପଠାରେ ଗୋଟିଏ ଲେଖାଏ ପାର୍କିଂସ୍ଥଳ କରାଯାଇଛି।
