ଇସଲାମାବାଦ୍, ୨୦।୧୦: ଭାରତରେ ବଡ଼ ଧରଣର ଆତଙ୍କବାଦୀ ଆକ୍ରମଣ ଲାଗି ପାକିସ୍ତାନ ସୈନ୍ୟ ବାହିନୀ ମୁଖ୍ୟ କ୍ୱମର ଜାଭେଦ୍ ବାଜଓ୍ବା ଲଶ୍ମର-ଇ-ତୋଏବା ମୁଖ୍ୟ ହାଫିଜ୍ ସଇଦ୍ ଏବଂ ହିଜିବୁଲ ମୁଜାହିଦ୍ଦିନ୍ ପ୍ରମୁଖ ସଲାଉଦିନ୍ଙ୍କୁ ଗୁପ୍ତ ନିର୍ଦ୍ଦେଶ ଦେଇଛନ୍ତି। ଏଥିରେ ପାକିସ୍ତାନ ଗୋଇନ୍ଦା ସଂସ୍ଥା ଆଇଏସ୍ଆଇ ହାତ ରହିଛି। ଇତିମଧ୍ୟରେ ବାଜଓ୍ବା ରାଓ୍ବଲପିଣ୍ଡିଠାରେ ଲଶ୍ମର-ଇ-ତୋଏବା, ଜୈଶ୍-ଇ-ମହମ୍ମଦ, ହିଜିବୁଲ ମୁଜାହିଦ୍ଦିନ୍ ଏବଂ ତାଲାବାନ ଆଦି ଆତଙ୍କବାଦୀ ସଂଗଠନ ସଦସ୍ୟଙ୍କ ସହିତ ଯୋଗାଯୋଗରେ ରହିଥିବା କୁହାଯାଉଛି। ଏଠାରେ ଏନେଇ କେତେକ ବୈଠକ ମଧ୍ୟ ଅନୁଷ୍ଠିତ ହୋଇସାରିଛି। ଜୈଶ୍ କମାଣ୍ଡର ମୁଫତି ମହମ୍ମଦ ଅସଗର ଖାଁ କଶ୍ମୀରଙ୍କ ସହିତ ଯୋଗାଯୋଗ କରାଯାଇ ଭାରତରେ କିଭଳି ଆତଙ୍କବାଦୀ ଆକ୍ରମଣ କରାଯିବ ସେ ନେଇ ଷଡ଼ଯନ୍ତ୍ର ରଚାଯାଉଥିବା ଭାରତୀୟ ଗୋଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି କରାଯାଇଛି।
