ବାଲିଆ,୫।୧୦: ୧୯୭୪ରେ ଜଗତ୍ସିଂହୁର ଜିଲାର ବରିଡ଼ି ତହସିଲ ଅଧୀନ ବଡ଼ଖଣ୍ଡାଏତା ରେଳଷ୍ଟେଶନ ନିର୍ମାଣ ହୋଇଥିଲା। ଏହା କଟକ-ପାରାଦୀପ ରେଳପଥର ସର୍ବପୁରାତନ ଷ୍ଟେଶନ ଥିଲା। ଏହି ଷ୍ଟେସନ ଦେଇ ଜଗତ୍ସିଂହପୁର ଏବଂ କଟକ ଜିଲା ଅଧୀନ ୩ଟି ବ୍ଲକର ପ୍ରାୟ ୧୦ଟି ପଞ୍ଚାୟତ ଜନସାଧାରଣ ଯାତାୟାତ କରିଥାନ୍ତି। ମାତ୍ର ଫେବୃୟାରୀ ୨୦୦୬ରେ ହଠାତ ଷ୍ଟେଶନକୁ ଉଠାଇ ଦିଆଯାଇ ପବ୍ଲିକ ହଲଟ୍ କରିଦିଆଗଲା। ସେଠାରୁ ବୈଷୟିକ ଯନ୍ତ୍ରପାତି ଓ କର୍ମଚାରୀଙ୍କୁ ଅପସାରଣ କରିନିଆଗଲା। ବର୍ତ୍ତମାନ ଏହି ପବ୍ଲିକ ହଲଟ ଭୂତକୋଠିରେ ପରିଣତ ହୋଇଛି। ବିଭାଗୀୟ କର୍ମଚାରୀ ରହୁ ନ ଥିବାରୁ ଦୁର୍ବୃତ୍ତ କବାଟ ଝରକା ଏବଂ ଅନ୍ୟ ଆସବାବପତ୍ର ଚୋରାଇ ନେଲେଣି। ଷ୍ଟେଶନରେ ଥିବା ଘରେ କେହି ରହୁ ନ ଥିବାରୁ ଘରଗୁଡ଼ିକୁ ଗଛଲତା ମାଡି ଜଙ୍ଗଲ ସୃଷ୍ଟି ହେଲାଣି। ବିଦ୍ୟୁତ୍ ନ ଥିବାରୁ ଏଠାରେ ଅସାମାଜିକମାନେ ଆଡ୍ଡା ଜମାଉଛନ୍ତି। ତେଣୁ ଏହାର ପୁନରୁଦ୍ଧାର ଦିଗରେ ଜଗତ୍ସିଂହପୁର ଜିଲାପାଳ, ରେଳମନ୍ତ୍ରୀ, ରାଜ୍ୟ ମୁଖ୍ୟ ଶାସନ ସଚିବ, ପୂର୍ବତଟ ଜି.ଏମ୍. ଖୋର୍ଦ୍ଧ ଡି.ଆର.ଏମ୍. ଦୃଷ୍ଟିଦେବାକୁ ଅଞ୍ଚଳର କୈଳାସ ଚନ୍ଦ୍ର ବେହେରା, ବିଜୟ ଦଳାଇ, ପ୍ରକାଶ ଚନ୍ଦ୍ର ଦାସ, ଅଜୟ ଖୁଣ୍ଟିଆ, ନୃସିଂହ ପ୍ରସାଦ ମହାନ୍ତି, ଅଶୋକ ମହାନ୍ତି, ନାରାୟଣ ବିଶୋଇ, ଶନାତନ ଦାସ ପ୍ରମୁଖ ଦାବି କରିଛନ୍ତି।
୨୦୧୧ ଜାନୁୟାରୀ ୧୨ରେ ଜଗତ୍ସିଂହପୁର ଉପଜିଲାପାଳଙ୍କ କାର୍ଯ୍ୟାଳୟ ସମୁଖରେ ପୁନଃ ଷ୍ଟେଶନ ଦାବିରେ ଅଞ୍ଚଳବାସୀ ଧାରଣା ଦେଇଥିଲେ। ୨୦୧୧ ଏପ୍ରିଲ ୬ରେ ବଡଖଣ୍ଡାଏତା ଷ୍ଟେଶନରେ ଗଣବିକ୍ଷୋଭ କରାଯାଇଥିଲା। ମାତ୍ର କିଛି ଫରକ ପଡ଼ି ନ ଥିଲା। ଫଳରେ ପ୍ରାୟ ୧୫ଟି ଗ୍ରାମର ୫ ଶହରୁ ଊର୍ଦ୍ଧ୍ୱ ଜନସାଧାରଣ ଏକତ୍ରିତ ହୋଇ ୨୭ ଫେବୃୟାରୀ ୨୦୧୨ରେ ୩୩ ଘଣ୍ଟା ରେଳରୋକୋ କରିଥିଲେ। ଜଗତ୍ସିଂହପୁର ତତ୍କାଳୀନ ଉପଜିଲାପାଳ ବ୍ରଜବନ୍ଧୁ ଭୋଳ ପହଞ୍ଚତ୍ ଆଲୋଚନା ପାଇଁ ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହାର କରାଯାଇଥିଲା। ଆଲୋଚନା ପରେ ଉପଜିଲାପାଳ ଚିଠି ନଂ-୧୧୯/୨୯ ମାର୍ଚ୍ଚ ୨୦୧୨ରେ ଖୋର୍ଦ୍ଧା ଡିଭିଜନାଲ ମ୍ୟାନେଜର ତ୍ରିବିକ୍ରମ ମିଶ୍ରଙ୍କୁ ଦାବି ସମ୍ପର୍କରେ ସୁପାରିସ କରିଥିଲେ। ଏହାପରେ ବିଭିନ୍ନ ସମୟରେ ରେଳ କର୍ତ୍ତୃପକ୍ଷ ଏବଂ କେନ୍ଦ୍ରମନ୍ତ୍ରୀଙ୍କୁ ବାରମ୍ବାର ଦାବିପତ୍ର ଦିଆଯାଇଛି। କିନ୍ତୁ ଏହାକୁ କେହି କର୍ଣ୍ଣପାତ କରୁନାହାନ୍ତି।
