ଓଡ଼ିଆ ସିନେମାଜଗତର ଅନ୍ୟତମ ନାମୀ ବ୍ୟାନର ବ୍ରଜରାଜ ମୁଭିଜ ଦ୍ୱାରା ପ୍ରସ୍ତୁତ ‘ରୋମିଓ ଦ ଲଭରବୟ’ରୁ ବାବୁସାନ୍ ନିଜର ବଡ଼ ପରଦା କ୍ୟାରିୟର ଆରମ୍ଭ କରିଥିଲେ। ଏବେ ତାଙ୍କର ବିଦ୍ୟାରାଣକୁ ନେଇ ଚର୍ଚ୍ଚା। ସେ କାହିଁକି ଏହି ରାଣ ପକାଇଲେ, ଆଉ ତା’ ପଛରେ କ’ଣ କାରଣ ରହିଛି, ତାହା ଜାଣିବାକୁ ଅନେକଙ୍କ ମନରେ ନିଶ୍ଚୟ ଉତ୍ସୁକତା ପ୍ରକାଶ ପାଇବଣି। ଅସଲ କଥା ହେଲା, ଏହାର ସଂଯୋଗ ରହିଛି ତାଙ୍କର ରିଲ୍ ଲାଇଫ୍ ସହ। ଅର୍ଥାତ୍ ‘ବିଦ୍ୟାରାଣ’ ଟାଇଟଲବିଶିଷ୍ଟ ଓଡ଼ିଆ ସିନେମାରେ ସେ ଅଭିନୟ କରୁଛନ୍ତି। ସିନେମାର ଆଉ ଅଳ୍ପ ପ୍ୟାଚ୍-ଅପ୍ କାମ ବାକି ଅଛି ଏବଂ ଚଳିତବର୍ଷ ରଜରେ ଫିଲ୍ମଟି ରିଲିଜ ହେବାର ଯୋଜନା ରହିଛି ବୋଲି ସୂଚନା ଦେଇଛନ୍ତି ଏହାର ନିର୍ଦ୍ଦେଶକ ଜ୍ୟୋତି ଦାସ। କାହାଣୀ ଅନୁସାରେ ଜଣେ ହନୁମାନ ପୂଜକ ବିବାହର ବହୁ ବର୍ଷ ପରେ ପୁତ୍ର ସନ୍ତାନଟିଏ ଲାଭ କରିଛି। ଶ୍ରଦ୍ଧାରେ ସେ ତାହାର ନାମ ରଖିଛି ସିଦ୍ଧ ମହାବୀର। ହେଲେ ବାସ୍ତବରେ ପିଲାଟିର ଆଚାର ବ୍ୟବହାର ସମ୍ପୂର୍ଣ୍ଣ ଅଲଗା। ଥରେ ପିଲାଦିନେ ସେ ବିଦ୍ୟାରାଣ ପକାଇ ଦେଇଛି। ହେଲେ କ’ଣ ପାଇଁ ସେ ଏପରି କରିଛି ଏବଂ ତାହା ପଛରେ କି ରହସ୍ୟ ଲୁଚି ରହିଛି ସିନେମାଟି ଦେଖିଲେ ଜାଣିପାରିବେ। ତଥ୍ୟ ଫିଲ୍ମସ ବ୍ୟାନରରେ ନିରଞ୍ଜନ ନାୟକଙ୍କ ପ୍ରଯୋଜିତ ଏହି ଫିଲ୍ମର ସଂଳାପ ବାପୁ ଗୋସ୍ବାମୀ ଲେଖିଛନ୍ତି ଏବଂ ଗୀତଗୁଡ଼ିକୁ ସ୍ବର ଦେଇଛନ୍ତି ବୈଦନାଥ ଦାଶ। ଏଥିରେ ବାବୁସାନ୍ଙ୍କ ସହ ସ୍କ୍ରିନ୍ ଶେୟାର କରିଛନ୍ତି ଚୁଲ୍ବୁଲି ଶିବାନୀ। ନିର୍ଦ୍ଦେଶକ ସୁଧାଂଶୁ ମୋହନ ସାହୁଙ୍କୁ ଏଥିରେ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଦେଖିବାକୁ ମିଳିବ। ଅନ୍ୟପକ୍ଷରେ ଏହାର କାଷ୍ଟିଂରେ ଉତ୍ତମ ମହାନ୍ତି, ଅଭିନବ ସିଂ, ସୁଜିତ ପାଇକରାୟ ଏବଂ ପୁପୁଲ୍ ଭୂୟଁା ରହିଛନ୍ତି।
