ବଞ୍ଚୋ, ୧୭।୬:(ପ୍ରଦୋଷ ବିଶ୍ୱାଳ): ଆନନ୍ଦପୁର ଥାନା ଅନ୍ତର୍ଗତ ପଞ୍ଚୁଗୋଛିଆ ପଂଚାୟତ ସହାନନ୍ଦପୁର ଗ୍ରାମରେ ଘଟିଥିବା ଏକ କୁରାଢ଼ି ଆକ୍ରମଣ ମାମଲାରେ ପୋଲିସ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ପ୍ରାପ୍ତ ସୂଚନା ଅନୁଯାୟୀ, ସହାନନ୍ଦପୁର ଗ୍ରାମର ରେବତୀ ସାହୁଙ୍କ ଅଭିଯୋଗ କ୍ରମେ ଆନନ୍ଦପୁର ଥାନାରେ ମାମଲା ନଂ୧୮୫/୨୬, ଧାରା ୧୧୫(୨)/୧୨୬(୨)/୩୫୧(୨)/୧୦୯(୧) ବିଏନଏସ ଅନୁଯାୟୀ ରୁଜୁ କରାଯାଇଥିଲା। ଗତ ୧୬ ଜୁନ ସକାଳ ପ୍ରାୟ ୭ଟା ୪୦ ମିନିଟ ସମୟରେ ଅଭିଯୋଗକାରିଣୀଙ୍କ ପୁଅ ମାନସ ସାହୁ ଗ୍ରାମ ଟ୍ୟୁବୱେଲ ନିକଟରେ ଦାନ୍ତ ଘଷୁଥିବା ବେଳେ ସେହି ଗ୍ରାମର ରାଜେନ୍ଦ୍ର ଓରଫ କାଳନ୍ଦୀ ଦଳେଇ ହଠାତ୍ କୁରାଢ଼ିରେ ତାଙ୍କ ମୁଣ୍ଡକୁ ଆକ୍ରମଣ କରିଥିଲେ। ଫଳରେ ମାନସ ଗୁରୁତର ଆହତ ହୋଇଥିଲେ। ଘଟଣା ପରେ ପୋଲିସ ତଦନ୍ତ ଆରମ୍ଭ କରି ଅଭିଯୁକ୍ତ ରାଜେନ୍ଦ୍ର ଓରଫ କାଳନ୍ଦୀ ଦଳେଇଙ୍କୁ ଗିରଫ କରିଛି। ବୁଧବାର ତାଙ୍କୁ ଆନନ୍ଦପୁର କୋର୍ଟକୁ ଚାଲାଣ କରାଯାଇଥିବା ସୂଚନା ଏସଡିପିଓ କମଳ ଲୋଚନ ପଣ୍ଡା ପ୍ରଦାନ କରିଛନ୍ତି। ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି।
