ମୁରିବାହାଲ, ୩୧ା୧(ଡ଼ି. ଏନ.ଏ.): ବଲାଙ୍ଗୀର ଜିଲା ମୁରିବାହାଲ ଆଦର୍ଶ ବିଦ୍ୟାଳୟ ଛାତ୍ରୀଛାତ୍ରଙ୍କୁ ନେଇ ସ୍କୁଲ ଯାଉଥଇବା ଏକ ଅଟୋ ସୋମବାର ଗୁଡିଘାଟ ନିକଟରେ ଥିବା ଏକ ବ୍ରିଜ ତଳକୁ ଭାରସାମ୍ୟ ହରାଇ ଖସି ପଡିଥିଲା। ଫଳରେ ଏଥିରେ ଥିବା ୧୦ଛାତ୍ରୀଛାତ୍ର ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକଙ୍କ ସହାୟତାରେ ଆହତ ଛାତ୍ରୀଛାତ୍ରଙ୍କୁ ଗୁଡିଘାଟ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା ପରେ ମୁରିବାହାଲ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଣାଯାଇଥିଲା। ସେମାନଙ୍କ ମଧ୍ୟରୁ ଜଣଙ୍କୁ ଅଧିକ ଚିକିତ୍ସା ପାଇଁ ବଲାଙ୍ଗୀର ସ୍ଥାନାନ୍ତର କରାଯାଇଛି। ଦୁର୍ଘଟଣାଗ୍ରସ୍ତ ଅଟୋକୁ ମୁରିବାହାଲ ପୋଲିସ ଜବତ କରିଛି।
ପ୍ରତିଦିନ ଭଳି ସୋମବାର ପୂର୍ବାହ୍ନ ପ୍ରାୟ ୯ଟା ୩୦ରେ ବଡ଼ସାଇମରା, ଧୂମାମାଲ, ସୁଲେକେଲା, ଟେଙ୍ଗରା, ଅଣ୍ଡାଲଦୋରୋ, ପତ୍ରପାଲି, ଇଛାପ, ଗଁରେଇ, ହଳଦୀ ଅଞ୍ଚଳର ପିଲାମାନେ ଏକ ଅଟୋରେ ଆଦର୍ଶ ବିଦ୍ୟାଳୟକୁ ପଢିବାକୁ ଆସୁଥିଲେ। ଅଟୋ ଭାରସାମ୍ୟ ହରାଇ ପାଖରେ ଥିବା ଗୁଡିଘାଟ ଯୋରର ପ୍ରାୟ ୧୦ଫୁଟ ବ୍ରିଜ ତଳକୁ ଖସି ପଡିଥିଲା। ଖବର ପାଇ ମୁରିବାହାଲ ବିଡିଓ ପୂର୍ଣ୍ଣାନନ୍ଦ ପୁଟେଲ, ତହସିଲଦାର ସୋନାଲି ପାତ୍ର ଡାକ୍ତରଖାନା ଯାଇ ଛାତ୍ରୀଛାତ୍ରଙ୍କୁ ଭେଟିଥିଲେ। ପିଲାମାନଙ୍କ ସ୍ବାସ୍ଥ୍ୟାବସ୍ଥା ଭଲ ଥିବା ଆଦର୍ଶ ବିଦ୍ୟାଳୟ ଅଧ୍ୟକ୍ଷ ପୀତାମ୍ବର ବେଶ୍ରା କହିଛନ୍ତି।
