ମେଲ୍ବର୍ନ,୨୯ା୧୧: ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆନ୍ଥୋନି ଆଲବାନିସ୍ ଶନିବାର ତାଙ୍କ ପାର୍ଟନର ଯୋଡି ହେଡନଙ୍କୁ ବିବାହ କରିଛନ୍ତି। ରାଜଧାନୀ କାନ୍ବେରାସ୍ଥିତ ଆଲବାନିସ୍ଙ୍କ ସରକାରୀ ବାସଭବନରେ ବିବାହ ସମ୍ପନ୍ନ ହୋଇଛି। ଅଷ୍ଟ୍ରେଲିଆ ସଂଘୀୟ ସରକାରର ୧୨୪ ବର୍ଷର ଇତିହାସରେ ପ୍ରଥମ ଥର ପାଇଁ ଜଣେ ପ୍ରଧାନମନ୍ତ୍ରୀ କ୍ଷମତାରେ ଥାଇ ବିବାହ କରିଛନ୍ତି।
ବିବାହ ଉତ୍ସବରେ ଓସ୍କାର ବିଜୟୀ ଅଭିନେତା ରସେଲ କ୍ରୋ, କ୍ୟାବିନେଟ ମନ୍ତ୍ରୀବୃନ୍ଦଙ୍କ ସମେତ ପ୍ରାୟ ୬୦ଜଣ ଅତିଥି ଯୋଗ ଦେଇଥିଲେ। ବିବାହ ଶେଷ ହେବା ପର୍ଯ୍ୟନ୍ତ କୌଣସି ଗଣମାଧ୍ୟମ ଖବର ପ୍ରକାଶ କରି ନ ଥିଲେ। ଏହି ଦମ୍ପତି ସେମାନଙ୍କ ବିବାହ ଶପଥ ନିଜେ ଲେଖିଥିବା ବେଳେ ସେମାନଙ୍କ କୁକୁର ଟୋଟୋ ମୁଦିବାହକ ହୋଇଥିଲେ। ହେଡନଙ୍କ ୫ ବର୍ଷୀୟା ଝିଆରୀ ଏଲା ଉପସ୍ଥିତ ଥିଲେ।
୬୨ ବର୍ଷୀୟ ଆଲବାନିସ୍ ୨୦୦୦ରେ କାର୍ମେଲ ଟେବୁଟ୍ଙ୍କୁ ବିବାହ କରିଥିବା ବେଳେ ୨୦୧୯ରେ ସେମାନଙ୍କର ଛାଡ଼ପତ୍ର ହୋଇଥିଲା। ଗତବର୍ଷ ଭାଲେଣ୍ଟାଇନ୍ ଡେ’ରେ ଆଲବାନିସ୍ ୪୬ ବର୍ଷୀୟ ହେଡନଙ୍କୁ ପ୍ରପୋଜ୍ କରିଥିଲେ।
